Revised Common Lectionary (Complementary)
దావీదు కీర్తన.
26 యెహోవా, నాకు తీర్పు తీర్చుము, నేను పవిత్ర జీవితం జీవించినట్టు రుజువు చేయుము.
యెహోవాను నమ్మకోవటం నేనెన్నడూ మానలేదు.
2 యెహోవా, నన్ను పరిశోధించి, నన్ను పరీక్షించి.
నా హృదయంలోనికి, నా మనసులోనికి నిశితంగా చూడుము.
3 నేను ఎల్లప్పుడూ నీ ప్రేమను చూస్తాను.
నీ సత్యాల ప్రకారం నేను జీవిస్తాను.
4 పనికిమాలిన ఆ మనుష్యుల్లో
నేను ఒకడ్ని కాను.
5 ఆ దుర్మార్గపు ముఠాలంటే నాకు అసహ్యం.
ఆ దుష్టుల ముఠాలలో నేను చేరను.
6 యెహోవా, నేను నా చేతులు కడుగుకొంటాను.
నేను నీ బలిపీఠం దగ్గరకు వస్తాను.
7 యెహోవా, నేను నీకు స్తుతి కీర్తనలు పాడుతాను.
నీవు చేసిన అద్భుత విషయాలను గూర్చి నేను పాడుతాను.
8 యెహోవా, నీ గుడారం అంటే నాకు ప్రేమ.
మహిమగల నీ గుడారాన్ని నేను ప్రేమిస్తున్నాను.
15 యెహోవా నాతో ఇలా అన్నాడు: “యిర్మీయా, చివరకు మోషే మరియు సమూయేలు ఇక్కడికి వచ్చి యూదా కొరకు ప్రార్థన చేసినా, ఈ ప్రజలకై నేను విచారపడను. నానుండి యూదా ప్రజలను దూరంగా పంపివేయి! పొమ్మని వారికి చెప్పు! 2 ‘మేమెక్కడికి వెళతాము, అని వారడుగవచ్చు. అప్పుడు వారితో యెహోవా ఇలా అంటున్నాడని చెప్పు:
“‘నేను వారిలో కొంతమంది అసహజంగా చనిపోవటానికి ఉద్దేశించాను.
వారు మృత్యువు వాతబడతారు.
కొంతమందిని కత్తికి బలిచేయటానికి ఉద్దేశించాను.
వారు కత్తులతో యుద్దానికి పోయి చనిపోతారు.
కొందరిని ఆకలి చావులకు ఉద్దేశించాను.
వారు కరువుకు గురవుతారు.
మరి కొందరిని అన్యదేశాలలో బందీలు కావటానికి ఉద్దేశించాను.
వారు బందీలై పరదేశానికి తీసుకుపోబడతారు.
3 నేను నాలుగు రకాల విధ్వంసకారులను వారిపైకి పంపుతాను.’
ఈ వర్తమానం యెహోవా నుండి వచ్చినది
‘నేను ఖడ్గధారులైన శత్రువులను సంహారానికి పంపుతాను.
చనిపోయినవారి శరీరాలను లాగివేయటానికి కుక్కలను పంపుతాను.
వారి శవాలను తినివేయటానికి, నాశనం చేయటానికి పక్షులను, అడవి జంతువులను పంపుతాను.
4 ప్రపంచ ప్రజలందరికీ భీతావహంగా ఉండేలా
యూదా ప్రజలను భయంకరమైనదానికి ఒక ఉదాహరణగా చూపిస్తాను.
మనష్షే[a] రాజు యెరూషలేములో చేసిన దానిని బట్టి
యూదా ప్రజలకు నేనీ విధంగా చేస్తాను.
మనష్షే యూదా రాజైన హిజ్కియా కుమారుడు.
మనష్షే యూదా రాజ్యానికి ఒక రాజు.’
5 “యెరూషలేము నగరమా, నీకొరకు ఒక్కడు కూడా విచారించడు.
