Revised Common Lectionary (Semicontinuous)

“मोर मन ह परभू के बड़ई करत हवय;
⁴⁷     अऊ मोर आतमा ह मोर उद्धार करइया परमेसर म आनंद मनावत हवय,
⁴⁸ काबरकि ओह अपन दासी के दीन-हीन दसा ऊपर धियान दे हवय।
    अब ले जम्मो पीढ़ी के मनखेमन मोला धइन कहिहीं,
⁴⁹     काबरकि सामरथी परमेसर ह मोर बर बड़े-बड़े काम करे हवय –
    ओकर नांव पबितर ए।
⁵⁰ ओकर दया ओमन ऊपर,
    जऊन मन ओकर भय मानथें, पीढ़ी-पीढ़ी तक बने रहिथे।
⁵¹ ओह अपन हांथ ले बड़े-बड़े काम करे हवय;
    ओह ओमन ला तितिर-बितिर कर दे हवय, जऊन मन अपन मन म घमंड करथें।
⁵² ओह सक्तिसाली राजामन ला ओमन के सिंघासन ले उतार दे हवय,
    पर दीन-हीन मन ला ऊपर उठाय हवय।
⁵³ ओह भुखहा मनखेमन ला सुघर चीज ले भर दे हवय,
    पर धनवानमन ला जुछा हांथ निकार दे हवय।
⁵⁴ अपन दया ला सुरता करके,
    ओह अपन सेवक इसरायल के मदद करे हवय,
⁵⁵ जइसने ओह हमर पुरखामन ले कहे रिहिस कि ओह अब्राहम अऊ
    ओकर बंस ऊपर सदा-काल तक दया करही।”

⁶⁸ “इसरायल के परभू परमेसर के इस्तुति होवय,
    काबरकि ओह आय हवय अऊ अपन मनखेमन के उद्धार करे हवय।
⁶⁹ ओह अपन सेवक दाऊद के बंस म हमर बर एक
    सामरथी उद्धार करइया दे हवय,
⁷⁰ (जइसने ओह अपन पबितर अगमजानीमन के दुवारा बहुंत पहिली ले कहत आय हवय),
⁷¹ कि ओह हमर बईरीमन ले अऊ जऊन मन हमन ले घिन करथें,
    ओमन ले हमन ला बचाही।
⁷² ओह हमर पुरखामन ऊपर दया करही
    अऊ अपन पबितर करार ला सुरता करही।
⁷³     ओह किरिया खाके हमर पुरखा अब्राहम ले कहे रिहिस:
⁷⁴ कि ओह हमन ला हमर बईरीमन के हांथ ले बचाही,
⁷⁵ ताकि हमन निडर होके जिनगी भर पबितर अऊ धरमी बनके ओकर आघू म ओकर सेवा कर सकन।