Revised Common Lectionary (Semicontinuous)

¹ यहोवा क बड़कई करा।

    ओकर बड़कई सरग स करा।
² हे सबहिं सरगदूतो, यहोवा क जस गावा।
    ग्रहो अउ नछत्रो ओकर गुण गान करा।
³ सूरज अउ चाँद, तू पचे यहोवा क गुण गावा।
    अकासे क तारो अउ जोतियो, ओकर बड़कई करा।
⁴ यहोवा क बड़कई सबन त ऊँच पर्वत मँ करा!
    हे जल अकासे क ऊपर, ओकर बड़कई करा।
⁵ यहोवा क नाउँ क बड़कई करा।
    काहेकि उ आदेस दिहस, अउर सब कछू रचे रहा।
⁶ उ ऍन सबन्क बनाएस एह बरे उ सबइ सदा-सदा बना रहइँ।
    उ अपरिवर्तनसील कानून बनाएस।
⁷ ओ धरती पइ क हर वस्तु, यहोवा क गुण गावा।
    ओ बिसाल जन्तुओ अउ सबइ महासागरो, ओकर गुण गावा।
⁸ आगी अउ ओलन, बरफ अउ कुहासा, तूफानी पवन
    जउन ओकर वचन क पूरा किहेन, ओकर गुण गावा।
⁹ पर्वतन अउ सबइ पहाड़न,
    फलदार बृच्छ अउ देवदार क बृच्छ, ओकरे गुण गावा।
¹⁰ बनेर पसुअन अउ सब पालतु मवेसी, रेंगइवाले जीव अउ पंछियन, ओकर गुण गावा।
¹¹ धरती क सबहिं राजा लोग अउ सबइ रास्ट्रन,
    प्रमुखन अउ धरती पइ क सबहिं निआवाधीसन, ओकर स्तुति करा।
¹² नव जवान मनसेधू अउ नव जवान मेहरारू, ओकर स्तुति करा।
    परमेस्सर बूढ़े लोगन अउ गदेलन क रचेस ह।
¹³ ओनका यहोवा क नाउँ क स्तुति करइ द्या।
    अकेल्ले ओकरे नाउँ ही ऊँच सम्मानित अहइ।
धरती अउ अकास
    ओकर चमक-दमक स भरि जाइहीं।
¹⁴ उ आपन लोगन क मजबूती क स्रोत क निर्माण किहेस।
    उ आपन सबइ भगतन अरथ इस्राएलियन,
अउ ओकरे समीप रहइवाले रास्ट्रन बरे, स्तुति क स्रोत क निर्माण किहेस।

यहोवा क बड़कई करा।

¹³ हे आकासो, हे धरती, तू खुस होइ जा।
    हे पर्वतो, आनन्द स जयकारा बोला!
काहेकि यहोवा आपन लोगन क सुख देत ह।
    यहोवा आपन दीन हीन लोगन बरे बहुत दयालु अहइ। सिय्योन: तजी गइ मेहरारु

¹⁴ किन्तु अब सिय्योन कहेस, “यहोवा मोका तजि दिहस।
    मोर सुआमी मोका बिसरि गवा।”

¹⁵ किन्तु यहोवा कहत ह,
“का कउनो मेहरारू आपन ही बच्चन क भूल सकत ह? नाहीं।
    का कउनो मेहरारू उ बच्चा क जउन ओकर ही कोख स जन्मा ह, भूल सकत ह? नाहीं।
सम्भव अहइ कउनो मेहरारू आपन सन्तान क बिसरि जाइ।
    परन्तु मइँ (यहोवा) तोहका नाहीं बिसरि सकत हउँ।
¹⁶ लखा जरा, मइँ आपन हथेली पइ तोहार नाउँ खोद लिहे हउँ।
    मइँ सदा तोहरे विसय मँ ही सोचा करत हउँ।
¹⁷ तोहार सन्तानन तोहरे लगे लउटि अइहीं।
    जउन लोग तोहका पराजित किहे रहेन, उ पचे ही मनइयन तोहका अकेल्ले तजि जइहीं। इस्राएलियन क वापसी
¹⁸ आपन आखँनि क ऊपर उठावा अउ चारिहुँ कइँती लखा।
    तोहार सबहिं गदेलन आपुस मँ एकट्ठी होइके तोहरे लगे आवति अहइँ।”
यहोवा क इ कहब अहइ, “आपन जिन्नगी क कसम खाइके मइँ तू पचन्क इ सबइ बचन देत हउँ,
    तोहार गदेलन ओन रत्नन जइसी होइहीं जेनका तू अपने गले मँ पहिरत अहा।
    तोहार गदेलन वइसी ही होइहीं जइसा उ वंठहार होत ह जेका दुलहिन पहिरत ह।

¹⁹ “आजु तू नस्ट अहा अउर आजु तू पराजित अहा।
    तोहार भुइँया तबाही मँ अहइ।
किन्तु कछू ही दिनन पाछे तोहरी धरती पइ बहोत सारे लोग होइही
    अउर उ सबइ लोग जउन तोहका उजारे रहेन, दूर बहोत दूर चला जइहीं।
²⁰ जउन गदेलन तू खोइ दिहा, ओनके बरे तोहका बहोत दुःख भवा किन्तु उहइ पचे गदेलन तोहसे कहिहीं।
    ‘इ जगहिया रहइ क बहोत छोटी अहइ।
    हमका तउ कउनो फइली जगहिया द्या।’
²¹ फुन तू खुद अपने आप स कहब्या,
    ‘एन सबहिं गदेलन क मोरे बरे कउन जन्माएस?
    इ तउ बहोत अच्छा अहइ।
मइँ दुःखी रहा अउर अकेल्ला रहा।
    मइँ हारा भवा रहा।
मइँ आपन लोगन स दूर रहा।
    तउ इ सबइ गदेलन मोरे बरे कउन पालेस ह
लखा तनिक, मइँ अकेल्ला छोड़ा गवा हउँ।
    इ सबइ ऍतने सबइ गदेलन कहाँ स आइ गएन?’”

²² मोर सुआमी यहोवा कहत ह,
“लखा, आपन हाथ उठाइके इसारे स मइँ सारे ही देसन क बुलावे क संकेत देत हउँ।
    मइँ आपन झण्डा उठाउब कि सब लोग ओका लखइँ।
फुन उ पचे तोहार गदेलन क तोहरे लगे लिअइहीं।
    उ सबइ लोग तोहरे गदेलन क आपन काँधे पइ उठइहीं
    अउर उ पचे ओनका आपन बाँहे मँ उठाइ लेइहीं।
²³ राजा तोहरे गदेलन क सिच्छक होइहीं अउर सबइ राजकन्या ओनकर धियान रखिहीं।
    उ सबइ राजा अउर ओनकर सबइ राजकन्या दुइनउँ तोहरे समन्वा माथा नवइहीं।
उ पचे तोहरे पाँवन भी धूरि क चुम्बन करिहीं।
    तबहिं तू जनब्या कि मइँ यहोवा हउँ।
तबहिं तोहका समुझ मँ आई
    कि हर अइसा मनई जउन मोहमाँ भरोसा राखत ह, निरास नाहीं होइ।”