Revised Common Lectionary (Semicontinuous)

⁴⁶ Quemaj Jesús ocsejpa ohuajlaj ne Caná campa on atl oquicuepca vino. Ompa nemiya se hueyixticaj itequitcau on rey, yejhuan ne ipan on hueyican Capernaum quipiaya se iconeu cualohuaya. ⁴⁷ Ijcuac on hueyixticaj tequitquetl oquimat ica Jesús ohuaquis ne Judea niman ica yoyejcoc Galilea, oyaj oquitato niman oquicnotlajtlanilij para ma huiya ichan niman ma quipajti iconeu yejhuan ye micticatca. ⁴⁸ Quemaj Jesús oquijlij:

―Nemejhuamej xnentlaneltocaj tla xnenquitaj tlamajhuisoltin niman milagros.

⁴⁹ Pero on hueyixticaj tequitquetl oquijlij:

―Señor, nimantzin xhuajla antes miquis noconeu.

⁵⁰ Niman Jesús oquijlij:

―Xhuiya mochan. Moconeu xmiquis.

On tlacatl oquineltocac tlinon Jesús oquijlij, niman oyaj. ⁵¹ Ijcuac ye ajsiticatca ichan on itequitcahuan oquinamiquitoj niman oquijlijquej:

―Moconeu yopajtic.

⁵² Quemaj oquintlajtoltij tlen hora opeu pajtitiu iconeu, niman oquijlijquej:

―Yalohua ipan la una ijcuac tiotlac ocau on totonqui.

⁵³ Ijcuacon on tajtli oquelnamic ica sa no ipan on hora ijcuacon ijcuac Jesús oquijlij: “Moconeu xmiquis.” Yejhua ica, tej, ihuan nochi ichanchanejcahuan oquineltocaquej Jesús.

⁵⁴ In yejhua ica ome milagro oquichiu Jesús ijcuac ohuajquis ne Judea niman oyaj ne Galilea.