Revised Common Lectionary (Complementary)

² परमप्रभु मेरो चट्टान हुनुहुन्छ, मेरो किल्ला हुनुहुन्छ।
मेरो सुरक्षाको ठाउँ हुनुहुन्छ।
    मेरो परमेश्वर, मेरो चट्टान हुनुहुन्छ म उहाँकहाँ सुरक्षाको लागि दगुरेर जान्छु।
परमेश्वर मेरो ढाल हुनुहुन्छ उहाँको शक्तिले मलाई बचाउँछ।
    परमप्रभु उच्च पर्वतहरूमा मेरो सुरक्षास्थान हुनुहुन्छ।

³ मैले सहायताको लागि परमप्रभुलाई बोलाएँ,
    अनि म मेरो शत्रुहरूबाट बाँचे।
    तर तिनीहरूले खिल्ली उडाए।
⁴ मेरा शत्रुहरूले मलाई मार्ने प्रयास गरिरहेका थिए! मृत्युको डोरीले मलाई चारैतिर घेरेको थियो।
    म बाढीमा फँसेको थिएँ जसले मलाई मृत्युको मुखतिर लगिरहेथ्यो।
⁵ चिहानको डोरीले मलाई चारैतिर घेरि राखेको थियो,
    मृत्युको पासो मेरो सम्मुख थियो।
⁶ म पासोमा फसें, मैले सहयोगको लागि परमप्रभुलाई बोलाएँ।
    हो, मैले परमेश्वरलाई बोलाएँ।
परमेश्वर उहाँको मन्दिरमा हुनुहुन्थयो उहाँले मेरो स्वर सुन्नभयो।
    उहाँले मेरो विलापमा गोहारेको सुन्नुभयो।
⁷ पृथ्वी थर्कियो र काम्यो;
    पर्वतहरूको जग हल्लियो।
    किनभने परमप्रभु क्रोधित हुनुहुन्थ्यो!
⁸ परमेश्वरको नाकको प्वालबाट धुवाँ आयो।
    परमेश्वरको मुखबाट जल्दै गरेको ज्वाला
    अनि जल्दै गरेका झिल्काहरू उहाँबाट उडेर निस्कियो।
⁹ परमप्रभुले आकाश च्याति दिनु भयो,
    अनि उहाँ तल ओर्लनु भयो! उहाँ बाक्लो, कालो बादलमा उभिनु भयो।
¹⁰ परमप्रभु करूब स्वर्गदूतमाथि चढेर आकाश वारिपारि उडनुभयो।
    उहाँमाथि बतासमा उडिरहनु भएको थियो।
¹¹ परमप्रभु कालो बादलमा लुक्नु भएको थियो जसले उहाँलाई पालले जस्तो घेरेको थियो
    उहाँ बाक्लो बज्र स्वरूप बादलमा लुक्नु भएको थियो।
¹² त्यसपछि, परमेश्वरको तेजिलो चमकले त्यो कालो बादलहरू फटाई दिनुभयो।
    त्यहाँ असिनाको गोला र आगोका फिलिङ्गाहरू बर्षिए!
¹³ परमप्रभु स्वर्गबाट गर्जनु भयो।
    सर्वोच्च परमेश्वरले उहाँको स्वर सुनिने बनाउनु भयो।
    त्यहाँ असिनाको गोला र आगोका फिलिङ्गाहरू बर्षिए।
¹⁴ परमप्रभुले आफ्नो काँड हिर्काउनु भयो र शत्रुहरूलाई छरपस्ट पारीदिनु भयो।
    परमप्रभुले धेरै बज्रहरू फ्याँक्नु भयो अनि मानिसहरू अलमल्ल भएर छरिए।

¹⁵ परमप्रभु, तपाईंले आफ्नो आदेश दिनु भयो
    अनि शक्तिशाली हावा बहन थाल्यो।
पानी पछाडी गयो अनि हामीले समुद्रको पिंध देख्न सक्छौं।
    हामीले पृथ्वीको पिंध देख्न सक्यौं।

¹⁶ परमप्रभु माथिबाट ओर्लेर तलसम्म पुग्नु भयो र मलाई बचाउँनु भयो।
    परमप्रभुले मलाई समात्नु भयो र गहिरो पानीबाट तानेर निकाल्नुभयो।
¹⁷ मेरा शत्रुहरू म भन्दा बलिया थिए, तिनीहरूले मलाई घृणा गर्दथे।
    मेरा लागि मेरा शत्रुहरू एकदम शक्तिशाली थिए, यसर्थ परमेश्वरले मलाई बचाउनु भयो।
¹⁸ म विपत्तिमा थिएँ, र मेरा शत्रुहरू ममाथि आइलागे।
    तर परमप्रभु मेरो सहयोगको लागि त्यहाँ हुनुहुन्थ्यो!
¹⁹ परमप्रभुले मलाई प्रेम गर्नु हुन्छ यसैले उहाँले मलाई बचाउनु भयो।
    उहाँले मलाई सुरक्षित ठाउँमा ल्याउनु भयो।

