Revised Common Lectionary (Complementary)

Dee 95 Psalm

¹ O komt, un sinjt to däm Herr Gott; moakt en froohet Jelud to däm groota Steen fonn onnse Radunk.

² Well wie fer sien Jesecht kome met Preis; well wie to Am juble fa Freid met Jesank.

³ Dan dee Herr Gott es en groota Gott, un en groota Kjeenijch äwa aule Kjeenijchs.

⁴ Dee deepa Städe enne Ead sent enn siene Henj; dee Spetze fonne Boaj sent uk siene.

⁵ Dee See es sient, un hee muak dee; un siene Henj deede daut dreajet Launt forme.

⁶ O kom, well wie Am aunbäden un onns dol bäajen; well wie onns dolkjneehe fer däm Herr Gott dee onns jemoakt haft.

⁷ Dan Hee es ons Gott; un wie sent daut Folkj fonn siene Weid, un dee Schop enn siene Haunt. Fondoag wan die siene Stem heascht,

⁸ dan doo dien Hoat nich hoat moake aus enn Meriba; aus enn dän Dach fonn Massa enne Wiltnis,

⁹ aus june Fodasch Mie ut proowde, dee fesochte Mie un sage mien Woakj.

¹⁰ Fa Featich Joa jrämd ekj mie äwa dee Jennerazion; un ekj säd: "Daut es en Folkj daut emma enn äa Hoat erre deit, un, dee kjane nich miene Wäaj.

¹¹ Soo schwua ekj enn mien Oaja daut see nich wudde enn miene Ru enenn kome.

5 Dee Elteste dee mank ju sent femon ekj,- ekj sie je uk en Elteste, uk eena dee Christus sien Liede jeseene haft, uk eena dee aundeel haft aun dee Harlichkjeit dee boolt woat jeoppenboat woare:

² Sorcht fa Gott siene Haead dee mank ju sent, nich jedwunge oba welich so es Gott daut jefelt; nich ut Jewensucht, oba jearen,

³ uk nich so es wan jie awae aules harsche, leewa an en Faeabilt senne.

⁴ En dan wan dee Faeaschte Hoad woat kome woa jie ne Harlichkjeitskroon kriehe dee niemols fewaelkje woat.

⁵ Jrod so uk, jie jingre Manna, siet dee elre Manna unjadon; jo, siet ju aule unjarenaunda unjadon - en hoolt faust aun Deemut, dan Gott es jaejen dee Stolte, oba de Deemuetje jeft hee Jnod.