Revised Common Lectionary (Complementary)

Dee 24 Psalm

En Psalm fonn Doft.

¹ Dee Ead es daem Herr Gott sient, un daut Follet doafonn, un dee, dee doabenne wone.

² Dan hee haft haut opp dee See jejrint, un daut bestädijcht opp dee Riefasch.

³ Wäa woat enopp gone no däm Herr Gott sien Boajch? Oda wäa woat enn siene heilje Städ stone?

⁴ Dee, dee reine Henj haft, un en ajchtet Hoat; dee siene Seel nijch nehejcht jehäft haft to Faulscheit, un haft nijch hinjem Lijcht jefeat met Schweare.

⁵ Dee woat däm Herr Gott sien Säajen kjriehe, un Jerjachtijchkjeit fonn däm Gott fonn siene Radunk.

⁶ Dit es daut Jeschlajcht fonn dän dee am utseakje, dee dien Jesejcht seakje, O du Joakopp sien Gott. Selah.

⁷ Häft june Kjapp opp, jie Puate; un siet oppjehaeft, jie eewje Däare; un dee Harlijchkjeits Kjeenijch woat enenn kome.

⁸ Waea es dis Harlijchkjeits Kjeenijch? Dee Herr Gott, majchtijch emm Kjrijch!

⁹ Häft june Kjapp opp, jie Puate; un siet oppjehaeft, O eewje Däare; un dee Harlijchkjeits Kjeenijch woat enenn kome.

¹⁰ Waea es dis Harlijchkjeits Kjeenijch? Dee Aulmajchtja Herr Gott, Hee es dee Harlijchkjeits Kjeenijch. Selah.

⁸ En ekj, Jehaun, sie dee, dee dise Dinje head en sach. Aus ekj dit aules head en sach, foll ekj fer daem Enjel siene Feet han dee mie dit aules wees, am auntobaede.

⁹ En hee saed to mie: "See daut du daut nich deist, dan ekj sie dien Metkjnacht, uk diene Breeda dee Profeete, en dee, dee de Wead enn dit Buak hoole."

¹⁰ Hee saed to mie: "Doo dise Profeete Wead enn dit Buak nich fesaeajle, dan de Tiet es jekome.

¹¹ Waea onnjerajcht es, lot am bie Onnjerajchtichkjeit bliewe, waea onnrein es, lot am bie onnreinet bliewe, oba waea enn Jerachtichkjeit laeft, lot am bie Jerajchtichkjeit bliewe, en waea Heilich es, lot am fa emma Heilich senne.

¹² Kjikj! ekj kom boolt, en mien Loon ha ekj met, en jiedrem doano to jaewe aus sien Woakj es jewast.

¹³ Ekj sie daut A en daut O, dee Easchta en dee Latsta, dee Aunfank en daut Enj.

¹⁴ Jesaeajent sent dee, dee aeare Kjleeda rein jewosche ha, daut see daut Rajcht ha to daen Laewesboom, en derch dee Puate enn dee Staut enenn gone kjenne.

¹⁵ Bute sent dee Hunj en dee Tsaubra, en Huara, en dee Merda, en dee Jetsedeene, en aule dee Laeajes moake en leef ha."

¹⁶ "Ekj, Jesus, schekjt junt mien Enjel aul dise Dinje to Zeije enne Jemeente. Ekj sie dee Wartel en daut Jeschlajcht fonn Doft, dee kloare Morjestearn."

¹⁷ En dee Jeist en dee Brut saje: "Komm!" En waea daut heat, lot am saje: "Komm!" En waem darscht, lot am kome, en waeaemma wel, lot am kome en daut Laeweswota emmsonst naeme.

¹⁸ Ekj zeij aule dee dise Profitseiwead heare: wan irjent waea waut toolaje woat to dise Wead, dan woat Gott am dee Ploag too laje dee enn dit Buak jeschraewe sent; en wan irjent waea fonn dee Wead enn dit Buak wajch naeme woat, dan woat Gott sien Poat fonn daem Laewesboom, en fonn dee heilje Staut wajch naeme.

²⁰ En dee, dee fonn dit Zeichness jeft, sajcht: "Jo! ekj kom boolt, Amen." Komm, Herr Jesus!

²¹ Onns Herr Jesus siene Jnod sie met ju aula!