Revised Common Lectionary (Complementary)

Dee 57 Psalm

To dän Haupt Musikaunt. Doo nijch fenijchte. En jeheemne Schats fonn Doft, aus hee fonn Saul flijchte deed enn ne Heel.

¹ Sie erboarment to mie, O Gott, sie erboarment to mie, dan miene Seel deit enn die fetruehe, jo enn daut Schaute fonn diene Flijchte es miene Festäakjestäd, bott dee groote Fenijchtunj febie es.

² Ekj woa däm aulahejchsta Gott aunroope, to Gott dee fa mie wirkjt.

³ Hee woat fomm Himel schekje un mie rade, hee woat dän to schaunde moake dee mie fekjneddre deit. Selah. Gott woat sien Erboarme un siene Woarheit schekje.

⁴ Miene Seel es mank dee Leiw; ekj ligj mank dän dee aun Fia aunjtesekjt sent, dee Menschesäns, dän äare Täne Spiese un Fiele sent, un äare Tunj es en schoapet Schweat.

⁵ Sie jepreist hejcha aus dee Himels, O Gott; lot diene Harlijchkjeit äwa dee gaunse Ead senne.

⁶ Dee ha en Nat reed jemoakt fa miene Staupe, miene Seel es dol jeboage; dee ha ne Kul jegroft fa mie, dee sent doa enenn jefolle. Selah.

⁷ Mien Hoat es faust opp eene Städ, O Gott, mien Hoat es faust opp eene Städ; ekj woa sinje en Preis jäwe.

⁸ Wakj miene Harlijchkjeit opp!. Wakj opp, Hoap en Jittoa! Ekj woa dän Morjeroot oppwakje met Preis.

⁹ Ekj woa die mank dee Felkja preise, O Herr, ekj woa to die sinje mank dee Natsjoone.

¹⁰ Dan dien Erboarme es groot bott dee Himels, un diene Woarheit bott dee Wolkje.

¹¹ Sie oppjehowe bowe dee Himels, O Gott; diene Harlijchkjeit äwa dee gaunse Ead.

6 Woacht sikj irjend waea fonn junt, wan hee ne Sach haft jaeajen en aundrem, nom Jerecht to gone fer dee onnjerachte, enne staed no de Heilje to gone?

² Oda weet jie nich daut dee Heilje de Welt rechte woare? en wan de Welt saul fonn ju jerecht woare, sent jie nich faeich de Kleenichkjeite to rechte?

³ Weet jie nich daut jie Enjel rechte woare? nich to raede fonn waut to dise Welt jeheat.

⁴ Wan jie dan Sache ha to rechte dee to dit Laewe jeheare, naem jie dan dee aus Rechta dee de Jemeent nusscht achte?

⁵ Ekj saj dit to june Schaund. Esset werklich so daut kjeen weise mank ju es, dee tweschen Breeda unjascheede kaun?

⁶ Oba Brooda nemt en Brooda fer Jerecht, en daut fer dee Onnjleewende!

⁷ Nu es doa werklich en Faela bie ju, daut jie fer Jerecht gone unja junt selfst. Wuaromm nich leewa Onnracht liede? Wuaromm nich leewa junt daut waut junt es wach naeme lote?

⁸ Oba jie doone onnracht en lote aundre nich daut tookome waut aeat es, en daut aun june eajne Breeda.

⁹ Weet jie nich daut dee Onnjerachte nich woare Gott sien Rikj oawe? Lot junt nich feleide; de Huare en de Jetsedeena en de Eehebraeakja en de Huararie driewe, en dee met aea eajnet Jeschlacht Huararie driewe,

¹⁰ en de Deew en de Jietsje en Supa en de Lastra en Schwindla woare Gott sien Rikj nich oawe.

¹¹ En soone weare eenje fonn ju, oba jie sent jewoshe, jie sent jeheilicht, jie sent jerachtfoadicht, enn daem Herr Jesus Christus sien Nome en derch onns Gott sien Jeist.