Revised Common Lectionary (Complementary)

Mumutendereze, mmwe abaweereza be,
    mutendereze erinnya lya Mukama.
^2 (B)Erinnya lya Mukama litenderezebwe
    okuva leero n’okutuusa emirembe gyonna.
^3 (C)Enjuba weeviirayo okutuusa bw’egwa,
    erinnya lya Mukama litenderezebwenga.

^4 (D)Mukama agulumizibwa okusinga amawanga gonna,
    era n’ekitiibwa kye kisinga eggulu.
^5 (E)Ani afaanana nga Mukama Katonda waffe,
    atuula ku ntebe ye ey’obwakabaka eri waggulu ennyo,
^6 (F)ne yeetoowaza
    okutunuulira eggulu n’ensi?

^7 (G)Abaavu abayimusa n’abaggya mu nfuufu;
    n’abali mu kwetaaga n’abasitula ng’abaggya mu vvu,
^8 (H)n’abatuuza wamu n’abalangira,
    awamu n’abalangira abo abafuga abantu be.
^9 (I)Omukazi omugumba amuwa abaana,
    n’abeera mu maka ge n’ezzadde lye ng’ajjudde essanyu.

Mutendereze Mukama!

^8 (A)Zibasanze mmwe aboongera amayumba ku ge mulina,
    n’ennimiro ne muzongerako endala
ne wataba kafo konna kasigadde,
    ne mubeera mwekka wakati mu nsi!

^11 (D)Zibasanze abo abakeera enkya ku makya
    banoonye ekitamiiza,
abalwawo nga banywa omwenge ettumbi ly’obudde,
    okutuusa omwenge lwe gubalalusa!
^12 (E)Ababeera n’ennanga n’entongooli, ebitaasa n’endere,
    n’omwenge ku mbaga zaabwe;
naye ne batalowooza ku mulimu gwa Mukama Katonda,
    wadde okussa ekitiibwa mu ebyo bye yatonda.
^13 (F)Abantu bange kyebavudde bagenda mu buwaŋŋanguse
    kubanga tebalina kutegeera.
Abantu baabwe ab’ekitiibwa bafe enjala,
    n’abantu aba bulijjo bafe ennyonta.
^14 (G)Amagombe kyegavudde gagaziya omumiro gwago,
    era ne gaasamya akamwa kaago awatali kkomo.
Mu ko mwe munaagenda abakungu baabwe
    n’abantu baabwe abaabulijjo, n’ab’effujjo n’abatamiivu.
^15 (H)Buli muntu alitoowazibwa,
    abantu bonna balikkakkanyizibwa
    era amaaso g’abo abeemanyi nago gakkakkanyizibwe.
^16 (I)Naye Mukama Katonda ow’Eggye aligulumizibwa olw’obwenkanya,
    era Katonda Omutukuvu yeerage nga bw’ali omutukuvu mu butuukirivu bwe.
^17 (J)Endiga ento ziryoke zirye ng’eziri mu malundiro gaazo,
    n’ensolo engenyi ziriire mu bifo ebyalekebwa awo, ebyalundirwangamu eza ssava.

^18 (K)Zibasanze abo abasikaasikanya ebibi byabwe
    ng’embalaasi bw’esika ekigaali.
^19 (L)Aboogera nti, “Ayanguyeeko, ayite mu bwangu tulabe ky’anaakola.
    Entegeka z’omutukuvu wa Isirayiri nazo zijje,
    zituuke nazo tuzimanye.”

^20 (M)Zibasanze abo abayita ekibi ekirungi
    n’ekirungi ekibi,
abafuula ekizikiza okuba ekitangaala,
    n’ekitangaala okuba ekizikiza,
abafuula ekikaawa okuba ekiwoomerera
    n’ekiwoomerera okuba ekikaawa.

^21 (N)Zibasanze abo abeeraba ng’abalina amagezi,
    era abagezigezi bo nga bwe balaba.

^22 (O)Zibasanze abo abazira mu kunywa omwenge
    era mu kutabula ekitamiiza,
^23 (P)abejjeereza abatemu olw’enguzi
    era abamma abatuukirivu obwenkanya obubagwanidde.