Revised Common Lectionary (Complementary)

⁶⁸ "Jesaejent es Iesrael aea Herr en Gott, dan hee haft sien Folkj besocht en seelichkjeit towaeaj jebrocht,

⁶⁹ en haft onns ut sien Deena Doft sien Hus ne groote Radunk towaeaj jebrocht;

⁷⁰ so aus hee derch siene Profeete fonn oole Tiet haea jeraet haud,

⁷¹ daut wie sulle fonn onnse Fiend jerat woare, en fonn aul dee, dee onns hauste;

⁷² en dee Jnod to bewiese dee hee onnse Fodasch fesproake haud, sien heilje Bunt to behoole;

⁷³ waut hee Obraum jeschwoare haud, onns to jaewe;

⁷⁴ daut wie fonn onnse Fiend aeare Haunt sulle jerat woare, am to deene oone Angst,

⁷⁵ enn Heilichkjeit en Jerachtichkjeit fer am onns laewe lank.

⁷⁶ En du Kjint saust daem hechsta sien Profeet jenant woare; dan du woascht daem feropp gone, am daen Wajch reed to moake;

⁷⁷ sien Folkj en Festentness to jaewe fonn Seelichkjeit doaderch daut aeare Sinde fejaeft woare,

⁷⁸ derch Gott sien leeftoljet Erboarme, derch waut daut oppgone fonn Bowe onns beseakje woat,

⁷⁹ daen Licht to jaewe dee em Diestre sette, en enn daem Doot sien Schaute, onnse Feet opp daen Fraedenswajch enopp to leide."

³ Ekj dank mien Gott emma wan ekj aun junt denkj;

⁴ emma enn aul miene Jebaed fa junt, baed ekj fa junt aule met Freid,

⁵ wiel jie fomm easchta Dach aun met hollpe aum Evanjeelium to oabeide.

⁶ Ekj sie mie doarenn secha daut dee, dee ne goode Oabeit enn junt aunjefankt haft, woat daut foadich moake bott aun Jesus Christus sien Dach.

⁷ Daut es gauns rajcht fonn mie soo fonn junt to denkje, wiel ekj ju enn mien Hoat hab, sentamol jie aundeel ha jehaut aun miene Jnod, eendoont auf ekj enn Kjaede sie, en striede doo daut Evanjeelium to bestaedje.

⁸ Dan Gott es mien Zeij daut ekj en deepet Felange no junt ha, en Felange so aus Jesus Christus selfst.

⁹ Mien Jebaed es daut june Leew emma mucht toonaeme aun Erkjantnes en Ennsecht,

¹⁰ daut jie daut bewiese kjenne waut daut aulebaste es, daut jie muchte aun Jesus Christus sien Dach rein en Onnschuldich senne,

¹¹ jefellt met de Frucht de Jerajchtichkjeit derch Jesus Christus to Gott siene Ea en Harlichkjeit.

3 Nu enn daut fefteande Yoa fonn Tiberius siene Rejiarung, en Pontus Pielatus enn Judaea harscht, en Herodus enn Galilaea rejead, en sien Brooda Filip aewa Ituraea en Trachonietus rejead, en Liesanias aewa Abileene rejead;

² enn dee Tiet aus Anas en Kaifas Huugepriestasch weare, kjeem Gott sien wuat no Jehaun, daem Sacharias sien Saen aus hee enne Wiltnes wea.

³ En hee kjeem enn dee Jaeajende romm daen Jordan en praedjd ne Taufe fonn Buesse fa de fejaewnes fonn Sinde:

⁴ so auset jeschraew steit enn daem Proofeet Jesaja sien Buuk: "Ne Stem schricht enne Wiltness: Moakt en Wajch reed fa daem Herr, moakt sien Schtich jlikj;

⁵ jieda Schlucht saul oppjefelt woare, en aule Boaj saele endol jebrocht woare; daut kromme saul jlikj jemoakt, en de ruche Waej saele glaut jemoakt;

⁶ en de gaunse Welt saul daem Herr sien Heil seene.