Revised Common Lectionary (Semicontinuous)

Dee 69 Psalm

To dän Haupt Musikaunt, fonn dee Lelje, en Psalm fonn Doft.

¹ Rad mie, O Gott, dan dee Wotasch sent enn miene Seel Jekome.

² Ekj fesenkj enn daut deepet Blott, un doa es kjeen Stone; ekje sie enn dee deepe Wotasch jekome wua dee Äweschwamunj äwahaunt nemt.

³ Ekj sie meed fonn hiele, mien Hauls es dreajch, miene Uage fesaje mie wäarent ekj no mien Gott lua.

¹³ Oba waut mie daut aunbelanjt, mien Jebäd es to die, O Herr Gott, enn ne aunjenäme Tiet, O Gott! Enn dee Butamote fonn dien Erboarme, doo mie auntwuate, enn dee Woarheit fonn diene Radunk.

¹⁴ Rad mie fonn ut daut Blott, soo daut ekj nijch sinkje woa; lot mie jerat woare fonn dän dee mie hausse; en fonn ut dee deepe Wotasch.

¹⁵ Lot dee Äweschwamunj nijch äwa mie kome, un lot daut Deepet mie nijch oppschlucke, un lot nijch dee Kul too gone äwa mie.

¹⁶ Hea mie, O Herr Gott, dan dien Erboarme es goot, drie die no mie enn dee Butamote fonn diene leeftolje Erboarmunje.

³⁰ Ekj woa noch Gott sien Nome preise enn en Leet, un ekj woa am feharlijche met Danksagunk.

³¹ En daut woat däm Herr Gott meeha jefaule aus Bolles dee Heanna un Heefte ha.

³² Dee Deemietje ha jeseene un freihe sikj; jie, dee jie Gott seakje, june Hoate sele läwe.

³³ Dan dee Herr Gott heat dee Bederftje, un hee diet siene Jefangne nijch feachte.

³⁴ Lot dee Himels un dee Ead am preise, dee See, un aule dee doabenne wanke.

³⁵ Dan Gott woat Zion rade; un hee woat Juda äare Grootstaede oppbuehe, un dee woare doa wone un daut eajne.

³⁶ Un siene Deene äare Nokome woare daut oawe, un dee sien Nome leef ha woare doabenne wone.

2 Doaromm ha jie kjeene Entschuldjunk, jie Mensche, wan jie aundre rechte, wiel jie doone de naemlije Dinje dee jie enn aundre rechte, en fedaume junt selfst doamet.

² Wie weeta oba daut Gott sien Uadeel enn Woarheit es aun soone dee soont aungone.

³ En denkst du, du Mensch, daut wan du aundre rechte deist dee soont doone, oba daut naemlijet deist, daut du Gott sien Uadeel woascht febie jlepe?

⁴ Oda fe-achst du Gott siene rikje Leeftolichkjeit, en daut hee so goot to die es, uk siene groote Jedult, weetst oba nich daut hee die doaderch no de Buesse leide deit?

⁵ Oba doano aus dien hoadet en onnbuessfoadjet Hoat es, saumelst du fa die selfst Oaja jaejen daen Dag wan Gott sien Oaja woat jeoppenboat woare enn Gott sien jerachte Jerechtsdag,

⁶ dee en jiedrem woat doano fejelte aus siene Woakje sent;

⁷ daut eewjet Laewe fa dee, dee emm goodet doone aunhoole, en Harlichkjet, Ea, en daut waut nich fejenklich es, seake;

⁸ oba dee, dee no aeare eajne Ea seakje en de Woarheit nich jehuarsaum sent, en leewa de Onnjerachtichkjet jehuarsaum sent, - kjeene Jnod, en sien Oaja.

⁹ En jieda dee Beeset hinjaraun jeit, woat Triebsaul en Oaja habe, easchtens de Jude en uk de Grieche

¹⁰ Oba Ea, Harlichkjet, en Fraed fa aul daen, dee goodet doone, easchtens de Jude en uk de Grieche;

¹¹ wiels bie Gott es kjeen aunseene de Person.;