Revised Common Lectionary (Complementary)

Dee 51 Psalm

To dän Haupt Musikaunt, en Psalm fonn Doft – Aus Natan dee Profeet no am kjeen no däm daut hee Fekjea haud jehaut met Batseeba.

¹ Sie jnädijch to mie O Gott, no dien Erboarme, no diene groote leeftolje Erboarmunje, doo miene Äweträdunje utlasche.

² Wausch mie gausentgoa fonn mien Beeset, un moak mie rein fonn miene Sind.

³ Dan ekj doo miene Äwträdunge bekjane; miene Sind es emma fer mie.

⁴ Jäajen die, un die auleen, ha ekj jesindijcht un Beeset jedone enn diene Uage; daut du muchst jerajchtfoadijcht senne wan du rätst, un kloa senne wan du rejchte deist.

⁵ See, ekj wort enne Sind jebuare, un miene Mutta deed mie enn Sind bejriepe.

⁶ See, du deist Woarheit felange enn daut ennalijchet, un enn daut festoakne deist du mie Weisheit leare.

⁷ Reinj mie met Iesopp, un ekj woa rein senne, wausch mie, un ekj woa witta senne aus Schnee.

⁸ Moak mie foll Freid un froo senne to heare, daut dee Knoakes dee du jebroake hast sikj freihe kjenne.

⁹ Festäakj dien Jesejcht fonn miene Sind, un doo aul miene Onnjerajchtijchkjeite utlasche.

¹⁰ Erschauf enn mie en reinet Hoat, O Gott; un doo en staunthauftja Jeist enn mie nie moake.

¹¹ Doo mie nijch fonn dien Doasenne wajch schmiete, un nem dien Heilje Jeist nijch fonn mie.

¹² Jeff mie wada dee Freid fonn diene Radunk, un hool mie opprajcht met dien welja Jeist.

4 Doarom wel wie onns ferchte, wiel daut Fespraeakje noch doa es enn siene Ru enenn to kome, daut nich jemaunt sull too kort kome doaraun.

² Dan werklich, onns es daut Evanjeelium uk fekjindicht worde, jrod so aus jane; oba daut Wuat daut jane fekjindicht wort holp an nusscht wiel daut nich met Gloowe febunge wea enn daen dee daut heade.

³ Dan wie, dee wie jleewe, gone enn dee Ru enenn, so aus hee saed: "Soo aus ekj schwua enn mien Oaja, wan see enn miene Ru sulle enenn kome", wan uk dee Woakje fonn de Welt Grunt foadich weare.

⁴ Dan hee saed opp ne jewesse Staed fonn daem saewende Dach soo aus dit: "En Gott rued aum saewende Dach fonn aul siene Oabeit."

⁵ en enn dise Staed: "Auf see woare enn miene Ru enenn kome".

⁶ Wiel daut nu soo blift daut eenje doa enenn gone woare, en jane daen daut Evanjeelium eascht jepreadicht wort, nich enenn kjeeme waeajen Onnjehuarsaum,

⁷ Wada, stalt hee en jewesse Dach: "Fonndoag", sajcht hee enn Doft, no soone lange Tiet, soo aus hee ferhaea saed: "Fonndoag, wan jie siene Stem heare, fehoat june Hoate nich."

⁸ Dan wan Joosua an haud Ru jejaeft, wudd hee nich fonn noch en aundra Dach jeraet ha.

⁹ Aulso blift doa noch en Saubatru fa Gott sien Follkj.

¹⁰ Dan waea enn Gott siene Ru enenn jekome es, rut uk fonn siene eajne Woakje, soo aus Gott selfst fonn siene.

¹¹ Dan wel wie iewrich senne enn dee Ru enenn to kome, daut nich waea enn daem selwje Biespel fonn Onnjehuarsaum enenn felt.

¹² Dan Gott sien Wuat es en laewendjet en kjraftjet Wuat, shoapa aus en tweeschniedjet Schweat, en schnit derch bott Seel en Jeist utaneen, en Jliet en Moakjt, en kaun Jedanke en Hoat Faeanaeme rechte;

¹³ en doa es kjeene Kjreatua daut am nich oppenboa es: oba aules es Noakt en opjedakjt fer siene Uage - fer daem met waem wie to doone habe.