ఎవ్వడూ నిన్ను గూర్చి విలపించడు.
నీ యోగ క్షేమాలు తెలుసుకొనేందుకు కూడా ఎవ్వరూ దగ్గరకు రారు.
6 యెరూషలేమా, నీవు నన్ను వదిలిపెట్టావు.”
ఈ వర్తమానం యెహోవా నుండి వచ్చినది.
“అనేక పర్యాయములు నీవు నన్ను చేరలేదు!
కావున నిన్ను నేను శిక్షించి నాశనం చేస్తాను.
మీ శిక్షను మీ మీదకు రాకుండా పట్టుకొని నేను అలసి పోయాను.
7 యూదా ప్రజలను నా కొంకె కర్రతో[b] వేరు చేస్తాను.
వారిని రాజ్యంలోగల నగర ద్వారాలవద్ద నిరుపయోగంగా పారవేస్తాను.
నా ప్రజలలో మార్పు రాలేదు.
అందుచే నేను వారిని నాశనం చేస్తాను.
వారి పిల్లలను నేను తీసుకొని పోతాను.
8 అనేకమంది స్త్రీలు తమ భర్తలను కోల్పోతారు.
సముద్రతీరాన ఉన్న ఇసుకకంటె ఎక్కువగా విధవ స్త్రీలు వుంటారు.
మధ్యాహ్న సమయంలో నేను నాశన కారులను తీసుకొని వస్తాను.
యూదా యువకుల తల్లులపై వారు దాడి చేస్తారు.
యూదా ప్రజలకు బాధను, భయాన్ని కలుగ జేస్తాను.
ఇదంతా అతి త్వరలో సంభవించేలా చేస్తాను.
9 శత్రువు కత్తులతో దాడిచేసి ప్రజలను చంపుతాడు.
మిగిలిన యూదా వారిని వారు చంపుతారు.
ఒక స్త్రీకి ఏడుగురు కుమారులుండవచ్చు, కాని వారంతా హత్య చేయబడతారు.
ఆమె ఏడ్చి ఏడ్చి సొమ్మసిల్లిపోతుంది.
ఆమె కలవరపడి, తబ్బిబ్బై పోతుంది.
దుఃఖంవల్ల పట్టపగలే ఆమెకు చీకటి కలుగుతుంది.”
7 వాని అధర్మం రహస్యంగా పనిచేస్తూ తన శక్తిని చూపటం అప్పుడే మొదలు పెట్టింది. దాన్ని అడ్డగించేవాడు ఒకాయన ఉన్నాడు. వాణ్ణి అడ్డగిస్తున్నవాడు తీసివేయబడేదాకా ఆయన వాణ్ణి అడ్డగిస్తూనే ఉంటాడు. 8 అప్పుడు ఆ భ్రష్టుడు కనిపిస్తాడు. యేసు ప్రభువు వాణ్ణి తన ఊపిరితో హతమారుస్తాడు. యేసు తేజోవంతంగా ప్రత్యక్షమై ఆ భ్రష్టుణ్ణి నాశనం చేస్తాడు.
9 ఆ భ్రష్టుడు సాతాను శక్తితో వచ్చి రకరకాల మహత్కార్యాలు చేస్తాడు. దొంగ చిహ్నాలు, అద్భుతాలు చేసి మోసం చేస్తాడు. 10 నాశనం కానున్నవాళ్ళను అన్ని విధాలా మోసం చేస్తాడు. వాళ్ళు సత్యాన్ని ప్రేమించటానికి, దేవుని రక్షణను స్వీకరించటానికి నిరాకరించారు కనుక నశించిపోతారు. 11 ఈ కారణంగా దేవుడు వాళ్ళకు మోసం చేసే శక్తిని పంపుతాడు. వాళ్ళు దాన్ని నమ్ముతారు. 12 సత్యాన్ని నమ్మక అధర్మంగా జీవించాలని నిశ్చయించుకొన్నవాళ్ళందరినీ శిక్షిస్తాడు.
© 1997 Bible League International