Revised Common Lectionary (Complementary)

⁵ Jesäajent es dee, dee Joakopp sien Gott haft to Help; sien Fetruehe es enn däm Herr Gott, sien Gott;

⁶ Dee de Himmels un dee Ead jemoakt haft, dän See, un aules daut doabenne es; dee Woarheit bewoat fa emma;

⁷ Dee Jerejcht towäaj brinjt fa dän dee bedrekjt sent; dee Äte jeft to dee hungrije; un deit dee Jefangne frie moake;

⁸ Dee Herr Gott moakt dee Blinje äare Uage op; dee Herr Gott häft dän opp dee dol jeboage sent; dee Herr Gott haft dee Jerajchte leef;

⁹ Dee Herr Gott bewoat dee framde; Hee moakt dee Weisekjinje un Wätfruhes äare Laust leijchta; oba Hee deit dee Beese äa Wajch feschmiete.

¹⁰ Dee Herr Gott woat fa emma rejeare; O Zion, dien Gott fonn Jennerazion no Jennerazion. Preis däm Herr Gott.

⁴⁶ En Marie saed: "Miene Seel feharlicht daem Herr!

⁴⁷ en mien Jeist freit sikj en Gott mien Heilaunt.

⁴⁸ Dan hee haft mie, sien Deenstmaeakje enn miene Jerinjheit aunjeseene; dan fonn nu aun woare aule Jeschlajchte mie jesaeajent nanne.

⁴⁹ Dee Aulmajchtja haft groote Dinje aun mie jedone. Sien Nome es heilich.

⁵⁰ En sien Erboarme woat fa emma bliewe opp daen, dee am ferchte.

⁵¹ Hee haft sien stoakja Oarm bewaese, hee haft dee stollte festreit dee sikj enn aea Senn huach dochte.

⁵² Hee haft Harscha fonn Trone doljeraete, en haft dee deemuetje nehecht jestalt.

⁵³ Hee haft de Hungrije met Goodet jefelt, en de Rikje met ladje Henj wajch jeschekjt.

⁵⁴ Hee haft sien Deena Iesrael jeholpe, sien Erboarme to behoole,

⁵⁵ so aus hee jesajcht haud to onnse Fodasch, to Obraum en siene Nokome, fa emma."

⁷ Breeda, blieft jedultijch, bott de Herr kejmt; Kjikjt! dee Foarma luat jeduldijch no daut scheene Frucht fonne Ead, en luat jeduldijch bott he tiedje en lota Raeajen kjrijcht.

⁸ Blieft jie uk jedultijch, bestaedijcht june Hoate, dan daem Herr siene Jaeajenwoat es dicht bie jekome.

⁹ Doot nich murre, Breeda, eena jajen daem aundra, daut jie nich jerecht woare. Kjikj! Dee Rechta steit aul fere Daea.

¹⁰ Breeda, naemt dee Profeete aus en Faeabilt fa Liede en Jedult, dee enn daem Herr sien Nome jeraet ha.

² Oba aus Jehaun em Jefenknes head fonn Christus siene Woakje, schekjt hee siene Jinja,

³ en saed to am: "Best du dee, dee doa kome sull? oda sel wie no en aundrem luare?"

⁴ Jesus auntwuad en saed to an: "Got en brinjt Jehaun Berecht fonn daut waut jie seene en heare:

⁵ Blinje kjenne wada seene, dee Lome gone, dee Utsautsje sent rein jemoakt, en dee Doowe kjenne wada heare, en Doodes stone opp, en dee Oame woat daut Evanjeelium jepraedicht.;

⁶ En jesaeajent es dee, dee nich aunstoos nemt aun mie."

⁷ Aus see delengd jinje, funk Jesus aun to daut Follkj to raede fonn Jehaun, en saed: "Waut jinj jie rut enne Wiltnes to seene? en Schelprua daut metem Wint jescheddat woat?

⁸ Oda waut jinj jie rut to seene? en Maun enn saunfte Kjleeda aunjetroke? Kjikjt! dee enn saunfte Kjleede aunjetroke sent, wone enn kjeenichs Hiesa.

⁹ Oba no waut jinj jie? en Profeet to seene? Yo, ekj saj ju, en meeha aus en Profeet.

¹⁰ Dit es dee fonn waemet jeschraewe steit: 'Kjikjt! ekj schekj mien Bootschofta feropp, dee woat dien Wajch reed moake fer die'.

¹¹ Enn Woarheit saj ekj junt: mank daen dee fonn ne Fru jebuere sent, es kjeena aewadael jekome dee jrata es aus Jehaun dee Taufa; oba dee Jerinjsta enn daut Himelsrikj es jrate aus hee.