Revised Common Lectionary (Complementary)

63 దేవా, నీవు నా దేవుడవు.
    నాకు నీవు ఎంతగానో కావాలి.
నా ఆత్మ, నా శరీరం నీళ్లులేక ఎండిపోయిన భూమిలా
    నీకొరకు దాహంగొని ఉన్నాయి.
² అవును, నీ ఆలయంలో నేను నిన్ను చూశాను.
    నీ బలము నీ మహిమలను నేను చూశాను.
³ నీ ప్రేమ జీవం కన్నా గొప్పది.
    నా పెదాలు నిన్ను స్తుతిస్తున్నాయి.
⁴ అవును, నా జీవితంలో నేను నిన్ను స్తుతిస్తాను.
    నీ పేరట నేను నా చేతులెత్తి నీకు ప్రార్థిస్తాను.
⁵ శ్రేష్ఠమైన ఆహారం భుజించినట్లు నేను తృప్తిపొందుతాను.
    నా నోరు నిన్ను స్తుతిస్తుంది.
⁶ నేను నా పడక మీద ఉండగా నిన్ను జ్ఞాపకం చేసుకొంటాను.
    రాత్రి జాములలో నిన్ను నేను జ్ఞాపకం చేసుకొంటాను.
⁷ నీవు నిజంగా నాకు సహాయం చేశావు.
    నీవు నన్ను కాపాడినందుకు నేను సంతోషిస్తున్నాను.
⁸ నా ఆత్మ నిన్ను హత్తుకొంటుంది.
    నీ కుడిచెయ్యి నన్నెత్తి పట్టుకొంటుంది.
⁹ కొంతమంది మనుష్యులు నన్ను చంపుటకు ప్రయత్నిస్తున్నారు. కాని వారు నాశనం చేయబడతారు.
    వారు వారి సమాధుల్లోకి దిగిపోతారు.
¹⁰ ఖడ్గములతో వారు చంపబడతారు.
    అడవి కుక్కలు వారి మృత దేహాలను తింటాయి.
¹¹ అయితే రాజు తన దేవుని పట్ల సంతోషంగా ఉంటాడు.
    ఆయనకు విధేయులుగా ఉంటామని ప్రమాణంచేసిన మనుష్యులంతా ఆయనను స్తుతిస్తారు. ఎందుకంటే ఆ అబద్ధీకులందరినీ ఆయన ఓడించాడు.

⁹ రాజ్యాలలో దీనిని ప్రకటించండి:
    యుద్ధానికి సిద్ధపడండి!
బలాఢ్యులను మేల్కొలపండి!
    యుద్ధ వీరులందరినీ దగ్గరగా రానివ్వండి,
    వారిని రానివ్వండి!
¹⁰ మీ నాగటి కర్రులను చెడగొట్టి కత్తులు చేయండి.
    మీ పోటు కత్తులు చెడగొట్టి ఈటెలు చేయండి.
బలహీనుడ్ని కూడ
    “నేను బలాఢ్యుడను” అని చెప్పనీయండి.
¹¹ సకల రాజ్యాల్లారా, త్వరపడండి!
    ఆ స్థలానికి కూడి రండి!
    యెహోవా, బలమైన నీ సైనికులను తీసికొని రా.
¹² రాజ్యాల్లారా, మేల్కొనండి.
    యెహోషాపాతు లోయలోనికి రండి.
చుట్టుపక్కల రాజ్యాలన్నింటికీ తీర్పు చెప్పేందుకు
    అక్కడ నేను కూర్చుంటాను.
¹³ పంట సిద్ధంగా ఉంది గనుక
    కొడవలి పట్టుకొని రండి.
రండి, ద్రాక్షా గానుగ నిండిపోయింది గనుక
    ద్రాక్షాపండ్లమీద నడవండి.
వారి దుర్మార్గం చాలాఉంది గనుక
    పీపాలు నిండిపోయి పొర్లిపోతాయి.
¹⁴ తీర్మాన లోయలో ఎంతో మంది ప్రజలు ఉన్నారు.
    యెహోవా ప్రత్యేక దినం తీర్మాన లోయకు సమీపంగా ఉంది.
¹⁵ సూర్యుడు, చంద్రుడు చీకటి అవుతాయి.
    నక్షత్రాలు ప్రకాశించడం మానివేస్తాయి.
¹⁶ యెహోవా దేవుడు సీయోనులోనుండి కేకవేస్తాడు.
యెరూషలేమునుండి ఆయన కేక వేస్తాడు.
    మరియు ఆకాశం, భూమి కంపిస్తాయి.
కాని యెహోవా దేవుడే ఆయన ప్రజలకు క్షేమస్థానం.
    ఇశ్రాయేలు ప్రజలకు ఆయన క్షేమస్థానంగా ఉంటాడు.
¹⁷ “మీ యెహోవా దేవుడను నేనే అని అప్పుడు మీరు తెలుసుకొంటారు.
    నా పవిత్ర పర్వతమైన సీయోనులో నేను నివసిస్తాను.
యెరూషలేము పవిత్రం అవుతుంది.
    పరాయివారు ఆ పట్టణంలోనుండి మరల ఎన్నడూ దాటి వెళ్లరు.”

¹⁸ “ఆ రోజున పర్వతాలనుండి తియ్యటి ద్రాక్షారసం కారుతుంది.
    కొండల్లో పాలు, తేనెలు ప్రవహిస్తాయి.
    మరియు యూదాలోని ఖాళీ నదులన్నిటిలో నీళ్ళు ప్రవహిస్తాయి.
యెహోవా ఆలయంలోనుండి ఒక నీటి ఊట చిమ్ముతుంది.
    అది షిత్తీము లోయకు నీళ్ళు ఇస్తుంది.
¹⁹ ఈజిఫ్టు ఖాళీ అవుతుంది.
    ఎదోము ఖాళీ అరణ్యం అవుతుంది.
ఎందుకంటే యూదా ప్రజలపట్ల వారు క్రూరంగా ఉన్నారు.
    వారి దేశంలోని నిర్దోషప్రజలను వారు చంపివేశారు.
²⁰ కాని యూదాలో మనుష్యులు ఎల్లప్పుడూ నివసిస్తారు.
    అనేక తరాలవరకు యెరూషలేములో మనుష్యులు నివసిస్తారు.
²¹ ఆ మనుష్యులు చాలా మంది ప్రజలను చంపేశారు.
    కనుక ఆ ప్రజలను నేను నిజంగా శిక్షిస్తాను!”

‘దేవుడు సూర్యుణ్ణి చీకటిగా చేస్తాడు.
    చంద్రుడు వెలుగునివ్వడు
నక్షత్రాలు ఆకాశంనుండి రాలిపోతాయి
    ఆకాశంలోని శక్తులు కదలిపోతాయి.’^[a]