Revised Common Lectionary (Complementary)

⁴ “ఇప్పుడు నా స్నేహితులు నన్ను చూసి నవ్వుతారు.
    వారిలా అంటారు: ‘వీడు దేవుణ్ణి ప్రార్థించాడు. వీనికి ఆయన జవాబు ఇచ్చాడు.’
కానీ నేను మంచివాణ్ణి, నిర్దోషిని.
    అయినప్పటికీ ఇంకా నన్ను చూసి నా స్నేహితులు నవ్వుతూనే ఉన్నారు.
⁵ కష్టాలు లేని మనుష్యులు కష్టాలు ఉన్న వాళ్లను హేళన చేస్తారు.
    అలాంటి వాళ్లు పడిపోతున్న వాళ్లను కొట్టేస్తారు.
⁶ దొంగల గుడారాలకు ఇబ్బంది లేదు.
    దేవునికి కోపం రప్పించే వాళ్లు శాంతిగా జీవిస్తారు.
    వారి ఒకే దేవుడు వారి స్వంత బలమే.

⁷ “అయితే జంతువుల్ని అడగండి,
    అవి మీకు నేర్పిస్తాయి.
లేక ఆకాశ పక్షుల్ని అడగండి,
    అవి మీకు నేర్పిస్తాయి.
⁸ లేక భూమితో మాట్లాడండి,
    అది మీకు నేర్పిస్తుంది.
లేక సముద్రపు చేపలను వాటి జ్ఞానం గూర్చి
    మీతో చెప్పనివ్వండి.
⁹ వాటిని యెహోవా సృష్టించాడని ప్రతి ఒక్కరికీ తెలుసు.
¹⁰ బ్రతికి ఉన్న ప్రతి జంతువూ శ్వాస పీల్చే
    ప్రతి మనిషీ దేవుని శక్తి క్రిందనే.
¹¹ భోజనం రుచి చూడడం నాలుకకు ఎంత ఆనందమో
    చెవులు అవి వినే మాటలను పరీక్షించవా:
¹² ముసలి వాళ్లకు కూడా జ్ఞానం ఉంది. దీర్ఘాయుష్షు అవగాహన కలిగిస్తుంది.
    అని మేము అన్నాము.
¹³ జ్ఞానం, బలం దేవునికి చెందుతాయి.
    మంచి సలహా మరియు గ్రహింపు ఆయనవే.
¹⁴ ఒక వేళ దేవుడు దేనినైనా పడగొడితే మనుష్యులు దాన్ని తిరిగి నిర్మించలేరు.
    ఒక వేళ దేవుడు ఒక మనిషిని చెరసాలలో పెడితే మనుష్యులు అతనిని విడుదల చేయలేరు.
¹⁵ ఒక వేళ దేవుడు గాని వర్షాన్ని ఆపివేస్తే భూమి ఎండి పోతుంది.
    ఒక వేళ దేవుడు గాని వర్షాన్నిరానిస్తే అది భూమిని వరదతో నింపివేస్తుంది.
¹⁶ దేవుడు బలవంతుడు, ఆయన ఎల్లప్పుడూ గెలుస్తాడు.
    మోసపోయిన వాడు మోసం చేసిన వారూ ఇద్దరూ దేవునికి చెందిన వారే.
¹⁷ రాజుల జ్ఞానమును దేవుడు తీసి వేస్తాడు.
    నాయకులు వెర్రిగా వ్రవర్తించేటట్టు చేస్తాడు.
¹⁸ రాజులు వారి బందీలకు గొలుసులు వేస్తారు. కాని దేవుడు వాటిని తీసివేస్తాడు.
    అప్పుడు దేవుడు ఆ రాజుల మీద నడికట్టు వేస్తాడు.
¹⁹ తన వంశాన్ననుసరించి రక్షణ ఉందనుకొనే యాజకుల బలాన్ని దేవుడు అణచి,
    వాళ్లను క్రిందికి దిగజారేటట్లు చేస్తాడు.
²⁰ నమ్మకమైన సలహాదారులను దేవుడు నిశ్శబ్దం చేస్తాడు.
    వృద్ధుల జ్ఞానమును ఆయన తీసివేస్తాడు.
²¹ నాయకులను అప్రముఖులనుగా చేస్తాడు.
    పాలకుల బలాన్ని ఆయన తీసివేస్తాడు.
²² లోతైన అంధకారంలో నుండి రహస్య సత్యాలను దేవుడు చూపిస్తాడు.
    మరణం లాంటి చీకటి గల స్థలాలలోనికి ఆయన వెలుగు పంపిస్తాడు.
²³ దేవుడు రాజ్యాలను పెద్దవిగా, శక్తిగలవిగా విస్తరింపజేస్తాడు.
    అప్పుడు ఆయన వాటిని నాశనం చేస్తాడు.
ఆయన రాజ్యాలను పెద్దవిగా పెరగనిస్తాడు.
    అప్పుడు ఆ రాజ్యాల్లోని ప్రజలను ఆయన చెదరగొడతాడు.
²⁴ భూలోక నాయకులను వెర్రివార్ని గాను అర్థం చేసుకోలేని వార్ని గాను దేవుడు చేస్తాడు.
    మార్గం లేని అరణ్యంలో సంచరించేందుకు ఆయన వారిని పంపిస్తాడు.
²⁵ ఆ నాయకులు చీకటిలో ముందుకు సాగుతారు. వారికి ఏ వెలుగూ లేదు.
    వారు తాగుబోతుల్లా నడిచేటట్టు దేవుడు వారిని చేస్తాడు.”