Revised Common Lectionary (Semicontinuous)

⁵ Ọgbẹ́ mi ń rùn ó sì díbàjẹ́
    nítorí òmùgọ̀ mi.
⁶ Èmi ń jòwèrè, orí mi tẹ̀ ba gidigidi
    èmi ń ṣọ̀fọ̀ rìn kiri ní gbogbo ọjọ́.
⁷ Nítorí ẹ̀gbẹ́ mi kún fún ìgbóná tí ń jóni
    kò sì ṣí ibi yíyè ní ara mi,
⁸ Ara mi hù, a sì wó mi jẹ́gẹjẹ̀gẹ;
    mo kérora nítorí ìrúkèrúdò àyà mi.

⁹ Olúwa, gbogbo ìfẹ́ mi ń bẹ níwájú rẹ;
    ìmí ẹ̀dùn mi kò sápamọ́ fún ọ.
¹⁰ Àyà mi ń mí hẹlẹ, agbára mi yẹ̀ mí sílẹ̀;
    bí ó ṣe ti ìmọ́lẹ̀ ojú mi ni, ó ti lọ kúrò lára mi.
¹¹ Àwọn ọ̀rẹ́ mi àti àwọn ẹlẹgbẹ́ mi dúró lókèèrè réré kúrò níbi ìpọ́njú mi,
    àwọn alábágbé mi, dúró lókèèrè.
¹² Àwọn tí n wá ẹ̀mí mi dẹ okùn sílẹ̀ fún mi;
    àti àwọn tí ó fẹ́ pa mí lára ń sọ̀rọ̀ nípa ìparun,
    wọ́n sì ń gbèrò ẹ̀tàn ní gbogbo ọjọ́.

¹³ Ṣùgbọ́n mo dàbí adití odi, èmi kò gbọ́ ọ̀rọ̀;
    àti bí odi, tí kò le sọ̀rọ̀.
¹⁴ Nítòótọ́, mo rí bí ọkùnrin tí kò gbọ́rọ̀,
    àti bí ẹnu ẹni tí kò sí ìjiyàn.
¹⁵ Ṣùgbọ́n sí ọ Olúwa, ìwọ ni mo dúró dè;
    ìwọ ni, Olúwa Ọlọ́run mi, ẹni tí yóò dáhùn.
¹⁶ Nítorí tí mo gbàdúrà, “Gbóhùn mi, kí wọn má ba à yọ̀ mí;
    nígbà tí ẹsẹ̀ mi bá yọ̀ wọn yóò máa gbé ara wọn ga sí mi.”

¹⁷ Nítorí tí mo ti ṣetán láti ṣubú,
    ìrora mi sì wà pẹ̀lú mi nígbà gbogbo.
¹⁸ Mo jẹ́wọ́ ìrékọjá mi;
    àánú sì ṣe mí fún ẹ̀ṣẹ̀ mi.
¹⁹ Àwọn tí ó jẹ́ ọ̀tá mi láìnídìí pàtàkì, wọ́n lágbára púpọ̀,
    ọ̀pọ̀lọpọ̀ ni àwọn tí ó kórìíra mi lọ́nà òdì.
²⁰ Àwọn tí wọn ń fi ibi san rere fún mi
    àwọn ni ọ̀tá mi
    nítorí pé mò ń tọ ìre lẹ́yìn.

²¹ Má ṣe kọ̀ mí sílẹ̀, ìwọ Olúwa!
    Ọlọ́run mi, Má ṣe jìnnà sí mi.
²² Yára láti ràn mí lọ́wọ́,
    Olúwa, Olùgbàlà mi.

5 Rántí, Olúwa, ohun tí ó ṣẹlẹ̀ sí wa;
    wò ó, kí o sì rí ìtìjú wa.
² Àwọn ohun ìní wa ti di ti àlejò,
    ilé wa ti di ti àjèjì.
³ Àwa ti di aláìní òbí àti aláìní baba,
    àwọn ìyá wa ti di opó.
⁴ A gbọdọ̀ ra omi tí à ń mu;
    igi wa di títà fún wa.
⁵ Àwọn tí ó ń lé wa súnmọ́ wa;
    àárẹ̀ mú wa àwa kò sì rí ìsinmi.
⁶ Àwa jọ̀wọ́ ara wa fún Ejibiti àti Asiria
    láti rí oúnjẹ tó tó jẹ.
⁷ Àwọn baba wa ti ṣẹ̀, wọn kò sì ṣí mọ́,
    àwa sì ń ru ìjìyà ẹ̀ṣẹ̀ wọn.
⁸ Àwọn ẹrú ń jẹ ọba lórí wa,
    kò sì ṣí ẹni tí yóò gbà wá lọ́wọ́ wọn.
⁹ Àwa ń rí oúnjẹ wa nínú ewu ẹ̀mí wa
    nítorí idà tí ó wà ní aginjù.
¹⁰ Ẹran-ara wa gbóná bí ààrò,
    ebi sì yó wa bí àárẹ̀.
¹¹ Wọ́n ti fipá bá àwọn obìnrin wa lòpọ̀ ní Sioni,
    àti àwọn wúńdíá ti o wa ní ìlú Juda.
¹² Àwọn ọmọ ọbakùnrin ti di síso sókè ní ọwọ́ wọn;
    kò sí ìbọ̀wọ̀ fún àgbàgbà mọ́.
¹³ Àwọn ọ̀dọ́mọkùnrin wa ru òkúta;
    àwọn ọmọkùnrin sì ń ṣàárẹ̀ lábẹ́ ẹrù igi.
¹⁴ Àwọn àgbàgbà ti lọ kúrò ní ẹnu-bodè ìlú;
    àwọn ọ̀dọ́mọkùnrin sì dákẹ́ orin wọn
¹⁵ Ayọ̀ ti ṣáko ní ọkàn wa;
    ọ̀fọ̀ sì ti dúró bí ijó fún wa.
¹⁶ Adé ti ṣí kúrò ní orí wa
    ègbé ni fún wa, nítorí a ti ṣẹ̀.
¹⁷ Nítorí èyí, àárẹ̀ mú ọkàn wa,
    nítorí èyí, ojú wa sì ṣú.
¹⁸ Fún òkè Sioni tí ó ti di ahoro
    lórí rẹ̀ àwọn kọ̀lọ̀kọ̀lọ̀ sì ń rìn kiri.

¹⁹ Ìwọ, Olúwa, jẹ ọba títí láé;
    ìjọba rẹ dúró láti ìran kan dé ìran mìíràn.
²⁰ Kí ló dé tí o ń gbàgbé wa ní gbogbo ìgbà?
    Kí ló dé tí o fi kọ̀ wá sílẹ̀ fún ọjọ́ pípẹ́?
²¹ Mú wa padà sí ọ̀dọ̀ rẹ, Olúwa, kí àwa kí ó le padà;
    mú ọjọ́ wa di tuntun bí ìgbàanì
²² Àyàfi tí o bá ti kọ̀ wá sílẹ̀ pátápátá
    tí ìbínú rẹ sí wa sì kọjá ìwọ̀n.