Revised Common Lectionary (Semicontinuous)

⁶ Deus in medio ejus, non commovebitur; adjuvabit eam Deus mane diluculo.

⁷ Conturbatae sunt gentes, et inclinata sunt regna: dedit vocem suam, mota est terra.

⁸ Dominus virtutum nobiscum; susceptor noster Deus Jacob.

⁹ Venite, et videte opera Domini, quae posuit prodigia super terram,

¹⁰ auferens bella usque ad finem terrae. Arcum conteret, et confringet arma, et scuta comburet igni.

¹¹ Vacate, et videte quoniam ego sum Deus; exaltabor in gentibus, et exaltabor in terra.

¹² Dominus virtutum nobiscum; susceptor noster Deus Jacob.

3 Et dixit Dominus ad me: Adhuc vade, et dilige mulierem dilectam amico et adulteram, sicut diligit Dominus filios Israel, et ipsi respiciunt ad deos alienos, et diligunt vinacia uvarum.

² Et fodi eam mihi quindecim argenteis, et coro hordei, et dimidio coro hordaei.

³ Et dixi ad eam: Dies multos exspectabis me; non fornicaberis, et non eris viro; sed et ego exspectabo te.

⁴ Quia dies multos sedebunt filii Israel sine rege, et sine principe, et sine sacrificio, et sine altari, et sine ephod, et sine theraphim.

⁵ Et post haec revertentur filii Israel, et quaerent Dominum Deum suum, et David regem suum: et pavebunt ad Dominum, et ad bonum ejus, in novissimo dierum.

²³ Ego autem testem Deum invoco in animam meam, quod parcens vobis, non veni ultra Corinthum: non quia dominamur fidei vestae, sed adjutores sumus gaudii vestri: nam fide statis.

2 Statui autem hoc ipsum apud me, ne iterum in tristitia venirem ad vos.

² Si enim ego contristo vos: et quis est, qui me laetificet, nisi qui contristatur ex me?

³ Et hoc ipsum scripsi vobis, ut non cum venero, tristitiam super tristitiam habeam, de quibus oportuerat me gaudere: confidens in omnibus vobis, quia meum gaudium, omnium vestrum est.

⁴ Nam ex multa tribulatione et angustia cordis scripsi vobis per multas lacrimas: non ut contristemini, sed ut sciatis, quam caritatem habeam abundantius in vobis.

⁵ Si quis autem contristavit, non me contristavit: sed ex parte, ut non onerem omnes vos.

⁶ Sufficit illi, qui ejusmodi est, objurgatio haec, quae fit a pluribus:

⁷ ita ut e contrario magis donetis, et consolemini, ne forte abundantiori tristitia absorbeatur qui ejusmodi est.

⁸ Propter quod obsecro vos, ut confirmetis in illum caritatem.

⁹ Ideo enim et scripsi, ut cognoscam experimentum vestrum, an in omnibus obedientes sitis.

¹⁰ Cui autem aliquid donastis, et ego: nam et ego quod donavi, si quid donavi, propter vos in persona Christi,

¹¹ ut non circumveniamur a Satana: non enim ignoramus cogitationes ejus.