Revised Common Lectionary (Semicontinuous)

⁵ Can ketaman wi chi sibilaj nim rukˈij, ruma ri Dios majun bey rubin ta chare jun ángel:
    Yit cˈa riyit ri Nucˈajol.
    Rumariˈ wacami nyaˈ acˈaslen. Y chukaˈ majun bey rubin ta:
    Yin cˈa riyin ri Rutataˈ,
    y ya Riyaˈ ri Nucˈajol. Majun bey rubin ta queriˈ chare jun ángel. ⁶ Y tek ri Dios xutek pe ri Rucˈajol chuwech re ruwachˈulef, xubij chi quinojel ri ruˈángeles tiquiyaˈ rukˈij ri Rucˈajol. ⁷ Chiquij cˈa ri ángeles, ri tzˈibatal ca xaxu (xaxe) wi nubij:
    Ri ruˈángeles ri Dios sibilaj yebiyin chubanic ri rusamaj,
    ruma nuben chique chi ye achiˈel ri cakˈikˈ y nuben chique ri rusamajelaˈ chi ye achiˈel ri ruxak kˈakˈ. ⁸ Yacˈa chare ri Cˈajolaxel, ri Dios nubij:
    Riyit can yit Dios riche (rixin) xtibe kˈij xtibe sek
    y can choj wi yakˈato tzij.
⁹     Awajowan cˈa ri chojmilal y awetzelan ri etzelal.
    Y rumariˈ riyin ri a‑Dios nyaˈon quicoten pan awánima.
    Más quicoten nyaˈon chawe riyit que chuwech ri quicoten ri nyaˈon chique ri nicˈaj chic. ¹⁰ Y chukaˈ ri Dios xubij chare ri Rucˈajol:
    Ajaf, riyit pa rutiquiribel pe xaben ri ruwachˈulef,
    y akˈaˈ chukaˈ riyit xbano ri caj.
¹¹     Ri ruwachˈulef y ri caj xqueqˈuis,
    yacˈa riyit majun bey xcaqˈuis ta.
    Ri ruwachˈulef y ri caj xa can xquerijix wi, achiˈel nirijix jun tziek.
¹²     Ri ruwachˈulef y ri caj can xqueˈajel cˈa,
    achiˈel niban chare jun tziek ri xa ma utz ta chic.
    Y can xqueˈabot wi cˈa el;
    yacˈa riyit majun bey xcajalatej ta.
    Majun bey xtiqˈuis ta ri acˈaslen. Queriˈ xubij ri Dios. ¹³ Y ri Dios majun bey xubij ta chare jun ángel:
    Catzˈuyeˈ pa wajquikˈaˈ,
    cˈa ya tek xquenyaˈ na pan akˈaˈ pan awaken ri yeˈetzelan awuche (awixin). Ri Dios ma xubij ta queriˈ chare jun ángel. ¹⁴ Ri ángeles can ye espíritu y ye rusamajel ri Dios. Y can yetak wi ruma ri Dios riche (rixin) chi yequitoˈ ri winek ri yatajnek chique chi xtiquil na ri colotajic.