Revised Common Lectionary (Semicontinuous)

Tzedd

¹³⁷ O Herr Gott, Du best Jerajcht, un diene Jerejchte sent rajcht.

¹³⁸ Du hast Jerajchtijchkjeit fonn diene Zeijchnisse jejäft, un sondaboare Weisheit.

¹³⁹ Mien Iewa haft mie fetäat, dan miene Fiend ha dien Wuat fejäte.

¹⁴⁰ Dien Wuat es rein, un dien Deena haft daut leef.

¹⁴¹ Ekj sie mau kjlien un feacht; ekj doo diene Fäaschrefte nijch fejäte.

¹⁴² Diene Jerajchtijchkjeit es fa emma Jerajchtijchkjeit; un dien Jesats es Woarheit.

¹⁴³ Noot en Seeleangst ha mie jefunge; dien Aunkommendeare es mien Fejneaje.

¹⁴⁴ Dee Jerajchtijchkjeit fonn diene Zeijchnisse es eewijch; moak mie daut weete un ekj woa läwe.

1 Paul, Jesus Christus sien Apostel derch Gott sien Wele, en Timotaeaus onns Brooda, aun Gott siene Jemeent dee enn Korint es, uk aul dee Heilje enn Achaja;

² Jnod met junt, en Fraed fonn Gott onns Foda, en onns Herr Jesus Christus.

³ Jesaeajent es onns Herr Jesus Christus sien Gott en Foda, de Foda fonn waem aulet Erboarme kjemt, en Gott, fonn waem aula Troost kjemt,

⁴ dee onns treeste deit enn aul onns Aelend, soo daut wie daen treeste kjene dee enn Aelend sent, met daen Troost daen wie fonn Gott jekjraeaje ha.

⁵ Dan soo aus Christus sien Liede rikjlich enn onns es, soo es Troost uk rikjlich enn onns derch Christus.

⁶ Nu, wan wie enn Aelend sent, soo eset fa jun Troost en Heil; oda wan wie jetreest woare, eset junt uk tom troost, daut wirkjt doaderch daut jie jeduldich liede enn daut naemlijet waut wie liede.

⁷ Onnse Hopninj fa junt steit faust, dan wie weete daut, soo aus jie aundeel ha aun daut Liede, soo woa jie uk aun daen Troost.

⁸ Dan Breeda, wie wele nich daut jie nich weete sele fonn daen Triebsaul daen wie haude enn Asean, daut wie bute Mote bedreckt weare, daut wie soogoa aewa onns Laewe fetsoacht weare.

⁹ Wie ha daut Doodesuadeel enn onns jehaut, soo daut wie nich wudde fetruehe enn onns selfst ha, oba enn Gott, dee de Doodes oppwoakt;

¹⁰ dee onns fonn soon groota Doot jerat haft, en woat onns rade, enn daem wie hope daut hee onns uk noch secha wada rade woat;

¹¹ enn daem daut jie met onns oabeide em Jebaed, soo daut fael kjenne dankboa senne aewa onns fa dee Gow dee onns jejaeft es derch fael aere Jebaed.