Revised Common Lectionary (Semicontinuous)

148 Alleluja. Laudate Dominum de caelis; laudate eum in excelsis.

² Laudate eum, omnes angeli ejus; laudate eum, omnes virtutes ejus.

³ Laudate eum, sol et luna; laudate eum, omnes stellae et lumen.

⁴ Laudate eum, caeli caelorum; et aquae omnes quae super caelos sunt,

⁵ laudent nomen Domini. Quia ipse dixit, et facta sunt; ipse mandavit, et creata sunt.

⁶ Statuit ea in aeternum, et in saeculum saeculi; praeceptum posuit, et non praeteribit.

⁷ Laudate Dominum de terra, dracones et omnes abyssi;

⁸ ignis, grando, nix, glacies, spiritus procellarum, quae faciunt verbum ejus;

⁹ montes, et omnes colles; ligna fructifera, et omnes cedri;

¹⁰ bestiae, et universa pecora; serpentes, et volucres pennatae;

¹¹ reges terrae et omnes populi; principes et omnes judices terrae;

¹² juvenes et virgines; senes cum junioribus, laudent nomen Domini:

¹³ quia exaltatum est nomen ejus solius.

¹⁴ Confessio ejus super caelum et terram; et exaltavit cornu populi sui. Hymnus omnibus sanctis ejus; filiis Israel, populo appropinquanti sibi. Alleluja.

¹⁸ Qui ait: Ostende mihi gloriam tuam.

¹⁹ Respondit: Ego ostendam omne bonum tibi, et vocabo in nomine Domini coram te: et miserebor cui voluero, et clemens ero in quem mihi placuerit.

²⁰ Rursumque ait: Non poteris videre faciem meam: non enim videbit me homo et vivet.

²¹ Et iterum: Ecce, inquit, est locus apud me, et stabis supra petram.

²² Cumque transibit gloria mea, ponam te in foramine petrae, et protegam dextera mea, donec transeam:

²³ tollamque manum meam, et videbis posteriora mea: faciem autem meam videre non poteris.

1 Quod fuit ab initio, quod audivimus, quod vidimus oculis nostris, quod perspeximus, et manus nostrae contrectaverunt de verbo vitae:

² et vita manifestata est, et vidimus, et testamur, et annuntiamus vobis vitam aeternam, quae erat apud Patrem, et apparuit nobis:

³ quod vidimus et audivimus, annuntiamus vobis, ut et vos societatem habeatis nobiscum, et societas nostra sit cum Patre, et cum Filio ejus Jesu Christo.

⁴ Et haec scribimus vobis ut gaudeatis, et gaudium vestrum sit plenum.

⁵ Et haec est annuntiatio, quam audivimus ab eo, et annuntiamus vobis: quoniam Deus lux est, et tenebrae in eo non sunt ullae.

⁶ Si dixerimus quoniam societatem habemus cum eo, et in tenebris ambulamus, mentimur, et veritatem non facimus.

⁷ Si autem in luce ambulamus sicut et ipse est in luce, societatem habemus ad invicem, et sanguis Jesu Christi, Filii ejus, emundat nos ab omni peccato.

⁸ Si dixerimus quoniam peccatum non habemus, ipsi nos seducimus, et veritas in nobis non est.

⁹ Si confiteamur peccata nostra: fidelis est, et justus, ut remittat nobis peccata nostra, et emundet nos ab omni iniquitate.