Revised Common Lectionary (Complementary)

Li Xbe̱n Hu li Quixtzˈi̱ba li San Pablo re laj Timoteo

Laj Pablo naxtakla xsahil xchˈo̱l laj Timoteo

1  La̱in laj Pablo. Taklanbilin xban li Jesucristo chi cˈanjelac chiru xban nak joˈcan quiraj li Dios laj Colol ke. Ut joˈcan ajcuiˈ quiraj li Ka̱cuaˈ Jesucristo li kayoˈon. ² At Timoteo, yo̱quin chi tzˈi̱bac a̱cuiqˈuin. Chanchanat li tzˈakal cualal nak cuancat xban nak chicuu xapa̱b li Cristo. Chicua̱nk taxak a̱cuiqˈuin li usilal, li uxta̱n ut li tuktu̱quilal li naxqˈue li Dios li kaYucuaˈ ut li naxqˈue li Ka̱cuaˈ Jesucristo.

Laj Timoteo tixchˈolob xya̱lal chiruheb laj pa̱banel re nak incˈaˈ teˈxpa̱b laj balakˈ

³ Nacuaj nak tatcana̱k aran Efeso joˈ quintzˈa̱ma cha̱cuu nak co̱in Macedonia. Tatcana̱k aran re nak ta̱kˈuseb li yo̱queb chi balakˈi̱nc saˈ xya̱nkeb laj pa̱banel. Ta̱ye reheb nak teˈxcanab xcˈutbal li incˈaˈ ya̱l. ⁴ Ut ta̱ye ajcuiˈ reheb nak cheˈxcanabak xcuechˈinquil rix aniheb lix xeˈ xto̱naleb xban nak li naˈleb aˈan ma̱cˈaˈ rosoˈjic ut ma̱cˈaˈ na‑oc cuiˈ. Ta̱ye reheb nak incˈaˈ chic teˈxpa̱b li xeˈto̱nil naˈleb. Li naˈleb aˈin junes yoˈoban cuechˈi̱nc ib naxba̱nu. Incˈaˈ nocoxtenkˈa xba̱nunquil li cˈanjel qˈuebil ke xban li Dios. Caˈaj cuiˈ li kapa̱ba̱l natenkˈan ke. ⁵ At Timoteo, lix ya̱lal li cˈaˈru yo̱quin chixyebal a̱cue, aˈan aˈin. Xcanabakeb li balakˈi̱nc. Cheˈxqˈue ban xchˈo̱l chixrabaleb li rech aj pa̱banelil. Ut teˈxraheb cui teˈcua̱nk saˈ ti̱quilal chi ma̱cˈaˈak li cˈaˈak re ru nachˈiˈchˈiˈin reheb saˈ xcˈaˈuxeb ut cui teˈpa̱ba̱nk chi anchaleb xchˈo̱l. ⁶ Eb aˈan incˈaˈ nequeˈxqˈue retal li xya̱lal aˈin. Aˈ chic li ma̱cˈaˈ na‑oc cuiˈ nequeˈxqˈue xchˈo̱l chixcuechˈinquil rix. ⁷ Nequeˈraj raj xchˈolobanquil xya̱lal li chakˈrab. Aj cˈutul chakˈrab nak nequeˈxye rib. Abanan incˈaˈ ajcuiˈ nequeˈxtau ru li cˈaˈru nequeˈxcˈut usta chanchan nequeˈxtau ru chi tzˈakal li cˈaˈru yo̱queb chixyebal.

Tento takanau cˈaˈru aj e nak qˈuebil li chakˈrab

⁸ La̱o nakanau nak li chakˈrab cha̱bil cui nakatau ru cˈaˈru aj e nak qˈuebil xban li Dios. ⁹ Joˈcan nak nacuaj nak te̱qˈue retal nak li chakˈrab moco qˈuebil ta reheb li ti̱queb xchˈo̱l. Reheb ban li incˈaˈ nequeˈabin ut li nequeˈkˈetoc re li chakˈrab. Reheb ajcuiˈ li incˈaˈ useb xnaˈleb ut eb laj ma̱c. Reheb ajcuiˈ li incˈaˈ nequeˈpa̱ban re li Dios chi moco cuanqueb junak xpa̱ba̱leb. Ut reheb ajcuiˈ laj camsinel ut li nequeˈxcamsi xnaˈ xyucuaˈeb. ¹⁰ Li chakˈrab reheb laj coˈbe̱t laj yumbe̱t ut reheb li nequeˈma̱cob riqˈuin rech cui̱nkilal rech ixkilal. Reheb ajcuiˈ li nequeˈelkˈac cristian. Reheb ajcuiˈ li nequeˈticˈtiˈic ut li nequeˈxpatzˈ xcˈabaˈ li Dios riqˈuin yoˈobanbil a̱tin. Li chakˈrab reheb chixjunileb li nequeˈxba̱nu li cˈaˈak chic re ru chi ma̱usilal li napoˈoc ru li katijbal li tzˈakal ya̱l. ¹¹ Li katijbal aˈan li quicˈuteˈ chiku xban li lokˈlaj colba‑ib li naxqˈue ke li nimajcual Dios, li tenebanbil saˈ inbe̱n xyebal resilal yalak bar.