Revised Common Lectionary (Complementary)

Dee 20 Psalm

To dän haupt Musikaunt, en Psalm fonn Doft.

¹ Mucht dee Herr Gott die auntwuate enn dän Dach fonn dien Trubbel; un däm Joakopp sien Gott die nehejcht häwe.

² Un die Help schekje fonn daut Aundachts Hus, un die bestädje enn Zion.

³ Hee woat aul dien Opfa behoole, un diene Brauntopfa aun näme. Selah.

⁴ Hee woat die doano jäwe aus dien Hoat Janke es, un aul diene Plone erfelle.

⁵ Wie woare onns freihe enn diene Radunk, un wie woare ne Flag oppstale enn onns Gott sien Nome; mucht dee Herr Gott aul diene Jebäde erfelle.

⁶ Nu weet ekj daut dee Herr Gott sien Ennjesaulwda rade deit; hee woat fonn sien Heilje Himel auntwuate met dee Radende Macht fonn siene rajchte Haunt.

⁷ Eenje fetruehe enn Kjrijchswoages, un eenje enn Pead, oba wie woare däm Herr Gott onns Gott sien Nome behoole.

⁸ Dee sent dol jeboage en sent dol jefolle, oba wie sent oppjestone un stone opprajcht.

⁹ Rad, O Herr Gott! Dee Kjeenijch woat onns auntwuate enn dän Dach wan wie am aunroope.

⁴¹ Aus hee dichtbie kjeem, sach hee dee Staut, en hield doa aewa,

⁴² en saed: "Wan du enn dis Dach wist, - jo du! waut fa die Fraed wea; oba nu eset fonn diene Uage festoake;

⁴³ dan de Tiet woat opp die kome daut diene Fiend woare ne Waunt omm die romm buhe, en die runt omm aun aule Siede ommfange, en aun aule Siede prasse,

⁴⁴ en woare die en diene Kjinje oppe Ead schmiete, en woare enn die nich een Steen oppem aundre lote, wiel du nich de Tiet kjansd aus de Herr die beseakje deed."