Revised Common Lectionary (Semicontinuous)

Dee 76 Psalm

To dän Haupt Musikaunt, fa Instrumente met seide. En Psalm von Asaf, en Leet fonn Preis.

¹ Gott es bekaunt enn Juda; sien Nome es groot enn Iesrael.

² Un siene Woning es enn Salem, un siene Wonstäd enn Zion.

³ Doa bruak Hee dee fiarije Fiele fonn dän Boage, daut Schilt, un daut Schweat, enn dän Kjrijch. Selah.

⁴ Du best Harlijch, meeha fetraflijch aus dee Boaj fonn daut Raup.

⁵ Dee Stoakjhoatje sent bestreept; dee schleepe äa Schlop, un kjeene fonn dee majchtje Mana ha äare Henj jefunje.

⁶ Derjch dien Dodel, O Joakopp sien Gott, sent beid Peat un Kjrijchswoage enn en deepa Schlop jesunke.

⁷ Du best engstlijch; un wäa kaun fer die bestone wan du oajalijch best?

⁸ Jerejcht es fomm Himel to heare derjch dien Wele; dee Ead deed sikj ferjchte un wea jestelt,

⁹ aus Gott oppstunt to Jerejcht, aul dee Macke oppe Ead to rade. Selah.

¹⁰ Dan dee Mensche äa Oaja woat die danke; du deist die ommrinje met daut Oaja daut äwejebläwe es.

¹¹ Fespräakj un bäd to däm Herr Gott dien Gott; lot aul dän dee romm sent Jeschenkje brinje to däm, däm to ferjchte es.

¹² Hee woat dän Jeist enn dee Kjeenijchsäns aufschniede; dee Kjeenije oppe Ead ha Angst fa am.

³⁷ Jerusalem! Jerusalem! dee du de Profeete doot moakst, en daen steenichst dee no die jeschekjt worde; woo foaken wudd ekj jearen ha diene Kjinje toop jesaumelt soo aus en Foagel aeare Junje unje aeare Flichte toop saumelt, oba jie wulle nich.

³⁸ Kjikjt! jun Hus woat felote senne soo aus ne Wiltnes.

³⁹ Dan ekj saj junt, daut jie mie opp kjeen wajch meeha seene woare bott jie saje woare: 'Jesaeajent es dee, dee enn daem Herr sien Nome kjemt!'"

24 En Jesus jinkj fomm Tempel wajch, en siene Jinja kjeeme no am, omm am dee Jebiede fom Tempel to wiese.

² Hee auntwuad an en saed: "See jie aul dise Dinje? Enn Woarheit saj ekj junt, opp kjeen wajch woat hia een Steen oppem aundre bliewe, daut nich woat dol jeschamete woare".

³ Aus hee oppem Eeljboajch saut, kjeeme siene Jinja no am enn priewaut, en saede: "Saj onns, waneeha woat aul dit paseare, en waut es dee Teakjen fonn dien Wadakome, en daut Enj fonn dise Tiet?"

⁴ En Jesus auntwuad en saed to an: "Seet doano daut kjeena junt fefeare woat.

⁵ Dan fael woare enn mien Nome kome en saje: 'Ekj sie dee Christus', en woare fael feleide.

⁶ Jie woare fonn Kjrich en Kjrichsjeschrecht heare; lot junt nich oppraeaje doawaeajen, dan daut mott aules paseare, oba daut es noch nich daut Enj.

⁷ Dan eene Natsjoon woat sikj oppstale jaeajen ne aundre Natsjoon, en een Kjeenichrikj jaeajen en aundret, en doa woare Hungaschnoot en Eadbaebe senne enn feschiedenste Staede;

⁸ oba aul dit es daut Aunfank fonn grootet Liede.

⁹ Dan woare see junt enn Aelend aewajaewe, en woare junt doot moake, en aule Natsjoone woare junt hause omm mien Nome haulwe.

¹⁰ En fael woare beleidicht senne, en woare eena daem aundra ferode, en woare sikj unjarenaunda hause;

¹¹ en fael faulsche Profeete woare oppstone, en woare fael feleide.;

¹² en wiel Gottloosichkjeit toonaeme woat, woat faele aeare Leew kollt woare.

¹³ Oba waeaemma bottem Enj uthelt, woat jerat woare.

¹⁴ En dit Evanjeelium fomm Rikj woat jepraedicht woare aewa dee gaunse Welt fa en Zeichnes aun aule Natsjoone, en dan woat daut Enj kome.