Revised Common Lectionary (Semicontinuous)

ئەی گیانی من ستایشی یەزدان بکە.

² هەتا لە ژیاندام ستایشی یەزدان دەکەم،
    هەتا ماوم مۆسیقا بۆ خودای خۆم دەژەنم.
³ نە پشت بە میرەکان ببەستن،
    نە بە ئادەمیزاد کە ڕزگارییان لەلا نییە.
⁴ کە ڕۆحی دەرچوو بۆ خۆڵەکەی خۆی دەگەڕێتەوە،
    لە هەمان ڕۆژدا نەخشەکانی دەسڕێتەوە.
⁵ خۆزگە دەخوازرێ بەو کەسەی کە خودای یاقوب یارمەتیدەری بێت و
    هیوای بە یەزدانی پەروەردگاری خۆی بێت،
⁶ دروستکەری ئاسمان و زەوی و
    دەریا و هەموو ئەوەی کە تێیاندایە،
    ئەوەی هەتاهەتایە دڵسۆز دەمێنێتەوە.
⁷ دادپەروەری بۆ زۆرلێکراوان بەڕێوە دەبات،
    نان دەداتە برسییەکان.
یەزدان گیراوەکان ئازاد دەکات،
⁸     یەزدان چاوی کوێرەکان دەکاتەوە،
یەزدان کەسە چەماوەکان ڕاست دەکاتەوە،
    یەزدان ڕاستودروستانی خۆشدەوێت.
⁹ یەزدان نامۆکان دەپارێزێت،
یارمەتی هەتیو و بێوەژنان دەدات،
    بەڵام ڕێگای بەدکاران خوار دەکات.

¹⁰ یەزدان هەتاهەتایە پاشایەتی دەکات،
    ئەی سییۆن، ئەو خودای تۆیە بۆ هەموو نەوەکانت.

هەلیلویا.

¹⁴ «زۆر دەمێکە کپ بووم،
    بێدەنگ بووم و دانم بە خۆمدا گرت.
بەڵام ئێستا وەک ژنێک کە منداڵی ببێت دەقیژێنم،
    هەناسە دەدەم و هەناسە هەڵدەکێشم پێکەوە.
¹⁵ چیا و گردەکان تێکدەدەم،
    هەموو گیاوگوڵیان وشک دەکەم.
ڕووبار دەکەمە دوورگە و
    گۆلاوەکان وشک دەکەم.
¹⁶ نابیناکان بە ڕێگایەکدا دەبەم شارەزای نەبن،
    بە ڕێچکەیەکدا هاتوچۆیان پێ دەکەم کە نایزانن،
تاریکی لەبەردەمیاندا دەکەم بە ڕووناکی،
    ڕێگا خوارەکانیش بە ڕاستە ڕێ.
ئەم شتانە دەکەم و
    بەجێیان ناهێڵم.
¹⁷ بەڵام ئەوانەی پشت بە بتی داڕێژراو دەبەستن،
    ئەوانەی بە پەیکەری داتاشراو دەڵێن، ”ئێوە خوداوەندی ئێمەن،“
    بەرەو دواوە دەگەڕێنەوە و بە تەواوی شەرمەزار دەبن.