Revised Common Lectionary (Complementary)

⁶ Ya̱l nak kˈaxal lokˈ li pa̱ba̱l chokˈ reheb li nequeˈxcˈojob xchˈo̱l riqˈuin li joˈ nimal joˈ chˈinal cuan reheb. ⁷ Ma̱cˈaˈ cuan ke nak coyoˈla saˈ ruchichˈochˈ ut ma̱cˈaˈ ajcuiˈ takacˈam nak toca̱mk. ⁸ Joˈcan nak cui cuan katzacae̱mk ut cui cuan katˈicr re xtzˈapbal kib, cˈojcˈo̱k kachˈo̱l riqˈuin aˈan. ⁹ Abanan eb li nequeˈrahoc ru li biomal, nequeˈxqˈue rib chi a̱le̱c ut nequeˈxba̱nu li yibru aj naˈleb. Aˈan napoˈoc ru lix cˈaˈuxeb ut riqˈuin chixjunil li incˈaˈ us nequeˈxba̱nu, nequeˈxsach lix pa̱ba̱leb. ¹⁰ Li xrahinquil ru li tumin, aˈan xxeˈ xto̱nal chixjunil li ma̱usilal. Cuanqueb li queˈxtzˈekta̱na lix pa̱ba̱l xban xrahinquil ru li tumin. Ut qˈuila raylal queˈxbok saˈ xbe̱neb. Ut nequeˈyotˈotˈnac saˈ xchˈo̱leb riqˈuin li incˈaˈ us nequeˈxba̱nu.

Laj Pablo quixye re laj Timoteo chanru nak ta̱cˈanjelak chiru li Dios

¹¹ Ut la̱at, at Timoteo, la̱at aj cˈanjel chiru li Dios. Ma̱ba̱nu li ma̱usilal li nequeˈxba̱nu eb aˈan. Qˈue ban a̱chˈo̱l chi cua̱nc saˈ ti̱quilal. Chara li Dios ut chatpa̱ba̱nk chiru. Charaheb la̱ cuas a̱cui̱tzˈin. Chacuy li raylal ut chatcua̱nk saˈ tu̱lanil. ¹² Yal a̱kˈe chi qˈui̱c saˈ la̱ pa̱ba̱l ut qˈue a̱chˈo̱l chire̱chaninquil li junelic yuˈam, li bokbilat cuiˈ xban li Dios. La̱at xaye ut xacˈutbesi chi tzˈakal la̱ pa̱ba̱l chiruheb nabal. ¹³ Saˈ xcˈabaˈ li Dios li naqˈuehoc yuˈam, la̱in nintzˈa̱ma cha̱cuu nak ta̱ba̱nu la̱ taklanquil. Ut nintzˈa̱ma ajcuiˈ cha̱cuu saˈ xcˈabaˈ li Jesucristo li quichˈoloban xya̱lal chi ma̱cˈaˈ xxiu chiru laj Poncio Pilato. ¹⁴ Ut la̱ taklanquil, aˈan aˈin: chaba̱nu chixjunil li taklanbilat cuiˈ xban li Ka̱cuaˈ. Ti̱cak la̱ chˈo̱l ut ma̱cˈaˈak a̱kˈusbal toj retal ta̱cˈulu̱nk cuiˈchic li Ka̱cuaˈ Jesucristo.

Lokˈoninbilak taxak li Dios anakcuan ut chi junelic

¹⁵ Nak tixtau xkˈehil li Dios tixcˈutbesi cuiˈchic chiku li Jesucristo. Li Dios, aˈan kˈaxal lokˈ ut junaj ajcuiˈ. Aˈan li Rey li kˈaxal nim xcuanquil saˈ xbe̱neb chixjunileb li rey li cuanqueb saˈ ruchichˈochˈ. Ut aˈan ajcuiˈ li Ka̱cuaˈ li kˈaxal nim xcuanquil saˈ xbe̱neb chixjunileb li cuanqueb xcuanquil. ¹⁶ Li Dios yoˈyo chi junelic. Ma̱cˈaˈ xticlajic ut ma̱cˈaˈ rosoˈjic. Aˈan cutan saken chi junelic ut ma̱ ani naru na‑oc riqˈuin xban nak kˈaxal lokˈ. Incˈaˈ ilbil ru chi moco na‑ileˈ ru saˈ ruchichˈochˈ. Chikaqˈuehak taxak xlokˈal ut chikalokˈonihak taxak xban nak kˈaxal nim lix cuanquilal anakcuan ut chi junelic. Joˈcan taxak.

