Revised Common Lectionary (Complementary)

Dee 121 Psalm

En leet fonn nehejcht gone.

¹ Ekj woa miene Uage nehejcht häwe no dee Boaj; fonn wua saul miene Help kome?

² Miene Help kjemt fonn däm Herr Gott, dee de Himmels un dee Ead muak.

³ Hee woat nijch erlaube daut dien Foot jleppe sull; dee die bewoat, woat nijch schlope.

⁴ See, dee Iesrael bewoat, woat nijch schlope!

⁵ Dee Herr Gott es dien Bewoara; dee Herr Gott es dien Schaute aun diene rajchte Haunt.

⁶ Dee Sonn woat die nijch stäakje bie Dach, uk nijch de Mon bie Nacht.

⁷ Dee Herr Gott woat die bewoare fonn aulet Beeset; Hee woat diene Seel bewoare.

⁸ Dee Herr Gott woat dien rut gone un dien enenn kome bewoare; fonn nu aun un wieda bott enne Eewijchkjeit.

4 Waut sel wie dan saje daut Obraum, onns Foda nom Fleesch, jefunge haud?

² Dan wan Obraum derch siene Woakje jeracht wort, wud hee waut ha to puche; oba nich fer Gott.

³ Dan waut sajcht de Schreft? "En Obraum jleewd Gott, en am wort daut aunjeraekjent aus jerachtichkjeit.

⁴ Nu fa daem dee oabeide deit es Loon nich jeraeakjent no Jnod, leewe no Schult.

⁵ Oba fa daem dee nich met Woakje prooft, oba derch Gloowe enn daem jleeft dee de Gottloose Jeracht moakt, daem sien Gloowe es am toojeraeakjent aus Jerachtichkjeit.

¹³ Dan daut Fespraeakje daut hee sull de Welt oawe, wea nich to Obraum en siene Nokome jejaeft derch daut Jesats, oba derch dee Jerachtichkjeit fom Gloowe.

¹⁴ Dan wan dee, dee unja daut Jesats sent, de Oaw sent, dan es de Gloowe to nusscht jemoakt, en daut Fespraeake es to Grunnt jebrocht;

¹⁵ dan daut Jesats wirkt Oaja, wiels wan doa kjeen Jesats es, es kjeen aewatraede.

¹⁶ Doaromm es daut derch Gloowe, dautet mucht ut Jnod kome; so daut daut Fespraeakje kunn secha senne to aulem, nich bloos fa daen, dee unja daut Jesats sent, oba uk fa daen, dee derch Gloowe Obraum siene Famielje sent; hee es en Foda fa onns aule,

¹⁷ [soo auset jeschraewe steit: "Ekj ha die en Foda jemoakt aewa fael Felkja";] fer Gott, daem hee jleewd, dee de Doodes oppwakjt, en roopt daut waut nich es, soo dautet es.

3 Doa wea en Maun dee heet Nikodeemus, en Farisaea, waut utem huage Rot wea.

² Disa kjeem no Jesus enne Nacht en saed: "Meista, wie weete daut du en Leara best fonn Gott, dan kjeena kaun dee Teakjens doone dee du deist, bueta Gott es met am."

³ Jesus auntwuad en saed to am: "Enn Woarheit, enn Woarheit saj ekj die: Waea nich wadajebuare es fonn Bowe, kaun Gott sien Rikj nich seene."

⁴ Nikodeemus saed to am: "Woo kaun en Mensch noch eemol jebuare woara wan hee oolt es? Kaun he tom tweeda mol em Muttalief enenn gone en wada jebuare woare?"

⁵ Jesus auntwuad: "En Woarheit, en Woarheit, saj ekj die: Wea nich ut Wota en Jeist jebuare es, kaun nich enn Gott sien Rikj ennen kome.

⁶ Daut waut fomm Fleesch jebuare es, es Fleesch; en daut waut fomm Jeist jebuare es, es Jeist.

⁷ Doo die nich wunndre daut ekj die saj: Jie motte fonn bowe wadajebuare senne.

⁸ De Wint blost wua he wel, en du kaust daen heare, oba du weetst nich wua he haea kjemt, oda wua he han jeit. Soo es en jiedre dee fom Jeist jebuare es."

⁹ Nikodeemus auntwuad en saed to am: "Woo kaun sowaut paseare?"

¹⁰ Jesus auntwuad en saed to am: "Du best en Leara enn Iesrael en weetst daut nich?

¹¹ Enn Woarheit, enn Woarheit saj ekj die: Wie raede daut waut wie weete, en jaeawe Zeichnes fonn daut waut wie jeseene ha, en jie naeme onns Zeichnes nich aun.

¹² Wann ekj ju fonn irdische Dinje saj, en jie nich jleewe, woo wudd jie jleewe wan ekj ju fonn himlische Dinje fetal?

¹³ Noch es kjeena nom Himel gefoare bueta dee, dee fom Himel erauf kaum, - dee Menschesaen.

¹⁴ En soo aus Moses dee Schlang enne Wiltnes nehecht hoof, jrod soo mott de Menschesaen uk nehecht jehowa woare.

¹⁵ Daut aul dee, dee aun am jleewe, daut eewje laewe habe.

¹⁶ Dan Gott haft dise Welt so Leef jehaut, daut hee sien eentsje Saen jeef, daut aula, dee aun am jleewe, nich feloare gone, oba daut eewje Laewe habe.

¹⁷ Dan Gott schekjt sien Saen nich enn dise Welt enenn omm dee to rechte, oba daut dee Welt derch am kunn seelich woare.

17 Sas Doag lota neem Jesus Peeta, en Jakoobus en sien Brooda Jehaun, en leid an opp en huaga Boajch auleen.

² En hee wort fer an fe-endat, en sien Jesecht shiend soo aus de Sonn, en siene Kjleeda worde soo wit aus hallet Licht.

³ En Kjikj! see sage Mooses en Elia met am raede.

⁴ En Peeta saed to Jesus: "Herr, dit es goot fa onns hia to senne; wan du west, dan moak wie hia dree Tselte, eena fa die, eena fa Mooses, en eena fa Elia."

⁵ Waearent hee noch raed, kjikj, ne kloare Wollkj kjeem aewa an, en kjikj, ne Stem kjeem ut dee Wollkj, dee saed: "Dit es mien Leefsta Saen, aun daem ekj grootet Jefaule ha; horcht no am!"

⁶ Aus dee Jinja daut heade, folle see opp aeare Jesechta, enn groote Angst.

⁷ Oba Jesus kjeem no an, read an aun, en saed: "Stot opp, en aengst junt nich."

⁸ See kjikjte opp, en sage sest kjeenem aus Jesus auleen.

⁹ Aus see fom Boajch rauf kjeeme, befool Jesus an en saed: "Sajcht kjeenem fonn daut waut jie jeseene ha bott de Menschesaen fom Doot oppjestone es."