Revised Common Lectionary (Semicontinuous)

“બધી પ્રજાઓમાં જઇને પૂછો,
    ‘કોઇએ કદી આવું સાંભળ્યું છે?’
મારી પ્રજા ઇસ્રાએલે ભયંકર કૃત્ય કર્યું છે.
¹⁴ લબાનોન પર્વતોની ટોચ પરનો બરફ કદી જ ઓગળી જતો નથી.
    હેમોર્ન પર્વતના ખડકોમાંથી વહેતાં ઠંડા
    પાણીના ઝરાઓ કદી સુકાઇ જતા નથી.
¹⁵ પણ મારા લોકો મને ભૂલી ગયા છે.
    તેઓ નિરર્થક તુચ્છ મૂર્તિને ધૂપ ચઢાવે છે.
તેઓએ તેમના પૂર્વજોના સારા માર્ગોનો ત્યાગ કર્યો છે
    અને પગદંડી વગરના ગંદા રસ્તાઓ પર ચાલ્યા છે.
¹⁶ તેમણે પોતાના દેશના એવા ભયંકર હાલ કર્યા છે
    કે લોકો સદા તેનો તિરસ્કાર કરશે.
જતા આવતા સૌ કોઇ એની દશા
    જોઇને આભા બની માથું ધુણાવશે.
¹⁷ મારા લોકોને હું પૂર્વના વાયરાની જેમ
    દુશ્મનો આગળ વેરવિખેર કરી નાખીશ.
તેમની આફતને વખતે
    હું તેમના તરફ પીઠ ફેરવીશ, જોઇશ સુદ્ધાં નહિ.”

¹⁹ યર્મિયાએ પ્રાર્થના કરી, “હે યહોવા, મને ધ્યાનથી સાંભળ!
    મારા દુશ્મનો મારી વિરુદ્ધ જે કહે છે તે સાંભળ!
²⁰ ભલાઇનો બદલો બૂરાઇથી કરાય તેમ છતાં,
    એ લોકો મારે માટે ખાડો ખોદી રહ્યા છે.
તારો રોષ તેમના પરથી ઊતરે એટલા
    માટે તારી સમક્ષ ઊભા રહીને
    મેં એમની વકીલાત કરી હતી તે યાદ કર.
²¹ તો હવે તું એમના બાળકોને દુકાળને હવાલે કર.
    તેમને તરવારની ધારે મરવા દે.
તેમની સ્ત્રીઓને પુત્રવિહોણી અને પતિવિહોણી થવા દે.
    પુરુષોને રોગથી અને જવાનો
    લડાઇમાં તરવારથી માર્યા જાય.
²² અચાનક લશ્કરી ટૂકડીઓ તેઓ પર આવી ચઢે
    અને તેઓનાં ઘરોમાંથી ચીસો સાંભળશે,
જ્યારે તું તારું લશ્કર લઇને તેમની પર ચઢી આવે,
    કારણ કે મને ખાડામાં પાડી નાખવા માટે તેઓએ ખાડો ખોદ્યો છે.
અને મારા રસ્તામાં તેઓએ
    છૂપાં છટકાં ગોઠવી રાખ્યા છે.
²³ પણ, હે યહોવા, મારો જીવ લેવા માટેનાં એમના તમામ ખૂની કાવત્રાઓ તમે જાણો છો.
    તમે તેઓને માફ કરશો નહિ, એમનાં પાપકર્મો ભૂલશો નહિ,
તેઓ તમારી સમક્ષ ઠોકર ખાઇને પછડાઇ પડો.
    તમારો રોષ ભભૂકી ઊઠયો હોય ત્યારે જ એમને સજા કરજો.”

તે (ખ્રિસ્ત) માનવ શરીરમાં આપણી આગળ પ્રગટ થયો;
તે ન્યાયી હતો એમ પવિત્ર આત્માએ ઠેરવ્યું;
દૂતોએ તેને દીઠો;
બિનયહૂદી રાષ્ટ્રોમાં તેના વિષેની સુવાર્તાનો ઉપદેશ થયો;
આખી દુનિયાના લોકો તેના પર વિશ્વાસ કરવા લાગ્યા.
તેને મહિમામાં આકાશમાં ઉપર લેવામાં આવ્યો.