Revised Common Lectionary (Complementary)

Dee 62 Psalm

To dän Haupt Musikaunt, to Jedutun. En Psalm fonn Doft.

¹ Miene Seel es stel bloos fer Gott; fonn am kjemt miene Radunk.

² Hee auleen es mien groota Steen un miene Radunk, mien stoakja Torm; ekj woa nijch met Jewault wajch jeräte woare.

³ Woo lang woascht du enenn bräakje jäajen en Maun? Du woascht am feschmatre, jie aule, soo aus ne Waunt dee länt, ne Tun dee wagelt.

⁴ Sejchalijch, deede see jäajen am plone am rut to schmiete fonn siene beriemede Ea; see fejneaje sikj enn Läajes, see säajne met äa Mul, oba doone enn äa Hoat fluche. Selah.

⁵ Sie bloos stel to Gott, O miene Seel, dan miene Hopninj kjemt fonn am.

⁶ Hee auleen es mien groota Steen un miene Radunk, mien stoakja Torm, ekj woa nijch jescheddat woare.

⁷ Miene Radunk un miene Harlijchkjeit es opp Gott; mien stoakja groota Steen, miene Tooflucht es enn Gott.

⁸ Doot emma enn am fetrühe, jie Felkja; doot jun Hoat utschedde fer am; Gott es ne Tooflucht fa onns. Selah.

⁹ Sejchalijch sent dee Menschesäns soo aus nuscht; dee Menschesäns sent ne Leaj, dee sent opp dee Wijchtschol jewoage; dee sent aulatoop leijchta aus Daump.

¹⁰ Doo nijch enn Bedrekjunj fetrühe, un siet nijch Fejaeäfs enn Beroowe; wan Rikjdom toonemt, dan lot dien Hoat nijch opp daut felote.

¹¹ Gott haft eemol jesajcht; tweemol ha ekj dit jeheat daut Macht to Gott jeheat.

¹² En uk, O Herr Gott, to die jeheat Erboarme; dan du deist to en jiedem beloone soo aus siene Woakje sent.

¹⁴ Aun daem Enjel fonn dee Jemeent enn Laoditsaea schriew: Dit sajcht dee Amen, dee Zeij dee Tru en Woarhauftich es, dee Faeaschta fonn Gott siene Kjreatua:

¹⁵ Ekj weet omm diene Woakje, daut du nich kollt uk nich heet best. Ekj wensch mie daut du kollt oda heet weascht.

¹⁶ Aulsoo wiel du leiwoam best, en nich heet oda kollt, sie ekj reed die ut mien Mul to spiehe.

¹⁷ Wiel du sajchst, ekj sie rikj, en sie rikj jeworde, en mie faeltet aun nusscht; weetst oba nich daut du jaumalich, en misroblich, en oam, en blint, en noaktich best.

¹⁸ Ekj rod die, daut du Golt fonn mie kjafst daut met Fia jereinicht es, daut du werkjlich kaunst rikj senne, en witte Kjleeda daut du die bekjleede kaunst daut dee Schaund fonn dien noaktjet nich to seene es, en diene Uage met Uagesaulw ennschmaeare soo daut du seene kaunst.

¹⁹ Waem ekj leef ha, doo ekj trajchtwiese en strofe; doaromm sie heet en doo Buesse.

²⁰ Kjikj! ekj sto fere Daea en kloppa aun; wan irjent waea miene Stem heat, en dee Daea opmoakt, dan woa ekj enenn kome, en woa met am toop aete, en hee met mie.

²¹ Waea jewent, daem woa ekj daut Rajcht jaewe met mie toop opp mien Troon to sete, soo aus ekj jewonne ha, en met mien Foda toop opp sien Troon set.

²² Waea Uare haft, lot am heare waut dee Jeist to dee Jemeente sajcht.