Revised Common Lectionary (Semicontinuous)

⁵ Jwiˈl Kakaj Dios taˈ ni jun bˈwelt xij chirij jono rechak yak anjl jilonri:
    At, atiˈ Incˈajol, iniˈ xinalcˈwalan awe lajori, taˈ xcheˈ re. Y taˈ xij chirij jono anjl jilonri:
    Inna ocna pi Jkaj y re tina ocna pi Incˈajol, taˈ xcheˈ chirij. ⁶ Pero Kakaj Dios cuando xtakch Jcˈajol wich ulew ri nabˈeal, xijiˈn:
    Nimirsajok jkˈij jwiˈlak juntir yak ranjl Kakaj Dios, xcheˈ. ⁷ Kakaj Dios xij chirijak yak ranjl jilonri:
    Tranaˈ re yak ranjl chi tiwuxtak chapcaˈ tew y yak jtakoˈn chapcaˈ jxaktak kˈakˈ chi jbˈanic lawiˈ raj re trantak, xcheˈ. ⁸ Pero re Jcˈajol xijiˈ jilonri:
    Akˈatbˈitzij, at Dios, taˈ jsachic jwich y akˈatbˈitzij riˈ jun kˈatbˈitzij ri kes pi jcholajl.
⁹     Riˈ mas tibˈe il awiˈl jbˈanic lawiˈ kes pi jcholajl y xutuliˈ awiˈl lawiˈ ri mitaˈ tzi.
    Jilonli in xatinchaˈ ri in aDios, xinyeˈ subˈlaj quiˈcotemal chawe chiwchak yak apach.
¹⁰     At Kajawl, cuando xcholmajch jwich kˈijsak xabˈan caj pach ulew, juntir li xabˈan laˈ acwinel.
¹¹     Caj pach ulew tina tawna jun kˈij tisaach jwichak, pero at taˈ tisaach awch.
    Caj pach ulew tranaˈ chapcaˈ jun itzˈik titzayabˈc.
¹²     Tabˈusaˈ jwichak chapcaˈ jbˈusic jwich jun itzˈik.
    Caj pach ulew taqˈuexaˈ chapcaˈ jun cristian tijqˈuex ritzˈik.
    Pero at taˈ atqˈuexmajc y acˈaslemal taˈ jqˈuisic, xcheˈ Kakaj Dios.

¹³ Kakaj Dios taˈ ni jun bˈwelt xij chirij jono rechak yak anjl jilonri:
    Cubˈren laj impaach asta tina injachtakna laj akˈbˈ juntir yak ri atcontrinc, taˈ xcheˈ.