²⁷ “परमेश्वरले पृथ्वीबाट पानी लैजानु हुन्छ
    अनि यसलाई तुषारो र बर्षामा परिवर्तन गर्नुहुन्छ।
²⁸ यसकारण बादलले पानी बर्षाउँछ
    अनि धेरै पानी मानिसहरूमाथि पर्छ।
²⁹ परमेश्वरले आकाशमा बादल कसरी फैलाउनु हुन्छ
    अथवा मेघ कसरी गर्जाउनु हुन्छ, कसैले पनि बुझ्न सक्तैन।
³⁰ हेर, परमेश्वरले पृथ्वीमाथि प्रकाश फैलाउनु भयो
    समुद्रको गहिरो भागसम्म ढाक्नु भयो।
³¹ मानिसहरूमाथि नियन्त्रण राख्न
    अनि तिनीहरूलाई प्रशस्त भोजन दिन परमेश्वरले यसो गर्नु हुन्छ।
³² परमेश्वरले उज्यालो आफ्नो हातमा अँठ्याउनु हुन्छ,
    र उहाँले जहाँ चाहनुहुन्छ त्यहाँ टाँसिने आदेश गर्नु हुन्छ।
³³ आकाशको गर्जनले आँधी कहाँ आउदैछ सो बताउँछ।
    यसर्थ गाई वस्तुले पनि बुझ्छ कि आँधी-बेहरी कहाँ आउँदैछ।

¹⁴ “अय्यूब, एक मिनेट उभिएर सुन,
    परमेश्वरले गर्नु भएको ती अनौठा कुराहरू बारे सोच।
¹⁵ अय्यूब, के तिमी जान्दछौ परमेश्वरले कसरी बादललाई वशमा राख्नुहुन्छ?
    के तिमी जान्दछौ परमेश्वरले कसरी बिजुली चम्काउनुँ हुन्छ?
¹⁶ के तिमी जान्दछौ कसरी बादलहरू आकाशमा झुण्डिन्छन्?
    परमेश्वरले बनाउनु भएका अनौंठो सृजनाहरू मध्ये बादल खाली एकमात्र उदाहरण हो।
    अनि परमेश्वरले ती सबै कुराहरू विषयमा जान्नु हुन्छ।
¹⁷ तर अय्यूब, तिमीले ती कुराहरू जान्दैनौ।
जब तातो हावा दक्षिणबाट आउँदछ तिमीलाई पसिना आएर शरीरका लुगाहरू टाँसिन्छन्,
    अनि प्रत्येक चीज जस्ताको त्यस्तै शान्त रहनेछ।
¹⁸ अय्यूब, के तिमीले परमेश्वरलाई आकाश फैलाउन सहयोग गर्न सक्छौ,
    अनि यसलाई पित्तल जस्तो चम्काउन सक्छौ?

¹⁹ “अय्यूब, बताऊ हामीले परमेश्वरलाई के भन्नु पर्छ!
    तिम्रो अज्ञानताले गर्दा के भन्नु पर्ने हो हामी सोच्न सक्तैनौ।
²⁰ म परमेश्वरलाई भन्ने छैन कि म उहाँसँग बोल्न चाहन्छु।
    त्यो ध्वंश गराई माग्नु बराबर हुनेछ।
²¹ एउटा मानिसले घाम हेर्न सक्तैन।
    बादलहरू हावाले उडाई लगिसके पछि यो आकाशमा अत्यन्त उज्यालो र चम्किलो हुन्छ।
²² अनि परमेश्वर पनि त्यस्तै हुनुहुन्छ।
    पवित्र पर्वतबाट परमेश्वरको सुनौलो महिमा चम्कन्छ परमेश्वरको वरिपरि त्यहाँ उज्यालो हुँदछ।
²³ सर्वशक्तिमान परमेश्वर महान हुनुहुन्छ।
हामी परमेश्वरलाई बुझ्न सक्तैनौं।
    परमेश्वर अत्यन्त शक्तिशाली हुनुहुन्छ, तर उहाँ हाम्रो लागि असल र उचित हुनुहुन्छ।
    परमेश्वरले हामीलाई घात पुर्याउन चाहनुहुन्न।
²⁴ त्यसैकारण मानिसहरूले परमेश्वरलाई श्रद्धा गर्छन्।
    तर परमेश्वरले घमण्डी मानिसहरूलाई आदर गर्नुहुन्न,
    किनभने तिनीहरू आफैंलाई ज्ञानी ठान्दछन्।”