Revised Common Lectionary (Semicontinuous)
12 हे यरूसलेम, यहोवा क गुण गावा।
सिय्योन, आपन परमेस्सर क बड़कई करा।
13 हे यरूसलेम, तोहरे फाटकन क परमेस्सर सुदृढ़ बनावत ह।
तोहरे नगर क लोगन क परमेस्सर असीस देत ह।
14 परमेस्सर तोहार देस क सान्ति स आसीस देत ह,
एह बरे तोहरे लगे खाइ बरे अनाज क ढेर अहइ।
15 परमेस्सर धरती क आदेस देत ह
अउर ओकर आदेस क फउरन पालन होत ह।
16 परमेस्सर धरती पइ तब तलक पाला गिरावत जब तलक धरातल वइसा सफेद नाहीं होइ जात जइसा उज्जर ऊन होत ह।
उ बर्फ क छोटा टूकन क हवा क संग धूरि क नाई उड़त ह।
17 परमेस्सर ओलन क अइसा बनावत ह मानो पाथरन अकासे स गिरत हीं।
कउनो मनई उ ठिठुरन क नाहीं सह सकत ह जउन ओकरे दुआरा भेजा जात ह।
18 फुन परमेस्सर दूसर आग्या देत ह, अउर गरम हवा फुन बहइ लग जात ह।
बर्फ टेघरइ लागत अउर जल बहइ लग जात ह।
19 परमेस्सर आपन आदेस याकूब क दिहे रहा।
परमेस्सर इस्राएल क निज बिधि क बिधान अउ नेमन क दिहस।
20 यहोवा कउनो दूसर रास्ट्र क बरे अइसा नाहीं किहस।
परमेस्सर आपन नेमन क, कउनो दूसर जाति क नाहीं सिखाएस।
यहोवा क जस गावा।
दाऊद मन्दिर क जोजना बनावत ह
28 दाऊद इस्राएल क सबहिं प्रमुखन क एकट्ठा किहस। उ सबइ प्रमुखन क यरूसलेम आवइ क हुकुम दिहस। दाऊद परिवार समूहन क हरेक प्रमुखन, राजा क सेवा करइवाली सेना क टुक्रड़िन क सेनापतियन, सेनाध्यच्छन अउर अधिकारीयन जउन राजा अउ ओनके पूतन क जनावरन अउ सम्पत्ति क देखरेख करत रहेन, राजा क महत्त्वपूर्ण अधिकारियन, सक्तीसाली बीरन अउर सबहिं बीर जोधन क बोलाएस।
2 राजा दाऊद खड़ा भवा अउर कहेस, “मोर भाइयो अउर मोरे लोगो, मोरे बात सुना। मइँ अपने हिरदइ स यहोवा क करार क सन्दूख क रखइ बरे एक जगह बनावइ चाहत हउँ। मइँ एक अइसी जगह बनावइ चाहत हउँ जउन परमेस्सर क पद पीठ बन सकइ अउर मइँ परमेस्सर बरे एक ठू मन्दिर बनावाइ क जोजना बनाएउँ। 3 मुला परमेस्सर मोहसे कहेस, ‘नाहीं दाऊद, तोहका मोरे नाउँ बरे मन्दिर नाहीं बनावइ चाही। तोहका इ नाहीं करइ चाही काहेकि तू एक जोधा अहा अउर तू बहोत स मनइयन क मार्या ह।’
4 “यहोवा इस्राएल क परमेस्सर इस्राएल क परिवार समूहन क अगुवाई करइ क बरे यहूदा क परिवार समूह क चुनेस। तब उ परिवार समूहस मँ स, यहोवा मोरे पिता क परिवार क चुनेस अउर उ परिवार स परमेस्सर मोका सदा बरे इस्राएल क राज चुनेस। परमेस्सर मोका इस्राएल क राजा बनावइ चाहत रहा। 5 यहोवा मोका बहोत स पूत दिहेस ह अउर ओन सारे पूतन मँ स, सुलैमान क यहोवा इस्राएल क नवा राजा चुनेस। परन्तु इस्राएल फुरइ यहोवा क राज्ज अहइ। 6 यहोवा मोहसे कहेस, ‘दाऊद, तोहार पूत सुलैमान मोर मन्दिर अउर एकरे चारिहुँ कइँती क पहँटा बनाई, काहेकि मइँ सुलैमान क आपन पूत चुनेउँ ह अउर मइँ ओकर बाप रहब। 7 जदि सुलैमान मोर विधियन अउर नेमन पालन करत रहत ह जइसा कि आज करत ह। तउ मइँ ओकर राज्ज क सदा क बरे सक्तीसाली बनाइ देबउँ।’”
