Revised Common Lectionary (Complementary)

8  He teka ianei kei te karanga te whakaaro nui, e puaki ana ano te reo o te matauranga?

² I runga i nga wahi tiketike tona turanga, i te ara i te tutakitanga o nga huarahi;

³ Hamama ana ia i te taha o nga kuwaha, i te ngutu o te pa, i te tomokanga atu i nga tatau:

⁴ Ki a koutou, e nga tangata, taku karanga; ki nga tama ano a te tangata toku reo.

²² I a Ihowa ahau, no te timatanga ra ano o ona ara, no mua atu i ana mahi o nehera.

²³ Nonamata riro ahau i whakaritea ai, no te timatanga, no mua atu i te whenua.

²⁴ I te mea kahore ano nga rire, kua whanau ahau; i te mea kiano he puna whai wai.

²⁵ No mua atu i te whakaunga o nga maunga, no mua i nga pukepuke toku whanautanga:

²⁶ I te mea kahore ano i hanga noatia e ia te whenua, me nga parae, me te timatanga o te puehu o te ao.

²⁷ I tana whakaturanga i nga rangi, i reira ano ahau: i tana whakaritenga i te awhi mo te mata o te rire;

²⁸ I tana whakapumautanga i nga rangi i runga; i te tototanga o nga puna o te rire;

²⁹ I tana rohenga mai i te moana, kei takahia tana kupu e nga wai; i tana waitohutanga i nga turanga o te whenua;

³⁰ I reira ahau i tona taha, he tohunga ki nga mahi: he ahuarekatanga ahau nona i ia ra, i ia ra, e koa ana i nga wa katoa i tona aroaro;

³¹ E koa ana ki tana ao; a ko taku i ahuareka ai ko nga tama a te tangata.

8  Ki te tino kaiwhakatangi. Kititi. He himene na Rawiri. E Ihowa, e to matou Ariki, ano te nui o tou ingoa i te whenua katoa! Paku ana i a koe tou kororia ki runga ake i nga rangi!

² U pu i a koe te kaha o te mangai o nga kohungahunga, o nga mea ngote u hei mea mo ou hoariri, hei pehi mo te hoariri, mo te kairapu utu.

³ Ka titiro ahau ki au rangi, ki te mahi a ou maihao, ki te marama, ki nga whetu, i hanga nei e koe;

⁴ He aha te tangata i maharatia ai e koe? te tama ranei a te tangata i tirohia ai ia e koe?

⁵ Nohinohi nei te wahi i whakaititia iho ai ia e koe i te Atua, karaunatia ana ia e koe ki te kororia, ki te honore.

⁶ Waiho iho e koe hei kingi mo nga mahi a ou ringa; kua waiho e koe nga mea katoa i raro i ona waewae;

⁷ Nga hipi katoa, nga puru, me nga kirehe katoa o te parae;

⁸ Te manu o te rangi, me te ika o te moana, e tere nei i nga ara o nga moana.

⁹ E Ihowa, e to matou Ariki, ano te nui o tou ingoa i te whenua katoa!

5  Na, i te mea ka tika nei i te whakapono, kia mau ta tatou maunga rongo ki te Atua, he mea na to tatou Ariki, na Ihu Karaiti;

² Nana nei te whakatatanga i a tatou i runga i te whakapono ki tenei aroha noa e tu nei tatou; a kia hari tatou i te mea ka tumanako nei tatou ki te kororia o te Atua.

³ A ehara i te mea ko tera anake, engari kia whakamanamana ano tatou ki o tatou mamae: e mohio ana hoki ko ta te mamae e mahi ai he manawanui;

⁴ Ko ta te manawanui he matauranga; ko ta te matauranga he tumanako:

⁵ E kore ano e whakama i te mea ka tumanako nei: kua ringihia hoki te aroha o te Atua ki o tatou ngakau e te Wairua Tapu kua homai nei ki a tatou.

¹² He maha atu ano nga mea hei korero maku ki a koutou, otira e kore e taea e koutou te mau aianei.

¹³ Otira kia tae mai ia, te Wairua o te pono, mana koutou e arahi ki te pono katoa: ehara hoki tana i te korero nana ake; engari ka korerotia e ia nga mea e rongo ai ia: mana hoki e whakakite ki a koutou nga mea e puta mai ana.

¹⁴ Ka whakakororiatia ahau e ia: ka tango hoki ia i aku mea, a ka whakaaturia ki a koutou.

¹⁵ Ko nga mea katoa a te Matua, naku: koia ahau i mea ai, ka tangohia e ia aku mea, a ka whakaaturia ki a koutou.