Revised Common Lectionary (Semicontinuous)

Jairopaj ushushitaca causachishca, yahuar cacharirishca huarmitaca alliyachishcami

⁴⁰ Jesús ña cutin tigramujpica, Paita shuyacushcamantami tucui gentecuna achcata cushicushpa chasquircacuna. ⁴¹ Pai chaipi cajpimi, tandanacuna huasipi pushaj Jairo shuti runa shamurca. Paica, Jesuspaj ñaupajpi pambacama cumurishpami, ‘Ñuca huasiman jacupai’ nirca. ⁴² Paica, chunga ishqui huatayuj shujlla ushushitami charirca. Chai huambrataj ancha ungushca ña huañunalla cajpimi, chashna mañarca. Paipaj huasiman ricujpica, gentecunaca mana jahuallatami llapirinacui catircacuna.

⁴³ Chaicunapurapica, chunga ishqui huatata yahuar cachariricuj ungushca huarmipishmi caticurca. Paica jambijcunaman jambichicushpallami, tucui imalla charishcacunata tucuchishca carca. Shina cajpipish pi mana alliyachi tucushcachu carca. ⁴⁴ Chai huarmi, huashata shamushpa, Jesuspaj churana chupapi tuparijpica, cachariricuj yahuarca chaipi jarcarircallami.

⁴⁵ Chashna tucujpica, Jesusmi:

–¿Pitaj Ñucata tuparinchu, imamí?– nishpa tapurca.

Chashna tapujpimi:

–Pi mana tuparinchijchu– nircacuna.

Chaimantami Pedropish, paihuan cajcunapish:

–¿Yachachij, cai tucui gentecuna llapirashpa catishcata ricushca jahuachu: “¿Pitaj tuparin?” nishpa tapungui, imamí?– nirca.

⁴⁶ Shina nijpipish, Jesusca:

–Alliyachi tucuna Ñucamanta llujshijtamari yachani, pitajshimari Ñucapi tuparirca– nircami.

⁴⁷ Chai huarmica, alliyashpa upalla saquirinallatami yuyarca. Chashna yuyashca cashpapish Jesusllataj huillajpimi, shamushcahuan Jesuspaj ñaupajpi chujchushpa pambacama cumurirca. Chai q'uipami, imamanta Paipaj churanapi tuparishcatapish, tuparishcahuan alliyashcatapish tucuicunapaj ñaupajpi, callarishpa huillarca. ⁴⁸ Chaita huillajpimi, Jesusca:

–Huahua, canca crishcamantami alliyashcangui, cunanca ama manchashpa rilla– nirca.

⁴⁹ Jesús chashna rimacujpirajmi, tandanacuna huasipi mandaj Jairopaj huasimanta shuj shamushpaca:

–Ñamari cambaj ushushica huañun. Yachachijtaca, ña ama ashtahuan p'iñachicuichu– nirca.

⁵⁰ Chaita uyashpami, Jesusca:

–Ama manchaichu, crishpa catilla, alliyangallami– nirca.

⁵¹ Jairopaj huasiman chayashpaca, Jesusca Pedrota, Jacobota, Juanta, huambrapaj yaya mamandijta pushashpami yaicurca. Pi shujtaj mana yaicuchun saquircachu. ⁵² Tucuicuna chai huambramanta anchata llaquirishpa, caparirishpa huacacujpimi Jesusca:

–Ama huacaichijchu. Huambraca mana huañushcachu, dormicunllamari– nirca.

⁵³ Chashna nijpica, ña huañushcataj cashcata alli yachashcamantami, Paitaca yanganchishpa asircacuna. ⁵⁴ Ashtahuanpish Jesusca, chai huañushcata maquimanta japishpaca, sinchitami:

–¡Huambra, jatari!– nirca.

⁵⁵ Chashna nijpica chai huañushca huambraca, ñapish paipaj espíritu tigrajpi jatarircallami. Chaimantami Jesusca, ‘Micunata huambraman caraichijlla’ nishpa mandarca. ⁵⁶ Chaita ricushpaca yaya mamaca, upayajtami mancharircacuna. Ashtahuanpish Jesusca, paicunataca:

–Caitaca, ama piman huillanguichijchu– nishpami mandarca.