8 दाऊद कहेस, “अब, सबहिं इस्राएलियन अउ परमेस्सर क समन्वा मइँ तोहसे इ सबइ बातन कहत हउँ: यहोवा अपने परमेस्सर क सबहिं आदेसन क मानइ मँ सावधान रहा। तब तू इ अच्छे देस क अपने लगे रख सकत ह अउर तू सदा क बरे एका अपने सन्तानन क दइ सकत ह।
9 “अउर मोरे पूत सुलैमान, तू, अपने बाप क परमेस्सर क जानत अहा। समूचइ हिरदइ अउ इच्छा स परमेस्सर क सेवा करा। काहेकि यहोवा परखत ह कि हर एक क हिरदइ मँ का बाटइ। हर बात जउन सोचत ह यहोवा जानत ह। जदि तू यहोवा क लगे मदद क बरे जाब्या, तउ तोहका उ मिली। किन्तु जदि ओका तजत ह, तउ उ तोहका सदा क बरे तजि देइ। 10 सुलैमान, तोहका इ समुझइ चाही कि यहोवा तोहका आपन पवित्तर मन्दिर बनावइ बरे चुनेस ह। सक्तीसाली बना अउर काम क पूरा करा।”
10 परमेस्सर क ओह अनुग्रह क अनुसार जउन मोका दिहा गवा रहा, मइँ एक कुसल प्रमुख सिल्पी क रूप मँ नीव डालेउँ मुला ओह पइ निर्माण तउ केऊ अउरइ करत ह, मुला हर एक क सावधानी क साथे धियान रखइ चाही कि उ ओह पर निर्माण कइसे करत बा। 11 काहेकि जउन नींव डाली गइ बा उ खुद ईसू मसीह ही अहइ अउर ओसे अलग दूसर नींव केऊ बनाइ नाहीं सकत।
12 अगर लोग ओह नींव पर निर्माण करत ही, फिन चाहे उ पचे ओहमे सोंना लगावइँ, चांदी लगावइँ बहुमूल्य रतन लगावइँ, लकड़ी लगावइ, फूस लगावइँ या तिनका क प्रयोग करइँ, 13 हर मनई क काम स्पस्ट रूप स देखॉइ देइ। काहेकि उ दिन ओका उजागर कइ देइ। काहेकि उ दिन जुवाला क साथे परगट होइ अउर उहइ जुवाला हर मनई क कामन क परखी कि उ सबइ काम कइसेन बाटेन। 14 अगर ओह नींव पर कउनउ मनई क करमन क रचना टिकाऊ होइ 15 तउ उ ओकर प्रतिफल पाइ अउर अगर कीहीउँ क काम ओह जुवाला मँ भसम होइ जाइ तउ ओका हानि उठावइ क होइ। मुला फिन भी उ खुद वइसेनही बचि निकरी जइसे कउनउ आगी स बरत भए भकान स पराइके बचत ह।
16 का तू नाहीं जानत अहा कि तू पचे खुद परमेस्सर क मंदिर अहा अउर परमेस्सर क आतिमा तोहमें निवास करत ह? 17 अगर केऊ परमेस्सर क मंदिर क हानि पहुँचावत ह तउ परमेस्सर ओका नस्ट कइ देउ। काहेकि परमेस्सर क मंदिर तउ पवित्तर बा। हाँ, तू ही तउ उ मंदिर अहा।
Awadhi Bible: Easy-to-Read Version. Copyright © 2005 Bible League International.