Revised Common Lectionary (Semicontinuous)

Dee 45 Psalm

To dän Haupt Musilkaunt opp Schoschannim, fa dee Korah Säns. En Jedijcht; en Leet fonn miene Leefate.

¹ Mien Hoat es äwafoll fonn ne goode Sach; ekj räd fonn miene Woakje to däm Kjeenijch; miene Tunj es dee Stolfada fonn en pienje Schriewa.

² Du best dee Straumste mank dee Mensche Säns; Jnod es opp diene Leppe utjegote; doaromm haft Gott die fa emma jesäajent.

⁶ Dien Troon, O Gott, es fa emma en emma; dee Stang fonn dien Rikj es dee Stang fonn diene Jerajchtijchkjeit.

⁷ Du hast Jerajchtijchkjeit leef, un deist Beeset hausse; doaromm woat Gott, dien Gott, die met dee Freid Eelj saulwe meeh aus diene Komrode.

⁸ Aul diene kjleede rikje fonn Mir un Saulweelj; ut dee Aulfensteen Paulauste, derjch woont dee die froo moake.

⁹ Kjeenijchs Dajchta sent mank dee Kjestlijche; dee Kjeenijin steit to diene rajchte Haunt, enn Golt fonn Ofir.

¹⁷ Jiede goode en follkomne Gow kjemt fonn Bowe, fonn daem Licht Foda, bie waem doa kjeene Staed es to endre, oda Schaute Wakjsel.

¹⁸ Derch sien eajnet Faeanaeme haft hee onns derch daut Woarheits Wuat tom Laewe jebrocht, daut wie daut easchte Frucht sulle senne fonn daut waut hee jeschaufe haft.

¹⁹ Doaromm, miene leeftse Breeda, lot en jieda Mensch schwind senne tom heare, langsam tom raede, langsam Doll to senne.

²⁰ Dan Menschewutt deit Gott siene Jerajchtichkjeit nich wiede stale.

²¹ Doaromm lajcht aulet Onnreinet auf, en daut grootet Beeset, en naemt enn Saunftmoot daut ennjeplauntet Wuat aun daut june Seele rade kaun.

²² Oba jie sele uk soone senne dee daut Wuat doone, en nich bloos heare, wiel dan schmaea jie junt selfst aun.

²³ Dan wan jeemaunt daut Wuat heat, en daut oba nich deit, dan es hee soo aus en Maun dee sien natearlichet Jesecht enn en Speajel sit.

²⁴ Dan hee bekjikjt sikj selfst en jeit wajch en fejat platslich wooet am sach.

²⁵ Waea oba enn daut follkomne Jesats de Frieheit ennen kjikjt, en doabenne blift, en es nich en fejaetsaume Heara, oba deit wautet sajcht, dee woat jesaeajent senne enn aules waut hee deit.

²⁶ Wan waea meent daut hee relijeesisch es, oba helt siene Tung nich em Toom, schmaeat sikj selfst aun, en sien relijeesisch senne es fejaefs.

²⁷ Reine en ajchte Relijoon fer Gott daem Foda es dit: dee Weise en Waetfruehes enn aea Aelend beseakje, en sikj fonne Welt rein hoole.

7 Donn fesaumelde dee Farisaea, en walkje fonn dee Schreftjeleade fonn Jerusalem sikj omm am.

² En aus see sage daut walkje fonn dee Jinja Broot aute met onnreine Henj, daut heet, see haude sikj nich eascht de Henj jewosche,

³ - dan dee Farisaea en aul dee Jude aete nich wan see nich eascht aeare Henj foaken wausche, en hoole faust aun dee Ellteste aeare Faeaschrefte.

⁴ En wan see fom Moakjtplauts kome, bespretse see sikj eascht ferem aete, en soo ha see fael feschiedne Dinje dee see jekraeaje ha to hoole, soo aus Kuffels, en Jefaesse, en Messinj Kjaetels utwausche; -

⁵ en dee Farisaea en Schreftjeleade fruage am: "Wuaromm waundle diene Jinja nich no dee Ellteste aeare Faeaschrefte, en aete Broot oone aeare Henj to wausche?"

⁶ En hee saed to an: "Enn Woarheit haft dee Profeet Jesaja aewa junt Heichla jeprofitseit, soo auset jeschraewe steit: 'Dise Mensche eare mie met aeare Leppe, oba aea Hoat es wiet auf fonn mie;

⁷ fejaefs baede see mie aun, en leare bloos Menschefaeaschrefte'.

⁸ Jie ha Gott siene Jeboote felote, en hoole Mensche aeare Faeaschrefte."

¹⁴ Hee roopt daut Follkj no sikj, en saed to an: "Horcht aula no mie, en festot waut ekj saj.

¹⁵ Doa es nusscht waut fonn bute enn en Mensch enenn kjemt daut am feonnreinje kaun; oba waut ut en Mensch erut kjemt, doaderch woat hee Onnrein."

²¹ Dan fonn ut daut Mensche Hoat kome beese Jedanke, Hurarie, Deewerie, Mort,

²² Eehebruch, Jiets, Onnjerajchtichkjeit, Lest, losstje Jedanke, en beeset Uag, Lastre, Stollt, Dommheit;

²³ aul dise beese Dinje kome fonn benne, en moake en Mensch Onnrien.