Revised Common Lectionary (Semicontinuous)

114 இஸ்ரவேல் எகிப்தை விட்டு நீங்கினான்.
    யாக்கோபு அந்நிய நாட்டை விட்டுச் சென்றான்.
² யூதா தேவனுக்கு விஷேசமான ஜனங்களானார்கள்.
    இஸ்ரவேல் அவருடைய இராஜ்யமானது.
³ செங்கடல் இதைக்கண்டு விலகி ஓடிற்று.
    யோர்தான் நதியோ திரும்பி ஓடிப்போயிற்று.
⁴ ஆட்டுக்கடாக்களைப்போல் மலைகள் நடனமாடின.
    ஆட்டுக்குட்டிகளைப் போல் மலைகள் நடனமாடின.
⁵ செங்கடலே, நீ ஏன் ஓடிப்போனாய்?
    யோர்தான் நதியே, நீ ஏன் திரும்பி ஓடிப் போனாய்?
⁶ மலைகளே, நீங்கள் ஏன் ஆட்டுக் கடாக்களைப்போல் நடனமாடினீர்கள்?
    மலைகளே, நீங்களும் ஏன் ஆட்டுக் குட்டிகளைப்போல் நடனமாடினீர்கள்?
⁷ யாக்கோபின் தேவனும் கர்த்தருமாகிய ஆண்டவருக்கு முன்னே
    பூமி நடுங்கி அதிர்ந்தது.
⁸ கன்மலையிலிருந்து தண்ணீர் பெருகி ஓடச் செய்தவர் தேவனேயாவார்.
    கெட்டியான பாறையிலிருந்து நீரூற்றின் வெள்ளத்தைப் பாய்ந்தோடச் செய்தவர் தேவனேயாவார்.

² “நான் மிக மோசமான துன்பத்தில் இருந்தேன்.
    நான் உதவிக்காகக் கர்த்தரை வேண்டினேன்.
    அவர் எனக்குப் பதில் கொடுத்தார்.
நான் பாதாளத்தின் ஆழத்தில் இருந்தேன்.
    கர்த்தாவே, நான் உம்மிடம் கதறினேன்.
    நீர் எனது குரலைக் கேட்டீர்.

³ “நீர் என்னைக் கடலுக்குள் எறிந்தீர்.
    உமது வல்லமையுடைய அலைகள் என்மேல் வீசின.
நான் கடலுக்குள் மேலும் மேலும் ஆழத்திற்குள் சென்றேன்.
    என்னைச் சுற்றிலும் தண்ணீர் இருந்தது.
⁴ பிறகு நான் நினைத்தேன், ‘இப்போது நான் உம் பார்வையிலிருந்து விரட்டியடிக்கப்பட்டுள்ளேன்.’
    ஆனால், நான் தொடர்ந்து உதவிக்காக உமது பரிசுத்த ஆலயத்தையே பார்த்துக்கொண்டிருந்தேன்.

⁵ “கடல் தண்ணீர் என்னை மூடியது.
    தண்ணீரானது எனது வாயை நிறைத்தது.
    என்னால் சுவாசிக்க முடியவில்லை.
நான் கடலுக்குள் மேலும் மேலும் ஆழமாகச் சென்றேன்.
    கடற்பாசி என் தலையைச் சுற்றிக்கொண்டது.
⁶ நான் மலைகள் துவங்குகிற கடலின் ஆழத்திற்குச் சென்றேன்.
    நான் இந்தச் சிறைக்குள் என்றென்றும் இருப்பேனோ என்று நினைத்தேன்.
ஆனால் எனது கல்லறையிலிருந்து என்னை என் தேவனாகிய கர்த்தர் மீட்டார்.
    தேவனே, நீர் எனக்கு மீண்டும் உயிர்கொடுத்தீர்.

⁷ “எனது ஆத்துமா எல்லா நம்பிக்கையையும் இழந்தது.
    ஆனால், பிறகு நான் கர்த்தரை நினைத்தேன்.
கர்த்தாவே, நான் உம்மிடம் ஜெபம் செய்தேன்,
    நீர் உமது பரிசுத்தமான ஆலயத்திலிருந்து எனது ஜெபத்தைக் கேட்டீர்.

⁸ “சிலர் பயனற்ற விக்கிரகங்களை தொழுகின்றார்கள்.
    ஆனால், அந்தச் சிலைகள் அவர்களுக்கு உதவுவதில்லை.
⁹ கர்த்தர் ஒருவரிடமிருந்தே இரட்சிப்பு வருகிறது.
    கர்த்தாவே, நான் உமக்குப் பலிகளை கொடுப்பேன்.
நான் உம்மைத் துதித்து, உமக்கு நன்றி சொல்வேன். நான் உம்மிடம் சிறப்பு வாக்குறுதிகளைச் செய்வேன்,
    நான் வாக்குறுதிப்படி செய்வேன்” என்றான்.