Revised Common Lectionary (Semicontinuous)

Mga Panghuling Paala-ala

¹² Ngunit ipinamamanhik namin sa inyo, mga kapatid, na kilalanin ninyo ang mga nagpapagal sa inyo at nangunguna sa inyo sa Panginoon at nagbibigay babala sa inyo.

¹³ Inyong lubos na pahalagahan sila sa pag-ibig dahil sa kanilang gawa. Magkaroon kayo ng kapayapaan sa isa’t isa. ¹⁴ Ngunit mga kapatid, aming ipinagtatagubilin din na bigyan ninyo ng babala ang mga tamad. Aliwin ninyo ang mga mahihina ang loob. Inyong tulungan ang mga nanghihina. Maging mapagbata kayo sa lahat. ¹⁵ Tiyakin ninyo na walang sinumang gumanti ng masama sa masama. Subalit pagsumikapan ninyong lagi na gumawa ng mabuti sa isa’t isa at gayundin sa lahat.

¹⁶ Lagi kayong magalak. ¹⁷ Manalangin kayong walang patid. ¹⁸ Magpasalamat kayo patungkol sa lahat ng bagay sapagkat ito ang kalooban ng Diyos kay Cristo Jesus para sa inyo.

¹⁹ Huwag ninyong patayin ang ningas ng Banal na Espiritu. ²⁰ Huwag ninyong hamakin ang mga paghahayag. ²¹ Suriin ninyo ang lahat ng mga bagay. Hawakan ninyo ang mabuti. ²² Iwasan ninyo ang lahat ng anyo ng kasamaan.