Laj Timoteo tixqˈue xnaˈlebeb li biom

¹⁷ Ta̱chˈolob xya̱lal chiruheb li biom nak incˈaˈ teˈxkˈetkˈeti ribeb chi moco teˈxcˈojob xchˈo̱l saˈ xbe̱n li biomal li na‑osoˈ. Cheˈxqˈue ban xchˈo̱l chixyoˈoninquil li yoˈyo̱quil Dios. Aˈan naqˈuehoc ke chi nabal chixjunil li cˈaˈak re ru. ¹⁸ Chaye reheb nak cheˈxba̱nu li us. Chinumta̱k lix cha̱bilaleb. Cheˈxnauhak sihi̱nc chi nabal ut chi anchaleb xchˈo̱l. ¹⁹ Cui nequeˈxba̱nu chi joˈcan yo̱queb chixcˈu̱lanquil lix ra̱baleb saˈ choxa ut riqˈuin aˈan cˈojcˈo̱k xchˈo̱leb. Cheˈxba̱nuhak chi joˈcan re nak ta̱cua̱nk lix yuˈameb chi tzˈakal re ru ut chi numtajenak xsahil xchˈo̱leb.

Li cui̱nk biom ut laj Lázaro

¹⁹ Quicuan jun li cui̱nk biom. Naxtikib rib riqˈuin cha̱bil tˈicr kˈaxal terto xtzˈak ut rajlal cutan naninkˈei̱c. ²⁰ Quicuan ajcuiˈ jun li cui̱nk nebaˈ aj Lázaro xcˈabaˈ. Xox rix. Rajlal naxchunub rib chire li oqueba̱l re li rochoch li biom. ²¹ Naxra raj ru xtzacanquil xcˈaj li cua li natˈaneˈ saˈ xbe̱n xme̱x li biom. Eb li tzˈiˈ nequeˈchal riqˈuin ut nequeˈxrekˈ ru lix xox. ²² Quicuulac xkˈehil nak quicam li nebaˈ ut quicˈameˈ xbaneb li ángel toj saˈ choxa bar cuan cuiˈ laj Abraham. Ut quicam ajcuiˈ li biom ut quimukeˈ. ²³ Nak ac cuan saˈ xbalba, yo̱ chixcˈulbal li raylal aran. Qui‑iloc takecˈ ut quiril laj Abraham ut laj Lázaro cuan chixcˈatk. ²⁴ Quixjap re ut quixye: ―Ka̱cuaˈ Abraham, chacuil taxak xtokˈoba̱l cuu. Chatakla laj Lázaro chintenkˈanquil. Chixtˈakresi chak li ruˈuj rukˈ saˈ haˈ ut tolxquehobresi li ruˈuj cuakˈ xban nak cˈajoˈ li raylal yo̱quin chixcˈulbal saˈ li xam aˈin, chan. ²⁵ Ut laj Abraham quixye re: ―At cuas cui̱tzˈin, julticak a̱cue nak toj yoˈyo̱cat saˈ ruchichˈochˈ nabal a̱biomal ut kˈaxal sa nak xatcuan. Ut laj Lázaro cˈajoˈ li raylal quixcˈul. Anakcuan cˈojobanbil xchˈo̱l laj Lázaro arin ut la̱at kˈaxal ra cuancat. ²⁶ Ut cuan jun nimla chamal jul naramoc re li naˈajej cuanco cuiˈ. Ut ma̱ jun ke ta̱ru̱k ta̱numekˈ re ta̱xic e̱riqˈuin, chi moco la̱ex ta̱ru̱k texnumekˈ chak arin, chan laj Abraham re li biom. ²⁷ Tojoˈnak li biom quixye re: ―Tintzˈa̱ma cha̱cuu, at Ka̱cuaˈ Abraham, takla laj Lázaro saˈ rochoch lin yucuaˈ. ²⁸ Aran cuanqueb o̱b li cui̱tzˈin. Chatakla xchˈolobanquil xya̱lal chiruheb re nak eb aˈan incˈaˈ teˈcha̱lk saˈ li naˈajej aˈin chi cˈuluc raylal, chan. ²⁹ Laj Abraham quixye re: ―Cuan riqˈuineb li hu li tzˈi̱banbil xban laj Moisés, ut eb li profeta. Cheˈxqˈuehak retal li cˈaˈru tzˈi̱banbil saˈ li hu aˈan, chan. ³⁰ Quichakˈoc li biom ut quixye: ―Incˈaˈ tzˈakal aˈan, Ka̱cuaˈ Abraham. Abanan cui junak camenak ta̱cuacli̱k cuiˈchic chi yoˈyo ut ta̱xic riqˈuineb, teˈyotˈekˈ raj xchˈo̱l ut teˈxjal raj xcˈaˈuxeb, chan. ³¹ Aˈut laj Abraham quixye re: ―Cui incˈaˈ nequeˈrabi li quixye laj Moisés ut eb li profeta, incˈaˈ ajcuiˈ teˈpa̱ba̱nk usta ta̱cuacli̱k cuiˈchic chi yoˈyo junak saˈ xya̱nkeb li camenak, chan laj Abraham.