Revised Common Lectionary (Complementary)

La̱atak jun cha̱bil aj cˈanjel chiru li Dios chi ma̱cˈaˈ cˈaˈru tatxuta̱na̱k cuiˈ

¹⁴ Chajultica li xya̱lal chiruheb laj pa̱banel. Saˈ xcˈabaˈ li Ka̱cuaˈ Dios chayehak reheb nak cheˈxcanabak xcuechˈinquil ribeb chirix a̱tin xban nak aˈan ma̱cˈaˈ na‑oc cuiˈ. Caˈaj cuiˈ xpoˈbaleb xchˈo̱l li nequeˈabin re naxba̱nu. ¹⁵ Chaqˈuehak a̱chˈo̱l chi cˈanjelac chiru li Dios joˈ junak tzˈakal aj cˈanjel ma̱cˈaˈ cˈaˈru ta̱xuta̱na̱k cuiˈ. Chachˈolobak chi tzˈakal resil li colba‑ib chiruheb. ¹⁶ Mat‑oquen riqˈuin joˈ ma̱joˈil serakˈ, li ma̱cˈaˈ na‑oc cuiˈ. Li nequeˈba̱nun re chi joˈcan kˈaxal cuiˈchic nequeˈxqˈue xchˈo̱l chixba̱nunquil li ma̱usilal. ¹⁷ Naniman ru li tijleb li nequeˈxcˈut. Chanchan nak naniman ru junak yajel joˈ li cáncer xcˈabaˈ. Joˈcan queˈxba̱nu laj Himeneo ut laj Fileto. ¹⁸ Eb aˈan queˈxcanab xpa̱banquil li tzˈakal ya̱l ut queˈxpa̱b li ticˈtiˈ. Nequeˈxye nak ac queˈcuacli chi yoˈyo eb li camenak, chanqueb. Ut riqˈuin aˈan cuan li yo̱queb chixpoˈbal ruheb lix pa̱ba̱leb. ¹⁹ Abanan li xya̱lal qˈuebil ke xban li Dios incˈaˈ naru najalman ru. Joˈcaˈin tzˈi̱banbil saˈ li Santil Hu: li Dios naxnau ruheb li ralal xcˈajol, ut chixjunileb li teˈxcˈabaˈin xcˈabaˈ li Ka̱cuaˈ, tento nak teˈxcanab chi junaj cua li ma̱usilal. ²⁰ Saˈ junak xnimal ru cab cuan li secˈ yi̱banbil riqˈuin oro ut plata. Ut cuan li chˈochˈ secˈ ut cuan ajcuiˈ li secˈ yi̱banbil riqˈuin cheˈ. Cuan li cha̱bil xcˈanjel ut cuan li yalak cˈaˈru nacˈanjelac cuiˈ. ²¹ Cui junak aj pa̱banel naraj ta̱qˈuehekˈ re jun lix cha̱bil cˈanjel xban li Dios, tento nak li jun aˈan tixcanab chi junaj cua chixjunil li ma̱usilal. Cui tixba̱nu chi joˈcan, li jun aˈan kˈaxtesinbilak chic chi cˈanjelac chiru li Ka̱cuaˈ ut cauresinbilak chic chixba̱nunquil li cha̱bil cˈanjel. ²² Joˈcan utan chatzˈekta̱na chi junaj cua li incˈaˈ us li nequeˈxrahi ru li toj sa̱jeb. Ut qˈue a̱chˈo̱l chicua̱nk saˈ ti̱quilal ut chatpa̱ba̱nk chi tzˈakal. Charahakeb la̱ cuas a̱cui̱tzˈin ut chatcua̱nk saˈ usilal riqˈuineb chixjunileb. La̱akat jun saˈ xya̱nkeb li ti̱queb xchˈo̱l li nequeˈtijoc chiru li Dios. ²³ Ma̱cuaˈakat jun saˈ xya̱nkeb li nequeˈxcuechˈi rib chirix to̱ntil a̱tin li ma̱cˈaˈ aj e. La̱at ac nacanau nak li cuechˈi̱nc ib junes ra xi̱cˈ naxqˈue. ²⁴ Junak aj cˈanjel chiru li Ka̱cuaˈ ma̱cuaˈak aj sicˈol ra xi̱cˈ. Tu̱lanak ban riqˈuineb chixjunileb. Cua̱nk xnaˈleb re xcˈutbal li xya̱lal chiruheb li ras ri̱tzˈin ut nimak xcuyum. ²⁵ Ut saˈ tu̱lanil chixchˈolobak xya̱lal reheb li nequeˈcuechˈin rix li xya̱lal. Ma̱re chan nak li Dios ta̱tenkˈa̱nk reheb chixyotˈbal xchˈo̱leb, chixjalbal xcˈaˈuxeb re teˈxnau ru li ya̱l. ²⁶ Ut teˈrisi rib saˈ rukˈ laj tza li yo̱ chi a̱le̱nc reheb re nak incˈaˈ chic teˈxba̱nu li cˈaˈru naraj aˈan. Ut teˈsukˈi̱k taxak saˈ li tzˈakal xya̱lal.