Revised Common Lectionary (Semicontinuous)

Ekitiibwa kyo kitenderezebwa
    okutuuka waggulu mu ggulu.
^2 (B)Abaana abato n’abawere
    wabawa amaanyi okukutendereza;
ne basirisa omulabe wo
    n’oyo ayagala okwesasuza.
^3 (C)Bwe ntunuulira eggulu lyo,
    omulimu gw’engalo zo,
omwezi n’emmunyeenye
    bye watonda;
^4 (D)omuntu kye ki ggwe okumujjukira,
    omuntu obuntu ggwe okumussaako omwoyo?

^5 (E)Kubanga wamukola n’abulako katono okuba nga Katonda;
    n’omussaako engule ey’obukulu n’ekitiibwa.
^6 (F)Wamukwasa okufuga ebintu byonna bye wakola n’emikono gyo:
    byonna wabissa wansi w’ebigere bye,
⁷ ebisibo n’amagana ag’ebisolo byonna eby’omu nsiko,
⁸ n’ennyonyi ez’omu bbanga,
    n’ebyennyanja eby’omu nnyanja;
    era na buli kiramu kyonna ekiyita mu nnyanja.

^9 (G)Ayi Mukama, Mukama waffe, erinnya lyo nga ddungi
    era kkulu nnyo mu nsi yonna!

^22 (A)“Wali oyingidde amazzi agakwata mu butiti, gye gaterekebwa,
    oba wali olabye omuzira gye guterekebwa?
^23 (B)Bye nterekera ebiseera eby’emitawaana,
    bikozesebwe mu nnaku ez’entalo n’okulwana?
²⁴ Kkubo ki erituusa ekitangaala ky’omusana gye kisaasaanira,
    oba empewo ey’ebuvanjuba gy’esaasaanira ku nsi?
^25 (C)Ani akubira amataba emikutu mwe ganaayita,
    oba ekkubo eggulu eribwatuka mwe liyita?
^26 (D)Ani atonnyesa enkuba mu nsi abantu mwe batabeera,
    eddungu omutali muntu yenna,
^27 (E)n’okufukirira ettaka eryalekebwa awo, eryazika,
    n’okulimezaako omuddo?
^28 (F)Enkuba erina kitaawe waayo?
    Ani azaala amatondo ag’omusulo?
^29 (G)Omuzira guva mu lubuto lw’ani?
    Ani azaala obutiti obukwafu obw’omu ggulu,
^30 (H)amazzi mwe gakwatira ne gakaluba ng’amayinja,
    ne kungulu kw’obuziba ne kukwata?

^31 (I)“Oyinza okuziyiza okwakaayakana kwa Kakaaga,
    oba okutaggulula enkoba za Ntungalugoye?
³² Oyinza okufulumya emunyeenye ziveeyo zaake ng’ekiseera kyazo kituuse,
    oba okuluŋŋamya eddubu n’abaana balyo?
^33 (J)Omanyi amateeka n’obufuzi bw’eggulu?
    Oyinza okuteekawo obufuzi bw’alyo oba obwa Katonda ku nsi?

^34 (K)“Oyinza okuyimusa eddoboozi lyo oleekaanire ebire,
    olyoke obiggyemu amataba gakubikke?
^35 (L)Ggwe otuma eggulu limyanse era libwatuke?
    Lisobola okukweyanjulira nti, ‘Tuutuno tuli wano’?
^36 (M)Ani eyateeka amagezi mu mutima gw’omuntu,
    oba eyateeka okutegeera mu mmeeme?
³⁷ Ani alina amagezi agabala ebire?
    Ani ayinza okuwunzika ebibya by’amazzi eby’omu ggulu,
³⁸ enfuufu ng’efuuse ettaka ekkalu,
    era amafunfugu ne geegattira ddala?