Revised Common Lectionary (Complementary)

Dee 49 Psalm

To dän Haupt Musikaunt, en Psalm fa dee Korah Säns.

¹ Horjcht no dit, jie gaunse Welt; horjcht aul jie dee enne Welt wone.

² Beides Mensche Saens un Mensche Kjinje, rikj un oam toop:

³ Mien Mul saul Weisheit räde, un dee Jedankje enn mien Hoat sele Festentnis jäwe.

⁴ Ekj woa mien Ua dol beaje to en Jlikjnes; ekj woa mien diestret Räde op moake opp ne Haop.

⁵ Wuaromm sull ekj mie enn dee Doag ferjchte wan Beeset kjemt, wan daut Gottlooset kjemt fonn dän dee mie ommrinje?

⁶ Soone dee enn äa Rikjdom fetruehe, un enn äa Hab un Goot, doone sikj puche.

⁷ En Maun kaun sien Brooda nijch rade, oda Leesjelt to Gott jäwe fa am –

⁸ dan dee Radunk fa äare Seel es kjestlijch, un daut deit fa emma oppheare –

⁹ dan hee woat doch fa emma läwe; hee woat niemols Fewäsunk seene.

¹⁰ Dan dee seeha Weise stoawe, dee Noa un dee soo aus en Tia sent kome toop omm, un lote äa Rikjdom to aundre.

¹¹ Äare ennalijche Jedanke sent daut äare Hiesa emma bliewe woare, un äare Woninj to aule Jeschaljchte; see nane äare Lenda no äare eajne Nomes.

¹² Oba dee Mensch saul nijch enn Ea bliewe: hee es soo aus dee Tiare, dee sele ommkome.

3 Wan jie nu dan met Christus oppjestone sent, dan seakjt daut waut bowe es, wua Christus to Gott siene rajchte Haunt sete deit.

² Sat june Jedanke opp daut waut bowe es, nich opp dee Dinje dee oppe Ead sent.

³ Dan jie sent jestorwe, en jun laewe es met Christus enn Gott fewoat.

⁴ Wan Christus, dee nu onns Laewe es, jeoppenboat woat woare, dan woa jie met am toop jeoppenboat woare enn Harlichkjeit.

⁵ Doaromm raeakjent june Jliede hia oppe Ead aus Doot: soo aus Huararie, Onnreinichkjeit, Leidenschooft, beeset Felange, en Jiets - dann daut es Jetsedeenst;

⁶ dan waeajen soone Dinje kjemt Gott sien Oaja.

⁷ Doarenn waundeld jie uk don aus jie enn soont laewde.

⁸ Oba nu lajcht uk aul soone Dinje auf: Oaja, Wutt, Grollet, Lastre; lot kjeene schentliche Wead ut jun Mul kome;

⁹ doot nich eena tom aundra leaje, wiel jie ha dee oola Natua aufjelajcht met dee oole Woakje,

¹⁰ en trakjt daen nieha Natua aun, dee nie jemoakt woat derch ne folle Erkjantnes no daem sien Bilt dee daen erschaufe haft,

¹¹ wua doa kjeen Jrieche oda Jud es, kjeen Beschnaedna oda Onnbeschnaedna, Barbora, Tsietsen, Sklow oda Frie, oba wua Christus aules en enn aules es.

¹³ Donn saed eena utem Follkj to am: "Leare, saj mien Brooda daut hee daut Oawgoot met mie endeele saul."

¹⁴ Oba hee saed to am: "Mensch, waea haft mie aunjestalt aus en Rechta oda en Enndeela aewa die?"

¹⁵ En hee saed to an: "Pausst opp, en siet faeasechtich fa aule Jiets, dan eenem sien Laewe es nich doaenn febunje met woo fael hee eajent."

¹⁶ En hee fetald an en Jlikjnes en saed: "En jewessa Maun sien Launt jeef ne besondasch goode Arnt.

¹⁷ En hee docht bie sikj selfst so: 'Waut kaun ekj doone, dan ekj ha nich ne Staed wua ekj miene Arnt kaun lote?'

¹⁸ Donn saed hee: 'Dit es waut ekj woa doone: ekj woa miene Spikjasch dol riete en buee jratre, en doa woa ekj aul mien Jetraejd en miene Sache toop enenn saumle.

¹⁹ En ekj woa to miene Seel saje: Seel, du hast fael Hab en Goot fa fael Yoare toop jelajcht, sie ruhich, at, drinkj, en frei die.'

²⁰ Oba Gott saed to am: 'Do Noa! dise Nacht woat diene Seel fonn die jefoddat woare; en waem sient woat daut dan senne daut du toopjesaumelt hast?'

²¹ Soo es en jieda dee fa sikj selfst en Schauts enn lajcht, oba es nich rickj Gott jaeajenaewa."