Revised Common Lectionary (Complementary)

Dee 61 Psalm

To dän Haupt Musikaunt, opp en Späldinkj met Seide. Doft sien Jebäd.

¹ Horjch no mien Schriehe, O Gott, un horjch no mie Jebäd.

² Fonn daut Enj fonn dee Ead roop ekj die aun wan mien Hoat beschwiemt; O leid mie no dän Steen dee hejcha es aus ekj sie.

³ Dan du best miene Schülinj, en stoakja Torm fer dän Fient.

⁴ Ekj woa fa emma enn diene Fesaumlunjstäd wone; ekj woa enn dee Schülinj fonn diene Flijchte fetrühe.

⁵ Dan du, O Gott hast mien Fespräakje jeheat; du hast mie daut Oawgoot jejäft fonn dän dee dien Nome ferjchte.

⁶ Du woascht Doag toolaje to däm Kjeenijch siene Doag; siene Joare woare fa fäl Jeschlajchte senne.

⁷ Hee woat opp sien Troon sette fa emma fer Gott. Doo am met Erboarme un Woarheit bestemme.

⁸ Doaromm woa ekj Preis sinje to dien Nome fa emma, soo daut ekj mien Fespräakje dach fa dach betole woa.

⁵ Dise Twlaw schekjt Jesus rut, en saed to an: "Got nich opp daen Wajch mank dee Natsjoone, uk nich enn irjent eena fonn dee Samarietesche Staede;

⁶ Got leewa no dee felorne Schop fonn daen Staum Iesrael.

⁷ En wan jie gone, dan praedicht en sajcht: 'Daut Himelsrikj es dicht bie.'

⁸ Doot dee Kranke heele, woakt dee Doodes opp, moakt dee Utsautsje rein, en drieft beese Jeista rut. Jie ha emmsonst jekjraeaje, jaeft emmsonst.

⁹ Naemt nich Golt oda Selwa oda Messinkj enn jun Gort,

¹⁰ uk nich Tausche, uk nich twee Wanikjs, oda Schoo, oda en Gonstok, dan dee Oabeida es siene Noarinj weat.

¹¹ En wan jie enn ne Staut oda Darp enennkome, dan forscht waea doabenne Weat es, en blieft doa bott jie wieda gone.

¹² En wan jie enn en Hus enenn kome, dan jreest daut.

¹³ En wan daut Hus Weat es, dan lot june Fraed doaraewa kome; oba wanet nich Weat es, dan lot june Fraed trig no junt kome.

¹⁴ En waea junt nich oppnemt, en june Wead nich aun nemt, dan got ut daut Hus oda dee Staut erut, en scheddat daen Stoff fonn june Feet.

¹⁵ Enn Woarheit saj ekj junt, daut woat fa Soodom en Gomora leichta senne aum Jerechstdach aus fa dee Staut.