Revised Common Lectionary (Semicontinuous)

Dee Psalme V

Dee 107 Psalm

¹ Jäft däm Herr Gott Dank, dan Hee es Goot, dan sien Erboarme es duarhauft fa emma.

² Lot däm Herr Gott siene Jerade soo saje; dän Hee jerat haft fonn däm Fient siene Henj;

³ un dän toop jesaumelt haft fonn dee Lenda, fomm Ooste un fomm Waste; fom Nuade un fomm Siede.

⁴ See waundade enne Wiltnis, enn en Wiltnis Wajch, see funge kjeena Städ wua see wone kunne;

⁵ hungrich un darschtich, äare Seel deed enn an feschmachte;

⁶ un see schrieeje no däm Herr Gott enn äa Älend; Hee rad an fonn äare Loag.

⁷ Un hee leid an enn dän rajchte Wajch; no ne Grootstaut wua see läwe kunne.

³³ Hee deit Wiltnis moake fonn Riefasch, un Wota Kjwale to dreaje Ead;

³⁴ un fruchtboaret Launt to ne soltje Wiltnis, wäajen dän äa Beeset dee doa benne wone.

³⁵ Hee moakt en Wota Puddel ut dee Wiltnis, un ut dreajet Launt moakt Hee Wota Kjwale;

³⁶ Un Hee moakt dee Hungrije doa wone, daut see doa ne Woninj moake fa sikj selfst.

³⁷ Un dee seihe dee Flekja Launt doa enn, un plaunte Wiengoades, un moake Frucht Arnt.

⁹ Dan, Breeda, jie behoole onns Bemeaje enn onnse Oabeit; wie oabeide Dach en Nacht daut wie nich wudde ne Laust senne opp irjentwaem, daut wie junt Gott sien Evanjeelium praedje kunne.

¹⁰ Jie sent onnse Zeij, Gott uk, woo opprechtich en heilich en oone Schult wie weare mank daen dee jleewe,

¹¹ so aus jie weete daut wie en jieda eena fonn junt, so aus en Foda siene Kjinja,

¹² femont en jetreest ha, en jezeicht ha daut jie soo laewe sulle auset sikj fer Gott jeheat, dee junt to sien Rikj en siene Harlichkjeit beroope deit.

¹³ En doaromm dank wie Gott uk oone Enj, daut aus jie daut Wuat fonn Gott daut jie fonn onns heade, aun neeme, neem jie daut nich aun aus en Menschewuat, oba so auset enn Werklichkjeit es, en Waut fonn Gott daut uk oabeit enn junt dee jleewe.

23 Donn raed Jesus to daut Follkj en to siene Jinja,

² en saed: "Dee Schreftjeleade en Farisaea sette opp Mooses sien Leastool.

³ Doaromm, aules waut see junt saje, horcht no an en doot waut see saje, oba doot nich soo aus see doone, dan see leare, oba doone selfst nich waut see saje.

⁴ Dan see binje aundre Mensche schwoare Lauste opp, en laje daen opp aeare Schulre, oba sent selfst nich welich een Finja to brucke met to halpe.

⁵ See doone aul aeare Woakje sikj fer Mensche seene to lote. See moake aeare Jebaed Reeme breet, en moake dee Tolle jrate,

⁶ en wele jearn dee Hauptstaede ha enn dee Moltiede, en dee Hauptsette enne Sienagooge

⁷ en jejreest woare enn dee Moakjtplautse, en daut de Mensche an 'Leara' nane.

⁸ Oba jie sele junt nich 'Leara' nane lote, dan eena es jun Leara, en jie sent aula Breeda.

⁹ En jie sele kjeenem oppe Ead 'Foda' nane, dan eena es jun Foda, en daut es dee himlischa.

¹⁰ En jie sele uk nich 'Leida' jenant woare, dan eena es jun Leida, en daut es Christus.

¹¹ En dee daut jratste mank junt es, saul jun Deena senne.

¹² En waea sikj selfst Groot moakt, woat jedeemueticht woare, oba waea sikj selfst deemueticht, woat nehecht jehowe woare.