Revised Common Lectionary (Semicontinuous)

Dee 78 Psalm

Ne Auflea von Asaf.

¹ O mien Folkj, horjch no mien Jesats; beajcht june Uare dol no dee Wead ut mien Mul.

² Ekj woa mien Mul opmoake enn en Jlikjnes; ekj woa dunkle Räd fonn Joare trigj jäwe,

³ dee wie jeheat un jewist habe, un onnse Fodasch onns fetalt habe.

⁴ Wie woare dee nijch fonn onnse Säns festäakje, däm Herr Gott siene Preise bekaunt to moake to daut komendet Jeschaljcht; jo, siene Macht un siene wunndafolle Woakje dee Hee jedone haft.

⁵ Dan Hee haft en Zeijchnes oppjehäft enn Joakopp, un en Jesats enn Iesrael jesat; daut Hee onnse Fodasch aunkommendeare deed daut see dee sulle to äare Säns ennleare,

⁶ soo daut daut komendet Jeschlajcht weete mucht; Säns sele jebaure woare, un dee sele oppstone un äare Säns ennleare,

⁷ soo daut see äa Hop muchte enn Gott habe, un nijch Gott siene Woakje fejäte, oba siene Jesatse hoole.

¹³ Nu, Breeda, wie wele nich ha daut jie sele onnwissent senne waeajen daen dee enjeschlope sent, daut jie nich truare soo aus dee, dee kjeene Hopninj habe.

¹⁴ Dan wan wie jleewe daut Jesus jestorwe es, en wada oppjestone es, jrod soo woat Gott daen met am met brinje dee enn Jesus ennjeschlope sent.

¹⁵ Dan dit saj wie junt derch daem Herr sien eajnet Wuat, daut wie, dee laewe en bliewe bott daem Herr sien kome, woare opp kjeen Wajch daen feropp kome dee ennjeschlope sent.

¹⁶ Dan dee Herr selfst woat fom Himel erauf kome met en kommendearendet Wuat, met daem hechste Enjel siene Stem, en met Gott siene Trommpeet, en dee enn Christus jestorwe sent woare eascht oppstone,

¹⁷ dan woa wie, dee wie laewe en hia jeblaewe sent, met an toop enn Wolkje nehecht jejraepe woare, toop daem Herr to trafe enne Lofft, en aulso woa wie dan emma met daem Herr toop senne.

¹⁸ Doaromm treest junt unjarenaunda met dise Wead.

25 "Dan woat daut Himelsrikj fejlikjt woare met tean Junkfrulied dee aeare Laumpe neeme, en rut jinje daen Briegaum to trafe.

² Nu fief fonn dee weare nich kluak, oba dee aundre fief weare faeasechtich.

³ Dee fief dee nich kluak weare, neeme aeare Laumpe, oba neeme nich Eelj met.

⁴ Oba dee kluake neeme aeare Laumpa, en neeme uk Jefaese met Eelj met.

⁵ Aus dee Briegaum sien kome fetrok, schleepe dee aula enn.

⁶ Med enne Nacht wea doa en Jeschrecht: 'Kjikjt! de Briegaum kjemt! Got am entjaeajen!'

⁷ Donn stunnde dee Junkfruhlied aule opp, en puttste aeare Laumpe.

⁸ Donn saede dee, dee nich kluak weare to dee faeasechtje: 'Jaeft onns fonn june Eelj, dan onnse Laumpe gone ut!'

⁹ Donn saede dee faeasechtje: 'Doa es nich jenuach fa junt uk onns. Got no daen dee Eelj fekjeepe en kjeept fa junt selfst'.

¹⁰ En aus see wajch jinje to kjeepe, kjeem dee Briegaum, en dee, dee reed weare jinje met am enenn no dee Kjast, en de Daea wort toojemoakt.

¹¹ Nohaea kjeeme dee aundre Junkfrulied en saede: 'Herr, Herr, moak op!'

¹² Oba hee auntwuad en saed: 'Enn Woarheit saj ekj junt, ekj kjan junt nich'.

¹³ Doaromm woakt, dan jie weete nich waut fonn Dach oda Stunnd hee kjemt.