Revised Common Lectionary (Complementary)

²¹ Oba Du, O Herr Gott, dee Herr, oabeid met mie omm dien Nome haulwe; rad mie wiels dien Erboarme es goot.

²² Dan ekj sie Oam un derftich, un mien Hoat enn mie es derch jespekjt.

²³ Soo aus en Schaute wan daut ut rakjt sie ekj wajch; ekj sie auf jescheddat soo aus ne Heischrakj.

²⁴ Miene Kjneehe stolpre fonn Fauste, un mien Fleesch woat moaga fonn Fatet.

²⁵ Un ekj sie en Aufschu jeworde to an; see kjikje no mie un schedre äare Kjap.

²⁶ O Herr Gott mien Gott, halp mie; rad mie enn dien Erboarme;

²⁷ dan woare dee weete daut dit diene Haunt es, daut Du, O Herr Gott, daut jedone hast.

²⁸ Dee woare fluche, oba Du woascht säajne; dee woare oppstone un sikj schäme; oba dien Deena woat sikj freihe.

²⁹ Lot dän dee mie beschuldje met Schaund bedakjt senne; un sikj bedakje enn äare Schaund soo aus met en Rock.

³⁰ Ekj woa däm Herr Gott seeha danke met mien Mul; Jo, ekj woa Am preise med mank dee groote Menj Mensche.

³¹ Dan Hee woat to dee Oamen to rajchte Haunt stone; to rade fonn dän dee siene Seel rejchte.

⁷ Aun daem Enjel fonn dee Jemeent enn Filadelfia schriew: Dit sajcht dee Heilje en Woarhauftja, dee Doft sien Schlaetel haft, dee opmoakt en kjeena tooschlit, dee tooschlit en kjeena woat opmoake:

⁸ Ekj weet omm diene Woakje; kjikj! ekj ha fer die ne Daea opjemoakt, daen kjeena toomoake kaun; dan du hast mau weinich Krauft, oba hast mien Wuat jehoole, en hast mien Nome nich aufjesajcht.

⁹ Kjikj! ekj woa daen fonn Soton siene School, dee saje daut see Jude sent, oba leaje; Kjikj! ekj woa daen bott doa brinje daut see fer june Feet aunbaede woare, en see woare weete daut ekj die ha leef jehaut.

¹⁰ Wiel du daut Wuat fonn miene Jedult bewoat hast, woa ekj die bewoare fonn dee Feseakjunkstunnd dee aewa dee gaunse Welt kome woat, aul daen oppe Proow to stale dee oppe Ead wone.

¹¹ Kjikj! ekj kom boolt; hool faust waut du hast, daut kjeena diene Kroon nemt.

¹² Waea jewent, woa ekj tom Stenda moake enn mien Gott sien Tempel, en dee woat niemols meeha rut gone, en ekj woa mien Gott sien Nome opp am schriewe, en daen Nome fonn mien Gott siene Staut, daut niehe Jerusalem, daut fonn utem Himel fonn mien Gott rauf kjemt, uk mien niehe Nome.

¹³ Waea Uare haft tom heare, lot am heare waut dee Jeist to dee Jemeente sajcht.