Revised Common Lectionary (Semicontinuous)

51 In finem. Intellectus David,

² cum venit Doeg Idumaeus, et nuntiavit Sauli: Venit David in domum Achimelech.

³ Quid gloriaris in malitia, qui potens es in iniquitate?

⁴ Tota die injustitiam cogitavit lingua tua; sicut novacula acuta fecisti dolum.

⁵ Dilexisti malitiam super benignitatem; iniquitatem magis quam loqui aequitatem.

⁶ Dilexisti omnia verba praecipitationis; lingua dolosa.

⁷ Propterea Deus destruet te in finem; evellet te, et emigrabit te de tabernaculo tuo, et radicem tuam de terra viventium.

⁸ Videbunt justi, et timebunt; et super eum ridebunt, et dicent:

⁹ Ecce homo qui non posuit Deum adjutorem suum; sed speravit in multitudine divitiarum suarum, et praevaluit in vanitate sua.

¹⁰ Ego autem, sicut oliva fructifera in domo Dei; speravi in misericordia Dei, in aeternum et in saeculum saeculi.

¹¹ Confitebor tibi in saeculum, quia fecisti; et exspectabo nomen tuum, quoniam bonum est in conspectu sanctorum tuorum.

3 Et factum est verbum Domini ad Jonam secundo, dicens:

² Surge, et vade in Niniven, civitatem magnam, et praedica in ea praedicationem quam ego loquor ad te.

³ Et surrexit Jonas, et abiit in Niniven juxta verbum Domini: et Ninive erat civitas magna, itinere trium dierum.

⁴ Et coepit Jonas introire in civitatem itinere diei unius: et clamavit, et dixit: Adhuc quadraginta dies, et Ninive subvertetur.

⁵ Et crediderunt viri Ninivitae in Deum, et praedicaverunt jejunium, et vestiti sunt saccis, a majore usque ad minorem.

⁶ Et pervenit verbum ad regem Ninive: et surrexit de solio suo, et abjecit vestimentum suum a se, et indutus est sacco, et sedit in cinere.

⁷ Et clamavit, et dixit in Ninive ex ore regis et principum ejus, dicens: Homines, et jumenta, et boves, et pecora non gustent quidquam: nec pascantur, et aquam non bibant.

⁸ Et operiantur saccis homines et jumenta, et clament ad Dominum in fortitudine: et convertatur vir a via sua mala, et ab iniquitate quae est in manibus eorum.

⁹ Quis scit si convertatur et ignoscat Deus, et revertatur a furore irae suae, et non peribimus?

¹⁰ Et vidit Deus opera eorum, quia conversi sunt de via sua mala: et misertus est Deus super malitiam quam locutus fuerat ut faceret eis, et non fecit.

1 Paulus, servus Jesu Christi, vocatus Apostolus, segregatus in Evangelium Dei,

² quod ante promiserat per prophetas suos in Scripturis sanctis

³ de Filio suo, qui factus est ei ex semine David secundum carnem,

⁴ qui praedestinatus est Filius Dei in virtute secundum spiritum sanctificationis ex resurrectione mortuorum Jesu Christi Domini nostri:

⁵ per quem accepimus gratiam, et apostolatum ad obediendum fidei in omnibus gentibus pro nomine ejus,

⁶ in quibus estis et vos vocati Jesu Christi:

⁷ omnibus qui sunt Romae, dilectis Dei, vocatis sanctis. Gratia vobis, et pax a Deo Patre nostro, et Domino Jesu Christo.