Revised Common Lectionary (Complementary)

¹² Cykilca kej xjal cyaj tuˈn tbint il cyuˈn, judíole, yaaˈnle judío, pero ccyiikˈel cycastiwa tuˈn Dios. Kej xjal yaaˈn judío min e cybi ti toc tuˈn tley Moisés. Juˈ tzunj miˈn tzˈoc tcyeˈyen Dios ejeeˈ laˈ ka e cynima tley Moisés bix ka min. Pero ctzaal tkˈoˈn Dios cycastiwa, cuma e binchanke il. Yal tzunkej xjal judío, e cyiikˈ tley Moisés. Juˈ tzunj jtley Moisés cˈajbel te Dios oj tmlon tiˈ cybinchben, tuˈntzen tkˈontexin cycastiwa kej min e cyniman tley Moisés. ¹³ Yaaˈn kej judío nuk n‑oc cybiˈn tley Moisés chi temel jiquen twitz Dios, sino nuk ejeeˈj nbint cyuˈn alcyej tzin tkbaˈn. ¹⁴ Ja tzunkej xjal yaaˈn judío, amale mint cytzkiˈn tley Moisés, pero tuj cyanem n‑el cyniyˈ tiˈj alcyej baˈn bix tiˈj alcyej yaaˈn baˈn. Ka jaj baˈn nbint cyuˈn, tzin cyyeecˈan at tley Dios tuj cyanem. ¹⁵ Amale mint cytzkiˈn tley Moisés, pero ka kˈiˈn tley Dios cyuˈn, nyeecˈantzen tisenx at tley Moisés tuj cyanem, cuma kej caˈba ley lu junx eteˈ. Ka tzin tkbaˈn cynaabl ka kaˈ nbint cyuˈn bix ka baˈn, juˈtzen ntyeecˈan at tley Moisés tuj cyanem. ¹⁶ Tuj tzunj kˈij oj toc tcyeˈyen Dios cykilca xjal, tujtzen tcwent Jesucristo cˈaale tkˈoˈn Dios tuˈn toc tcyeˈyen jcˈuˈn tuj cyanem xjal. Kej e cyniman, cchicˈajaxel jiquenke twitz Dios. Juˈ toc tuˈn tyol Dios, bix juˈx weya.