Revised Common Lectionary (Semicontinuous)

दाऊद क वाद्य यंत्र क संग एक ठु गीत।

मूसा आपन मनइयन क मदद करत ह

¹¹ मूसा बाढ़ि गवा अउ जवान होइ गवा। उ परखेस कि उ ओकर आपन लोग अहइ हिब्रू मनई ओनका जियादा कठोर काम करइ बरे मजबूर करत हीं। एक दिना मूसा लखेस कि एक मिस्री हिब्रू मनई क पीटत रहा। ¹² मूसा चारिहु कइँती निहारेस अउ देखेस कि कउनो नाहीं ताड़त बा। तबहिं मूसा मिस्री मनई क मारि डाएस अउ ओहका रेत मँ दाब दिहेस।

¹³ पाछे क दिन मँ मूसा दुइ हिब्रू मनइयन क लड़त भिड़त लखेस। मूसा निहारेस कि एक मनई क गलती रही। मूसा उ मनई स कहेस, “तू आपन पड़ोसी क काहे मारत बाट्या?”

¹⁴ उ मनई जवाब दिहेस, “का कउनो मनई तोहका हमार हाकिम अउ निआवधीस, नियुक्त किहेस ह? नाहीं! मोका बतावा कि का तू मोका भी उहइ तरह मारि डउब्या जउने तरह तू बीता भवा काल्ह मिस्री क मारि डाया। तब मूसा डेराइ गवा।”

मूसा मन मँ बिचारेस, “अब हरेक मनई जानत ह कि मइँ का किहेउँ ह।”

¹⁵ फिरौन सुनेस कि मूसा का किहेस, तउ उ मूसा क मारि डावइ क पक्का बिचार बनाएस। मुला मूसा फिरौन क कुचाल स भाग गवा। फिन मूसा मिदियन देस मँ चला गवा।

मूसा मिदियान देस मँ

मूसा मिदियन देस मँ कुआँ क लगे रूकि गवा। ¹⁶ हुवाँ एक ठु याजक मिदियन मँ रहा जेकरे सात बिटिया रहिन। उ पचे आपन बाप क भे़डिन बरे कुआँ स पानी निकालइ बरे गएन। उ पचे पानी स कठौते क भरइ क कोसिस करत रहिन। ¹⁷ मुला कछू गड़रियन उ बिटियन क भगाइ दिहन अउ पानी नाहीं भरइ दिहन। तब मूसा बिटियन क मदद किहेस अउ ओनके जनावर क पानी दिहस।

¹⁸ तब उ पचे आपन बाप रूएल क लगे गइन। ओनकइ बाप ओनसे पूछेस, “आज तू पचे काहे हाली घरे आइ गइउ?”

¹⁹ बिटियन जवाब दिहेन, “हाँ, पिता जी। गड़रिया लोग हमका खदेरइ क कोसिस किहेन, मुला एक मिस्री मनई हमार मदद करेस। उ हमका बरे इनारा स पानी निकारेस अउ हमरे जनावर क पानी दिहेस।”

²⁰ ऍह बरे रूएल आपन बिटियन स कहेस, “इ मनई कहाँ बाटइ? तू पचे ओका काहे छाँड़ि दिहा? ओका हिआँ बोलावा इ तरह हम पचन क संग खाइ सकत ह।”

²¹ मूसा उ मनई क संग टिक जाइ स खुस भवा। याजक रूएल आपन बिटिया सिप्पोरा क मूसा क बिहई क तरह दिहेस। ²² सिप्पोरा एक बेटवा क जन्मेस। मूसा आपन बेटवा क नाउँ गेसोर्म राखेस। मूसा आपन बेटवा क इ नाउँ इ कहत भए दिहस: “मइँ एक अजनबी देस मँ अजनबी होई गवा।”

यहोवा इस्राएल क मदद बरे मन मँ ठानेस

²³ बहोत समइ बीते प मिस्र क राजा मरि गवा। काहेकि इस्राएलियन क कठिन काम करइ बरे मजबूर कीन्ह जात रहेन। ऍह बरे उ पचे मदद बरे परमेस्सर क गोहराएन अउर यहोवा ओनका पराथना सुनि लिहेस। ²⁴ यहोवा ओनकइ पराथना सुनेस अउ उ करार क याद किहेस जउन उ इब्राहीम, इसहाक अउ याकूब क संग किहेस। ²⁵ यहोवा इस्राएलियन क कस्ट निहारेस अउ उ सोचेस कि उ ओनकइ मदद तुरंतहि करी।

²⁷ बिसवास क कारण ही, राजा क क्रोध स न डरत भए उ मिस्र क परित्याग कइ दिहेस। उ डटा रहा, मान ओका अदृस्य परमेस्सर देखात अहइ। ²⁸ बिसवास स ही, उ फसह क त्यौहार अउर लहू छिड़कइ क पालन किहेस, ताकि पहिलौठा क बिनास करइवाला इस्राएल क पहिलौठा क छू तक न पावइ।