Revised Common Lectionary (Complementary)

Dee 80 Psalm

To dän Haupr Musikaunt, wäajen dee Lelje. En Psalm von Asaf.

¹ O Iesrael äa Schop Hoad, Du, dee Du Joosef leide deist soo aus ne Häad; dee Du tweschen dee Cherubim wonst, doo schiene.

² Doo diene Macht bewäaje fer Efraim, en Benjamin, un Manasse, un komm doo onns rade.

³ O Gott, doo onns wada trigj dreihe, lot dien Jesejcht schiene; dan woa wie jerat woare.

⁴ O Aulmajchtja Herr Gott, woo lang woascht du noch oajalijch senne jäajen daut Jebaed fonn dien Folkj?

⁵ Du deetst an foodre met daut Broot fonn Trone, un du jeefst an Trone to drinkje.

⁶ Du hast onns en Striet jemoakt to onnse Nobasch; un onnse Fiend lache to sikj selfst.

⁷ O Aulmajchtja Gott, doo onns wada trigj dreihe, un lot dien Jesejcht schiene, un wie woare jerat senne.

¹⁷ Lot diene Haunt opp däm Maun senne fonn diene rajchte Haunt; opp däm Menschesän dän Du stoakj jemoakt hast fa die selfst.

¹⁸ Dan woa wie nijch fonn die trigj wajch dreihe; jeff onns niehet Läwe, un wie woare dien Nome aunroope.

¹⁹ Brinj onns trigj, O Aulmajchtja Herr Gott; lot dien Jesejcht schiene, un wie woare jerat senne.

²³ Oba fer daem daut Gloowe kjeem, wea wie aula bewoat, enjeschlote enn daut Jesats fa daen Gloowe dee em korte jeoppenboat sull woare.

²⁴ Aulso es daut Jesats onns Leara jeworde, no Christus han, daut wie kunne jerachtfoadicht woare derch daen Gloowe.

²⁵ Oba nu daut dee Gloowe jekome es, se wie nich meeha unja daem Leara.

²⁶ Dan wie sent aula Gott siene Kjinja derch daen Gloowe enn Christus Jesus.

²⁷ Dan waea emma enn Jesus Christus enenn jetauft es, haft Christus aunjetrokke.

²⁸ Nu kaun doa nich meeha en Jud oda en Jrieche senne, nich meeha en Sklow oda eena dee frie es, doa kaun nich meeha Maun oda Fru senne, dan jie sent aula eent enn Christus Jesus.

²⁹ En wan jie Christus aunjeheare, dan sent jie uk Obraum sien Some, en Oaw no daut Fespraeakje.