Revised Common Lectionary (Complementary)

Dee 115 Psalm

¹ Nijch to onns, O Herr Gott, nijch to onns, oba to dien Nome jeff Harlichkjeit; fa dien Erboarme, wäajen diene Woarheit.

² Wuaromm saje dee Nazione, Wua es nu äa Gott?

³ Oba onns Gott es enn dee Himmels; Hee haft aules jedone waut Am jefelt.

⁴ Äare Aufjetta sent Selwa un Golt, Mensche Henj äare Oabeit;

⁵ Dee ha Miela, oba dee räde nijch; dee ha Uage oba seene nijch;

⁶ dee habe Uare, oba heare nijch, dee ha ne Näs, oba dee kjenne nijch rikje;

⁷ äare Henj, oba dee feele nijch; äare Feet, oba dee kjenne nijch gone; dee räde nijch derjch äa Hauls.

⁸ Dee dän moake sent soo aus dee sent, jieda eena deit enn dän fetruehe.

⁹ O Iesrael, doo enn däm Herr Gott fetruehe; Hee es äa Help un äa Schilt.

¹⁰ O du Oant Hushault, doo enn däm Herr Gott fetruehe; Hee es äa Help un äa Schilt.

¹¹ Jie, dee jie däm Herr Gott ferjchte; doot enn däm Herr Gott fetruehe; Hee es äa Help un äa Schilt.

¹² Dee Herr Gott denkjt aun onns, Hee woat onns säajne; Hee woat daut Iesrael Hushault säajne; Hee woat daut Oant Hushault säajne;

¹³ Hee woat dän säajne dee däm Herr Gott ferjchte, dee Kjliene uk dee Groote.

¹⁴ Dee Herr Gott woat meeha to die toolaje, opp die un diene Säns.

¹⁵ Du best to däm Herr Gott jesäajent dee de Himmels un dee Ead jemoakt haft.

¹⁶ Dee Himmels – dee Himmels jeheare däm Herr Gott, oba Hee haft dee Ead to dee Mensche Säns jejäft.

¹⁷ Dee Doode doone däm Herr Gott nijch preise; uk nijch dee dee rauf gone enn daut stellet enenn;

¹⁸ Oba wie woare däm Herr Gott säajne, fonn nu aun un fa emma en emma. Preis däm Herr Gott!

3 Dit es en woaret Wuat: wan irjent waea en Jemeente Leida wel senne, straeft hee no en goodet Woakj.

² Aulso saul en Eltesta soona senne daem nusscht faea to schmiete jeit, saul mau eene Fru ha, saul nichta senne, schekjlich, eaboa, oppnaement, en saul aundre unjarechte kjenne,

³ nich en Supa, nich eena dee schleit, de sikj leewa jescheit fehelt, nich opp striede hoole, en nich jietsich,

⁴ eena dee sien eajent Hus enn Ordninj helt, Kjinja dee unjadon sent, en Respakjt ha;

⁵ dan wan eena nich weet sien eajnet Hus enn Ordninj to hoole, woo saul hee fa Gott siene Jemeent sorje?

⁶ He saul nich en Niebekjeada senne, daut hee nich meteemol stolt woat en enn daem Diewel sien Jerecht felt.

⁷ Hee mott en goodet Zeichnes ha fonn daen dee bute de Jemeent sent, daut am nich fe-acht woat en hee enn daem Diewel siene Faul felt.

⁸ Jrod soo motte dee Diakoone schekjlich senne, nich met dobbelde Tunje raede, nich Wiensupa senne, nich jietsich.

⁹ See motte daut Jeheemnes fom Gloowe enn en reinet Jewesse hoole.