Revised Common Lectionary (Complementary)

⁶⁸ "Jesaejent es Iesrael aea Herr en Gott, dan hee haft sien Folkj besocht en seelichkjeit towaeaj jebrocht,

⁶⁹ en haft onns ut sien Deena Doft sien Hus ne groote Radunk towaeaj jebrocht;

⁷⁰ so aus hee derch siene Profeete fonn oole Tiet haea jeraet haud,

⁷¹ daut wie sulle fonn onnse Fiend jerat woare, en fonn aul dee, dee onns hauste;

⁷² en dee Jnod to bewiese dee hee onnse Fodasch fesproake haud, sien heilje Bunt to behoole;

⁷³ waut hee Obraum jeschwoare haud, onns to jaewe;

⁷⁴ daut wie fonn onnse Fiend aeare Haunt sulle jerat woare, am to deene oone Angst,

⁷⁵ enn Heilichkjeit en Jerachtichkjeit fer am onns laewe lank.

⁷⁶ En du Kjint saust daem hechsta sien Profeet jenant woare; dan du woascht daem feropp gone, am daen Wajch reed to moake;

⁷⁷ sien Folkj en Festentness to jaewe fonn Seelichkjeit doaderch daut aeare Sinde fejaeft woare,

⁷⁸ derch Gott sien leeftoljet Erboarme, derch waut daut oppgone fonn Bowe onns beseakje woat,

⁷⁹ daen Licht to jaewe dee em Diestre sette, en enn daem Doot sien Schaute, onnse Feet opp daen Fraedenswajch enopp to leide."

¹⁸ Oba waut es doaraun? Auf daut nu ut Aufgonst oda enn Woarheit kjemt, Christus woat opp aule Waeaj jepraedicht, en doato frei ekj mie, en woa froo bliewe,

¹⁹ wiel ekj weet daut derch june Jebaed en Christus sien Jeist, mie daut woat to miene Radunk fehalpe.

²⁰ Ekj hop en raeakjen opp earnst doamet, daut ekj opp kjeen wajch woa to schaunde woare, oba daut gauns met Driest woat Christus nu, soo aus emma je-eat woare derch mien Lief, eendoont auf derch laewe oda Doot.

²¹ Dan Christus es mien Laewe, en stoawe es mien Jewenst.

²² Oba wan ekj hia noch aum laewe bliew, dit es dan fa miene Oabeit mea Frucht; en doaromm weet ekj nich waut to waele.

²³ Mie trakjt daut no beid Siede; ekj hab Losst fonn hia wajch en met Christus to senne, daut wiet baeta es;

²⁴ oba omm junet haulwe eset needja daut ekj noch aum laewe bliew.

²⁵ En wiel ekj mie secha sie doarenn, weet ekj daut ekj bie junt bliewe woa met to halpe june Freid aum Gloowe to femeare,

²⁶ soo daut june Pracht enn Jesus Christus sikj femeare kaun doaderch daut ekj wade no junt kome woa.