Revised Common Lectionary (Complementary)

⁴ त्यहाँ एउटा नदी छ जसको धाराले
    सर्वोच्च परमेश्वरको पवित्र शहरमा आनन्द ल्याउँछ।
⁵ परमेश्वर त्यस शहरमा हुनुहुन्छ यसैले यो कहिल्यै नाश हुने छैन।
    घाम उदाउनु अघिनै परमेश्वर साथ दिन त्यहाँ हुनुहुन्छ।
⁶ जब परमप्रभु कराउनु हुनेछ अनि पृथ्वी टुक्रिने छ।
    प्रत्येक जाति डरले काम्ने छन् अनि ती साम्राज्यहरू धराशायी हुनेछन्।
⁷ सर्वशक्तिमान् परमप्रभु हामीसँग हुनुहुन्छ।
    याकूबका परमेश्वर हाम्रो शरणस्थान हुनुहुन्छ।

⁸ परमप्रभुले गर्नुभएको ती शक्तिशाली कामहरूलाई हेर।
    उहाँले पृथ्वीमा गर्नु भएको डरलाग्दा कार्यहरू हेर।
⁹ परमप्रभुले पृथ्वीमा कतैपनि युद्धहरू रोक्न सक्नु हुन्छ।
उहाँले सिपाहीहरूका धनु भाँच्न सक्नु हुन्छ,
    तिनीहरूका भालाहरू छरपस्ट पारेर तिनीहरूका ढालहरू जलाई दिनुहुन्छ।

¹⁰ परमेश्वर भन्नुहुन्छ, “लडाइँ रोक, म नै परमेश्वर हुँ भनेर जान!
    म जाति-जातिलाई परास्त गर्नु सक्छु,
    म संसारलाई अधीनमा राख्न सक्छु!”

¹¹ सर्वशक्तिमान् परमप्रभु हामीसँग हुनुहुन्छ।
    याकूबका परमेश्वर हाम्रो शरणस्थान हुनुहुन्छ।

⁴ ज्ञानले भन्छे, “हे मानिस हो, म तिमीहरूलाई आह्वान गर्दछु,
    म सबै मानिसहरूलाई बोलाउँदैछु।
⁵ तिमीहरू जो अनुभवी छैनौ भने ज्ञानी हुन सिक।
    हे मूर्खहरू हो, बुझ्न सिक।
⁶ तिमीहरू सुन, म जुन कुराहरू सिकाउँछु, तिनीहरू महत्वपूर्ण छन्।
    जुन कुराहरू सही हुन, तिनीहरू नै भन्छु।
⁷ मेरा वचनहरू सत्य हुन।
    किनभने मेरा ओंठहरूले मिथ्यालाई घृणा गर्छन्।
⁸ मेरो मुखबाट निस्केका सबै वचनहरू सही तथा न्यायपूर्ण हुन्छन्
    अनि कुनै पनि भ्रमित तथा झूटो हुँदैनन्।
⁹ यी सब भनाईहरू समझ हुने मानिसहरूको लागि स्पष्ट छन्
    अनि ज्ञानी मानिसहरूको निम्ति तिनीहरू सरल छन्।
¹⁰ मैले दिएका उपदेशहरू स्वीकार गर, कारण तिनीहरू चाँदी भन्दा असल छन्,
    अनि बहुमूल्य सुन लिनु भन्दा ज्ञान र बुद्धि लिनु नै उत्तम हो।
¹¹ ज्ञान मोतीहरू भन्दा अझ उत्तम हो।
    ज्ञान मानिसले चाहने ती सवै चिजहरू भन्दा असल हो।”