Revised Common Lectionary (Complementary)

Dee 119 Psalm

Aleth

¹ Jesäajent sent dee Opprajchte enn dän Wajch, dee enn däm Herr Gott sien Jesats waundle.

² Jesäajent sent dee, dee siene Zeijchnisse hoole, dee Am met daut gaunset Hoat seakje.

³ Dee doone uk nijch Onnjerajchtijchkjeit wirkje; dee waundle enn siene Wäaj.

⁴ Du hast aunjekommendeat sorjfeltijch diene Fäaschrefte to hoole.

⁵ O daut miene Wäaj bestädijcht weare diene Jesatse to hoole.

⁶ Dan wudd ekj mie nijch schäme brucke, wan ekj aul diene Jeboote bekjikje doo.

⁷ Ekj woa die danke met en opprejchtjet Hoat, enn daut leare fonn dee Jerejchte fonn diene Jerajchtijchkjeit.

⁸ Ekj woa diene Jerejchte hoole; doo mie nijch gaunsungoa felote.

9 Aulso haud daut easchte Tastament beides Faeaschrefte fonn Deenste en uk en weltlichet Heilichtum.

² Dan doa wea en Zelt reed jemoakt; daut easchte, wua beides en Laumpehoole uk en Desch stunnt met daut hanjesatet Broot, dit wea daut Heiljet jenant;

³ en hinje dee tweede Gerdien wea ne Stow daut daut aule heilichste jenant es,

⁴ doa wea dee goldne Aultoa, en dee Bunndeslod dee runt omm met Golt betroke wea, en doa benne wea de goldne Kruk met Mana, en Oant sien Stok dee Bloomeknoppes jekraeaje haud, en dee Tofle met dee Jeboote;

⁵ en aewa aul dit weare dee harlichkjeits Cherubiem, dee daem Jnodestool Schaute jeewe; aewa waut wie nu nich kjenne em eenselnet raede.

⁶ Nu aus dise dinje soo reed jemoakt weare, jinje dee Priesta aun eena Haunt emma enn dee easchte Stow enenn daen Deenst to doone,

⁷ Oba aune aundre Haunt, enn dee tweede jinkj bloos dee Huagapriesta enenn, - auleen - eemol emm Joa, nich oone Bloot, daut hee fa sikj sekfst en fa daut Follkj aeare oonbewiste Sind opfad;

⁸ doaderch bewees dee Heilje Jeist daut dee Wajch enn daut aulaheilichste noch nich opjemoakt wea soo lang aus daut easchte Zelt noch stunnt.

⁹ Daut wea en Faeabilt fa dee jewesse Tiet, en doano worde beides Gow uk Opfa jebrocht dee nich daut Jewesse reinje kunne fa daen dee daen Deenst brochte.

¹⁰ Daut weare bloos Aete en Drinkje en feschiedenstet Wausche, Ordnunge fom Fleesch dee oppjelajcht weare bott ne rachte Ordnunk kome wudd.

¹¹ Oba Christus es jekome aus en Huagapriesta fa goode Dinje dee bottem kome sent, derch en jratret en follkomnet Tselt daut nich fonn Mensche Henj jemoakt es, daut heet nich fonn dise Kjreeatua,

¹² uk nich derch Kose en Kjalwa Bloot, oba derch sien eajnet Bloot es hee een fa aulamol en daut heilichste enenn jegone, en haft ne eewje Radunk towaeaj jebrocht.